ޓޮޓެންހަމް އަދި އިންގްލެންޑުގެ ކެޕްޓަން ހެރީ ކޭން ޖަރުމަނުގެ ބަޔާން މިއުނިކަށް ސޮއި ކޮށްފި އެވެ.
ޖަރުމަނުގެ ޗެމްޕިއަން ބަޔާނާއެކު ކޭން ސޮއި ކޮށްފައި ވަނީ ހަތަރު އަހަރު ދުވަހުގެ އެއްބަސްވުމެއްގަ އެވެ. އެ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. ބަޔާނުން ވަނީ އެ ކުލަބުން ކޭންގެ ސޮއި ހޯދާފައިވާކަން ރަސްމީކޮށް ހާމަކޮށްފަ އެވެ. ބަޔާންގައި ކޭން ބޭނުންކުރާނީ ނުވަ ނަންބަރު ޖާޒީ އެވެ. އެއީ ކުރިން އެ ކުލަބަށް ކުޅުނު ޕޮލެންޑުގެ ކެޕްޓަން ރޮބާޓް ލެވަންޑޯސްކީ ވެސް ބޭނުންކުރި ނަންބަރެވެ.
ކޭންގެ ސޮއި ހޯދުމަށްފަހު ވާހަކަ ދައްކަވަމުން ބަޔާންގެ ރައީސް ހާބާޓް ހައިނާ ވިދާޅުވީ، ބަޔާނުން ކޭން އަށް ވަރަށް ހޫނު މަރުހަބާއެއް ކިޔާ ކަމަށެވެ. އޭނާ ވިދާޅުވީ ކޭންގެ ސޮއި ލިބުމަކީ ބަޔާންގެ އިތުރުން އޭނާ އަށް ވެސް ލިބުނު ވަރަށް ބޮޑު އުފަލެއް ކަމަށެވެ. އެެހެންކަމުން ކޭންގެ ސޮއި ބަޔާނަން ހޯދުމުގައި މަސައްކަތް ކޮށްދެއްވި އެންމެހައި ފަރާތްތަކަށް އޭނާ ވަނީ ޝުކުރު އަދާކުރައްވައިފަ އެވެ. އިތުރަށް އޭނާ ވިދާޅުވީ ކޭން އާއެކު ބަޔާންގެ ފޯވާޑް ލައިން އިތުރަށް ވަރުގަދަވެގެން ދާނެ ކަމަށާއި، ބަޔާނުން ބޭނުންވާ އަމާޒަށް ވާސިލްވުމަށް ކޭން އަކީ މުހިންމު ކުޅުންތެރިޔަކަށް ވާނެ ކަމަށެވެ.
ބަޔާނަށް ސޮއި ކުރުމަށްފަހު ވާހަކަ ދައްކަމުން ކޭން ބުނީ، ދުނިޔޭގައި އޮތް އެންމެ ބޮޑު އެއް ކުލަބުގެ ކުޅުންތެރިޔަކަށްވުމީ އޭނާ އަށް ލިބޭ ވަރަށް ބޮޑު ޝަރަފެއް ކަމަށެވެ. ކޭން ބުނީ އަބަދު ވެސް ބޭނުން ވަނީ އާނާގެ ކެރިއަރުގައި ވާދަވެރި އަދި އެންމެ މަތީ ފަންތީގައި ކުޅުމަށް ކަމަށެވެ. އެހެންކަމުން ބަޔާން އަކީ އެކަމަށް ލިބުނު ފުރުސަތެއް ކަމަށާއި، މީގެ ކުރިން ވެސް އެ ކުލަބުން އެކަން ފެނުނު ކަމަށް އޭނާ ވަނީ ބުނެފަ އެވެ.
ކޭން ވަނީ ޓޮޓެންހަމަށް ކުޅެދިން 435 މެޗުގައި 280 ލަނޑު ޖަހައިފަ އެވެ. އޭނާ އަކީ ޓޮޓެންހަމަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ. މީގެ އިތުރުން އިނގިރޭސި ޕްރިމިއާ ލީގުގައި ޖަހާފައިވާ 213 ލަނޑާއެކު އޭނާ އަކީ އެ ލީގުގައި ދެ ވަނަ އަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ. ނަމަވެސް ކޭން އަށް ޓޮޓެންހަމާއެކު އެއްވެސް ކާމިޔާބެއް ހޯދިފައެއް ނުވެ އެވެ.
