ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަޙައްދުން ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން މާލެ ސަރަޙައްދުން ގޯތި ލިބުނު މީހުންގެ މެދުގައި އަންގާރަ ދުވަހު 11 ޖަހާއިރު ގުރުނަގަން ފަށާނެކަމަށް ހައުސިން އެންޑް އިންފްރާސްޓްރަކްޗަރ މިނިސްޓްރީން ބުނެފިއެވެ.

ގޯތި ލިބޭ މީހުންގެ ދާއިމީ ލިސްޓް ހޯމަ ދުވަހު ވަނީ އާންމުކޮށްފައެވެ. ދާއިމީ ލިސްޓް އާންމުކުރިއިރު މި ސްކީމްގެ ދަށުން ޖުމްލަ 18955 މީހުންނަށް ގޯތި ލިބެއެވެ. މިމީހުންގެ މެދުގައި ގުރުނެގުމާއި ބިން ކެނޑުމުގެ އިންތިޒާމުތައް ހަމަޖެހިފައިވާ ގޮތާއި ގުޅޭގޮތުން ހޯމަ ދުވަހުގެ ރޭ ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހައުސިން މިނިސްޓްރީގެ ސީނިއާ އެގްޒެކެޓިވް ޑިރެކްޓަރު މުހައްމަދު އާރިފް ވިދާޅުވީ ގުރުނަގަން އަންނަންވީ ވަގުތު ޕޯޓަލް މެދުވެރިކޮށް އެނގޭނެކަމަށެވެ. އެގޮތުން 15 ވަނަ ދުވަހާއި 16 ވަނަ ދުވަހު ގަލޮޅު ދަނޑުގައި ގުރުނަގާއިރު 17 ވަނަ ދުވަހުން ފެށިގެން ގުރުނަގާނީ ހެންވޭރު ދަނޑުންކަމަށް އާރިފް ވިދާޅުވިއެވެ.

ގޯތި ލިބޭ އަކަފޫޓުން ފޮށިތައް ބަހައްޓާފައި ހުންނާނެ ކަމަށާއި އޭގެން ކޮންމެ މީހަކު ވެސް ނަގާ ކަރުދާސްކޮޅުގައި ޕްލޮޓް ނަމްބަރާއި ގޯތި ލިބޭ ތަން ލިޔެފައި އޮންނާނެ ކަމަށް އާރިފް ވިދާޅުވިއެވެ. ގުރުނެގުމަށްފަހު ބިން ކަނޑަންދާންވީ ވަގުތު އެމީހަކަށް ވަކިން އަންގަމުންދާނެކަމަށާއި ބިން ކަނޑަން އަންގާރަ ދުވަހުގެ ހަވީރު ފަށާނެކަމަށް އާރިފް ވިދާޅުވިއެވެ.

ގުރުނެގުމަށް އައުމަށް ގަޑިއިރެއްގެ މުއްދަތު ދެވޭނެކަމަށާއި އެވަގުތުތެރޭގައި ހާޒިރުވުމަކީ މުހިންމު ކަމެއްކަމަށް އާރިފް ވިދާޅުވިއެވެ. ބިން ލިބޭ ފަރާތްތަކުގެ ތެރެއިން އެއްވެސް މީހަކަށް ނާދެވޭނަމަ ބަދަލުގައި އާދެވޭ މީހެއްގެ އައިޑީ ނަންބަރާއި ނަން ޕޯޓަލްގައި ޖެހުމުން އެމީހަކަށް ގުރުނުގުމުގައި ބައިވެރިވެވޭނެކަމަށް އާރިފް ވިދާޅުވިއެވެ.

އަދި ގުރުނަގާ ޓެންޓަށް ވަދެވޭނީ އެމީހަކަށް ނުވަތަ އެމީހެއްގެ ބަދަލުގައި އަންނަ މީހަކަށް އެކަނިކަމަށް އާރިފް ވިދާޅުވިއެވެ. އެއް ގަޑިއިރު ތެރޭގައި ނާންނަ ފަރާތްތަކުގެ ގުރުއަގު ނަގަން ވަކިން އޮފިޝަލުން ތިބޭނެކަމަށާއި މުޅި ގުރުއަތު ނެގުން ޓީވީއެމް މެދުވެރިކޮށް ވަގުތުން ދުރަށް ދައްކަމުންދާނެކަމަށް އާރިފް ވިދާޅުވިއެވެ.

ގުރުނަގަމުންދާ ވަރަކުން ބިން ކަނޑަމުންދާނެކަމަށް އާރިފް ވިދާޅުވިއެވެ.