ވައުދުވާއިރު ހަޅޭއްލަވަނީ ކީއްވެ؟

ދިވެހިބަހުގެ މުހާވަރާއެއްގައި އޮވެއެވެ. އަޑުގަދަ މީހާގެ ރުއް ގިނަވާނެއެވެ. މާނައަކީ ޒުވާބުގެގޮތުން ދޫނުކޮށް ހިފަހައްޓާމީހާއަށް ގިނަ ފަހަރަށް ކާމިޔާބުވާނެއެވެ. ވަށައިގެންވާ މާހައުލަށް ނަޒަރު ހިންގާލާއިރު، މިއީ ހަގީގަތުގައިވެސް ކަން ހިނގާ ގޮތެވެ. އެންމެ ކައިރިން ގޭތެރެއަށް ބަލާއިރު، ދެބެއިންގެ ތެރެއިން އަޑުގަދަ މީހާ ގެއަށް ގަދަވެއެވެ. ގޭތެރޭގައި އަޑުގަދަވެ، ރުޅިގަދަ މީހާއަށް ދެން ހުންނަ މީހާ ދޫކުރާ މަންޒަރު ފެނުމަކީ އާއްމު ކަމެކެވެ. އަދި އަޑުހަރުކޮށް ބުނުމުން ގިނަ ފަހަރަށް އެމީހަކު ބޭނުންވާ ކަމެއް ފުދެއެވެ. މީގެ އިތުރުން ކްލާސްރޫމެއްގައި ވެސް ކަން ހިނގަނީ އެ އުސޫލުންނެވެ. އަޑުގަދަ ކުއްޖާއަށް އެންމެންގެ ސަމާލުކަން ލިބެއެވެ. އަދި އޮފީސް މާހައުލުގައި ވެސް އަޑުގަދަކޮށް، ވެރިންގެ ގާތުގައި ވާހަކަދައްކައި، ބަސް ބުނެ އުޅޭ މުވައްޒަފުންނަކީ އެންމެ މަސައްކަތްކުރާ މުވައްޒަފުގެ ގޮތުގައި ލޭބަލްވުމަކީ ވެސް އާއްމު ކަމެކެވެ.

އެހެންކަމުން ބައެއް މީހުންނަކީ އެމީހުން ބޭނުންވާ ކަންކަން ހާސިލްކުރުމަށް އަޑުގަދަކުރާ މީހުންނެވެ. ވަކި އަމާޒެއްގައި ވަކި ނަތީޖާއެއް ހާސިލްކުރުމަށެވެ. އެ ނަތީޖާ ހާސިލްވަންދެން އެމީހުން އަޑުގަދަކުރާނެއެވެ. ދެން ތިބޭ މީހުންނަށް ވިސްނުމެއްނެތިއެވެ. ބައެއް މީހުން މިގޮތަށް މިކަން ކުރަނީ ދެން ތިބޭ މީހުން ބިރުގެންނެވުމަށާއި ސަމާލުކަން ހޯދުމަށެވެ. އަދި އެމީހުން ބުނާ ބަސްތަކާމެދު ދެން ތިބޭ މީހުންގެ ވިސްނުން އަނބުރާލުމަށް ވެސް އަޑުގަދަކޮށް ބަސް ބުނެއެވެ.

އެގޮތުން މިހާރު އަޑުގަދަކޮށް ބަސްބުނާ މީހުން ވަރަށް ގިނައެވެ. ޚާއްސަކޮށް ސިޔާސީ ބޭފުޅުންނެވެ. ސެޕްޓެންބަރު 9 ވަނަ ދުވަހު ބާއްވާ ރިޔާސީ އިންތިޚާބާ ގުޅިގެން ސިޔާސީ ގިނަ ފަރާތްތަކުން ދަނީ ދުވާލާއި ރޭގަނޑު ރައްޔިތުންނާ ބައްދަލުކޮށް ކެމްޕޭން ކުރަމުންނެވެ. ރައްޔިތުންނާ މުޚާތަބުކޮށް ވައުދުތައް ވަމުންނެވެ. ބައެއް ސިޔާސީ ފަރާތްތަކުން ދަނީ ހަޅޭއްލަމުންނެވެ. ޚާއްސަކޮށް ވައުދެއްވާއިރު، ސިއްސައިގެންދާ ވަރަށް ހަޅޭއްލަވައިގަނެއެވެ. މައިކުން އަޑުވެސް ފަޅައިގެންދާ ވަރަށެވެ. އެއީ ސިޔާސީ މީހުންގެ ހުންނަ ޖަޒުބާތެއްގެ ސަބަބުންވާ ގޮތަކަށް ވެސް ވެދާނެއެވެ. ނޫންނަމަ އެއީ ގިނަ ރައްޔިތުން ސަމާލުކަން ހޯދުމަށް ބައެއް މީހުން ގެންގުޅޭ ސިޔާސީ އުކުޅަކަށްވެސް ވެދާނެއެވެ. ނަމަވެސް ސިޔާސީ ފަރާތްތަކުން އިހުސާސްތައް ބަންޑުކޮށްލާއިރު، ރައްޔިތުންގެ ކުރިމަތީގައި ބަހައްޓަންޖެހޭ ވަކި އުސޫލުތަކާއި މިންގަނޑުތަކެއް ވެސް ހުންނާނެ ނޫންތޯއެވެ.

