މިހާރު ކުރިޔަށްދާ އެއިޓީން ތާޓީ މުބާރާތުގެ ފައިނަލަށް ޓީމް ފެނަކަ އާއި ޕޮލިސް ކްލަބް ދަތުރުކޮށްފިއެވެ.

ތިން ޓީމުން ވާދަކުރާ މި މުބާރާތް ކުރިޔަށް ގެންގޮސްފައިވަނީ ލީގު އުސޫލުންނެވެ. ކޮންމެ ޓީމަކާ ދެ މެޗު ކުޅުމަށްފަހު، އެއްވަނަ އަދި ދެވަނައިގައިވާ ޓީމު ފައިނަލް ކުޅޭ ގޮތަށެވެ. ލީގު ބުރުގެ ފަހު މެޗުގައި ކުޅެފައިވަނީ ދިވެހި ސިފައިންގެ ކުލަބާއި ޓީމް ފެނަކައެވެ.

ފަހު މެޗަށް ނިކުތްއިރު، ފެނަކަ އާއި ޕޮލިހަށް ވަނީ ހަ ޕޮއިންޓު ލިބިފައެވެ. އަދި އެންމެ ފަހުގެ ޗެމްޕިއަން ސިފައިންގެ ކުލަބަށް ލިބިފައިވަނީ ތިން ޕޮއިންޓެވެ. ފައިނަލުން ޖާގަ ހޯދުމަށް ތިން ލަނޑުގެ ފަރަގަކުން ސިފައިން މޮޅުވާން ޖެހެއެވެ. ސިފައިންގެ ކުލަބުން ވަނީ ފެނަކަގެ މައްޗަށް 2-1 ގެ ނަތީޖާއަކުން ކުރިހޯދާފައެވެ. ނަމަވެސް، ޕޮއިންޓު ގޮތުން ތިން ޓީމު އެއްވަރުވެ، ފައިދާ ގޯލުން ކުރި ލިބުނީ ފެނަކަ އާއި ޕޮލިހަށެވެ.

މެޗުގެ ކުރީކޮޅު ސިފައިންގެ ޓީމުގެ ފާތިމަތު އަފްޒާ ވަނީ ލަނޑެއް ޖަހައި އެ ޓީމަށް ކުރިހޯދަދީފައެެވެ. އޭގެ ފަހުން 29 ވަނަ މިނެޓުގައި ފެނަކައިގެ ފާތިމަތު އިނާޝަ އާދަމް ވަނީ ލަނޑެއް ޖަހައި ނަތީޖާ ހަމަހަމަ ކޮށްދީފައެވެ. ސިފައިން މޮޅުކޮށްދިން ލަނޑު ޖަހާފައިވަނީ މެޗުގެ މޮޅު ކުޅުންތެރިޔާ މައީޝާ އަބްދުލް ހަންނާން އެވެ.

ފެނަކަ އާއި ޕޮލިސް ފައިނަލަށް ދަތުރުކޮށްފައިވާއިރު، މި ދެ ޓީމު ކުޅުނު ފުރަތަމަ މެޗު 1-0 ގެ ނަތީޖާއަކުން ކާމިޔާބުކުރީ ޕޮލިސް ކުލަބެވެ. ދެވަނަ މެޗު 3-2 ގެ ނަތީޖާއަކުން ކާމިޔާބުކުރީ ޓީމް ފެނަކަ އެވެ.