ކަނަވާރޯ، ޑީރޮސީ އަދި ސްޕަލެއްޗީ އާއި އަލެގްރީ އިޓަލީގެ ލިސްޓަށް
ޔުވެންޓަސްގެ ކޯޗާއި ސްޕަލެއްޗީ އަކީ ލިސްޓުގައި ހިމެނޭ ތަޖުރިބާކާރު ކޯޗުން
ޔޫރޯ 2020 ކާމިޔާބު ކުރުމަށްފަހު އިޓަލީގެ ކުޅުންތެރިން: ކޯޗުކަމުން މަންޗިނީ ވަނީ އިސްތިއުފާދީފައި
އިއްޔެ ހުސްވި އިޓަލީގެ ގައުމީ ކޯޗުގެ މަގާމަށް މީހަކު ހޮވުމުގައި މިހާތަނަށް ހަތަރު ކޯޗުން ޝޯޓް ލިސްޓްކޮށްފި އެވެ.
މި ގޮތުން ލިސްޓުގައި ހިމެނޭ އެއް ފަރާތަކީ އިޓަލީގެ ކުރީގެ ގައުމީ ކެޕްޓަން ފަބިއޯ ކަނަވާރޯ އެވެ. 2006 ވަނަ އަހަރުގެ ވޯލްޑްކަޕް ހޯދައިދިން ކެޕްޓަންގެ ކޯޗިން ކެރިއަރުގެ ބޮޑު ބައެއް ހޭދަކޮށްފައިވަނީ ޗައިނާގަ އެވެ.
ލިސްޓުގައި ދެން ހިމެނޭ ނަމަކީ ޑެނިއަލް ޑީ ރޮސީ އެވެ. ކޯޗިންގެ މާބޮޑު ތަޖުރިބާކާރަކަށް އޭނާ ވެސް ނުވެ އެވެ. މިހާތަނަށް ހުރީ ގައުމީ ޓީމުން ވަކިވި ކޯޗު ރޮބާޓޯ މަންޗިނީގެ އެހީތެރިއަކަށެވެ.
ތަޖުރިބާކާރު ކޯޗުންގެ ގޮތުގައި ލިސްޓުކޮށްފައިވަނީ ނަޕޯލީ އަށް މިދިޔަ ސީނުގެ އިޓާލިއަން ލީގު ކާމިޔާބުކޮށްދިން ކޯޗު ލޫސިއާނޯ ސްޕަލެއްޗީ އާއި ޔުވެންޓަސްގެ ލޯޗު މަސިމިލާނޯ އަލެގްރީ އެވެ.
އިޓަލީގެ ބައެއް ނޫސްތަކުން ބުނަނީ އިޓާލިއަން ފުޓްބޯޅަ ފެޑަރޭޝަނުން ރޯމާގެ ކޯޗު ހޯސޭ މޮރީނިއޯއާ ވެސް މަޝްވަރާކުރަން ތައްޔާރުވަމުންދާ ކަމަށެވެ.
އެންމެ ފަހުގެ ވޯލްޑްކަޕަށް ކޮލިފައިނުވުމުން އަންނަ އަހަރުގެ ޔޫރޯ އަށް ތައްޔާރުވަމުން އަންނަ އިޓަލީގެ ކޯޗުކަމުން މަންޗިނީ ވަކިވީ ކުރިން އެންގުމަކާނުލައެވެ. ސަބަބެއް އޭނާ ވެސް ނުބުނެ އެވެ. މެންޗެސްޓާ ސިޓީގެ ކުރީގެ ކޯޗު މަންޗިނީ އަކީ ޔޫރޯ 2020 އިޓަލީ އަށް ކާމިޔާބުކޮށްދިން ކޯޗެވެ.