މިއަދުގެ ޒުވާން ޖީލަށް ބަލާއިރު، ގިނަ ޒުވާނުންނަށް ވިސްނައިދިނުމަށް އެންމެ ގިނަ މީހުން ގެންގުޅޭ އުކުޅަކީ ލޯބިން ވިސްނައިިދިނުމެވެ. ރީތިކޮށް ވާހަކަ ދެއްކުމެވެ. ތަހުޒީބުވެފައިވާ މިދުނިޔޭގައި މިއަދު މައިންބަފައިނާއި ދަރިންގެ ފަރާތުން ވެސް ފެންނަނީ މި މަންޒަރެވެ. އަޑުގަދަ މީހާގެ ރުއް ގިނަވިނަމަވެސް ހަޅޭއްލެވުމަކީ ބަލައިގަންނާނެ ކަމެއް ނޫނެއެވެ. މިސާލަކަށް ބުނާކަމަށްވާނަމަ، ތިމާ ހިތްއެދޭ މީހަކާ ކައިވެނިކުރުމަށް ލޯބިން ވާ ވައުދުތައް ފުދެއެވެ. ވައުދުވަނީ ރީތިކޮށް، ލޯބިންނެވެ. ލަވަނީ ހަޅޭކެއް ނޫނެއެވެ. ނަމަވެސް އެމީހެއްގެ ގާތަށް ގޮސް ހަޅޭއްލަވާނަމަ ދުވަހަކުވެސް އެމީހަކާ ކައިވެނި ނުކުރެވޭނެ ނޫންތޯއެވެ. އެހެންކަމުން ހަޅޭއްލަވާއިރު، މިކަމާމެދު ވިސްނާލުން ބުއްދިވެރި ނޫންތޯއެވެ.

ސިޔާސީ ލީޑަރުން މަސައްކަތްކުރައްވަނީ ރައްޔިތުންނަށް އެބޭފުޅުންގެ ސިޔާސަތުތައް ވިސްނަވައިދެއްވޭތޯއެވެ. ގިނަ ވައުދުފުޅުތަކެއް ވެވަޑައިގަންނަވަނީ ވެރިކަމަށް ވަޑައިގަތުމަށެވެ. ރައްޔިތުން ފަރާތުން ގިނަ ވޯޓުތަކެއް ހޯއްދެވުމަށެވެ. ނަމަވެސް ރައްޔިތުންގެ ކުރިމަތީގައި ސިޔާސީ ބޭފުޅުން ހަޅޭއްފުޅުލެއްވުމުން މަގުސަދު ހާސިލުވާނެތޯއެވެ. އެ ވާ ވައުދުފުޅުތައް ފުއްދަވާނެކަމާއެކު ސުވާލު އުފެދޭނެ ކަމާމެދު ޝައްކެތްނެތެވެ. އެހެންކަމުން ސިޔާސީ ޖަޒުބާތު ބަންޑުކޮށްލައްވައި، ވައުދުފުޅުތައް ވެވަޑައިގަންނަވާއިރު އަޑަށް ބާރު ނުލައްވައި، ރީތިކޮށް ވާހަކަފުޅު ދެއްކެވުން ބުއްދިވެރި ނޫންތޯއެވެ. މިކަމާމެދު ވިސްނާވަޑައިގަންނަވަން ޖެހޭނޫންތޯއެވެ.