ނާޒިމަށް ކުރާ ޓެރަރިޒަމްގެ ދައުވާއާ ގުޅިގެން އިތުރު ފަރާތްތަކެއްގެ ހެކިބަސް ނަގައިފި
އޭނާ ހައްޔަރު ކޮށްފައިވަނީ 20 މެއި 2021 ގައި ހުޅުމާލޭގައި އޭރު އޭނާ ދިރިއުޅެމުންދިޔަ ތަނުން
ރައީސް މުޙައްމަދު ނަޝީދަށް ދިން ޙަމަލާއާ ގުޅިގެން ހައްޔަރު ކޮށްފައިވާ އއ މާޅޮސް އަސަރީގޭ މުޙައްމަދު ނާޒިމް
ޓެރަރިޒަމާއި ގުޅޭ ދައުވާތަކެއް އުފުލާފައިވާ އއ މާޅޮސް، އަސަރީގެ މުޙައްމަދު ނާޒިމްގެ މައްޗަށް ކުރާ ދައުވާއެއްގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ދައުލަތުން އޭނާގެ މައްޗަށް ކުރަނީ ޓެރަރިސްޓް ޖަމާއަތަކަށް ތާއީދުކުރާފަދަ ލިއުމެއް ނުވަތަ ކުރެހުމެއް ނުވަތަ ފޮޓޯއެއް ގެންގުޅުމުގެ ކުށުގެ ދައުވާއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އާމިނަތު އަޒްލިފާއެވެ.
މި މައްސަލައިގައި މިހާރު ކުރިއަށްދަނީ ދައުލަތުގެ ހެކިންގެ ހެކިބަސް ނެގުމުގެ މަރުޙަލާއެވެ. އެގޮތުން މި އަޑުއެހުމުގައި ވަނީ ނާޒިމް ދިރިއުޅޭ ގެ ބަލައި ފާސްކުރުމުގައި ޙަރަކާތްތެރިިވި އޮފިސަރެއްގެ ހެކިބަސް ނަގާފައެވެ.
ނާޒިމް ދިރިއުޅުނު ތަން ބަލައި ފާސްކޮށް، އޭނާ ހައްޔަރު ކުރުމުގައި ޙަރަކާތްތެރިވި ޓީމުގައި ހިމެނޭ އޮފިސަރުންތަކެއްގެ ހެކިބަސް މީގެ ކުރިންވެސް ނަަގާފައިވެއެވެ.
އޭނާ ހައްޔަރު ކޮށްފައިވަނީ 20 މެއި 2021 ގައި ހުޅުމާލޭގައި އޭރު އޭނާ ދިރިއުޅެމުންދިޔަ ތަނުންނެވެ. އެތަން ބަލައި ފާސްކުރިއިރު ފޯނަކާއި ޕެންޑްރައިވެއް ހޯދާފައިވާއިރު، އެއީ ނާޒިމްގެ ތަކެތިކަމަށް އެވަގުތު އޭނާ ބުނެފައިވާކަން ހެކިވެރިޔާވެސް ފާހަގަކުރިއެވެ.
ހެކިވެރިޔާ ވިދާޅުވި ގޮތުގައި ފޯނު ހޯދީ އޭނާ ހުރި ކޮޓަރީގެ އެނދެއް މަތިންނެވެ. އަދި ޕެންޑްރައިވް ހޯދާފައިވަނީ އެ ކޮޓަރި ބަލައި ފާސްކުރިއިރު އަލަމާރި ތެރެއިން ނެގި ދަބަހެއްގެ ތެރެއިންނެވެ.
ދެން ހާޒިރުކުރީ ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި މަސައްކަތް ކުރައްވާ ފަރާތެކެވެ. އޭނާ ހާޒިރުކުރީ ދައުލަތުން ހެއްކެއްގެ ގޮތުގައި ހުށައަޅާފައިވާ ކޮމްޕިއުޓަރ ފޮރެންސިކް ރިޕޯޓާއި ގުޅިގެންނެވެ.
އޭނާ ވަނީ މި މައްސަަލައާ ގުޅިގެން ގެނެވުނު ޕެންޑްރައިވް ތަހުލީލުކޮށްފައެވެ.
އެ ޕެންޑްރައިވުން އައިސިސް ޖަމާއަތަށް ތާއީދުކުރާކަމަށް ބެލެވޭފަދަ ލިޔެކިޔުންތަކެއް ފެނިފައިވާކަމަށް މި މައްސަލައިގެ ދައުވާ ހުށައެޅިއިރު ދައުލަތުންވެސް ބުނެފައިވެއެވެ.
