ދިވެހިރާއްޖޭގެ މަތީ ތައުލީމާއި ތަމްރީނުގެ ގާނޫނާއި, އެ ގާނޫނުގެ ދަށުން ހަދާފައިވާ ގަވާއިދުތަކުގެ ދަށުން ދިވެހިރާއްޖޭގެ މަތީ ތައުލީމު ދޭ މަރުކަޒުތަކުން ދެމުން އަންނަ މަތީ ތައުލީމަކީ އެންމެ ފުރިހަމަ، އެކަށީގެންވާ މަތީ ތައުލީމުކަން ކަށަވަރުކުރުމުގެ ގޮތުންނާއި، މި ފަދަ މަރުކަޒުތަކުން ފޯރުކޮށްދެމުން އަންނަ މަތީ ތައުލީމުގެ ކޯސްތައް ފޯރުކޮށްދެމުން އަންނަނީ އެންމެ އެކަށީގެންވާ މާހައުލެއްގައި ކަން ކަށަވަރުކުރުމުގެ ގޮތުން އެ އޮތޯރިޓީން ކުރިއަށްގެންދާ، އިންސްޓިޓިއުޝަނަލް އޮޑިޓާ ގުޅޭގޮތުން މަތީ ތައުލީމު ދޭ ފަރާތްތަކަށް އަމާޒުކޮށްގެން ވޯރކްޝޮޕެއް ކުރިއަށްގެންގޮސްފިއެވެ.
މި ވޯރކްޝޮޕް ޝަރަފުވެރިކޮށް ދެއްވީ މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ހަސަންއެވެ. މިނިސްޓަރުގެ ވާހަކަފުޅުގައި، މަތީ ތައުލީމު ދޭ މަރުކަޒުތަކާއި އެމްކިއުއޭ، އަދި މިނިސްޓްރީ އޮފް ހަޔަރ އެޑިޔުކޭޝަނާއެކު ވީހާވެސް ގާތުން އެކުގައި މަސައްކަތްކުރުމަކީ މުހިއްމު ކަމެއްކަން ފާހަގަކުރެއްވިއެވެ. އަދި ގަވާއިދުތަކާއި އުސޫލުތައް ކިޔައިދީ، ހޭލުންތެރިކުރުމުގެ ގޮތުން މި ފަދަ ގިނަ ވޯރކްޝޮޕްތަކާއި ބައްދަލުވުންތައް ބޭއްވުމަކީ މުހިއްމު ކަމެއް ކަމަށް ވިދާޅުވިއެވެ.
މި ވޯރކްޝޮޕްގައި، އިންސްޓިޓިއުޝަނަލް އޮޑިޓާ ގުޅޭގޮތުން ސެޝަން ނަންގަވައިދެއްވާފައި ވަނީ އެމްކިއުއޭގެ ކޮންސަލްޓަންޓް ޕްރޮފެސަރު، ޑރ. ޖިއަންޝިން ޖާންއެވެ. ޕްރޮފެސަރ ޖިއަންޝިން ޖާންއަކީ އޭޝިއާ ޕެސިފިކް ކޮލިޓީ ނެޓްވޯރކް (އޭޕީކިއުއެން)ގެ ރައީސްކަން ޖެހިޖެހިގެން ދެ ދައުރު ފުރިހަމަކުރައްވާފައިވާ ބޭކަނބަލެކެވެ. ޕްރޮފެސަރ ޖިއަންޝިން ޖާންއަކީ މިހާރު އައްޔަން ކުރައްވާފައިވާ އޭޕީކިއުއެންގެ އެކްޒެކެޓިވް ކޮމިޓީގެ މެންބަރެއްގެ އިތުރުން، އެމެރިކާގެ ސީއެޗްއީއޭ އިންޓަރނޭޝަނަލް ކޮލިޓީ ގްރޫޕުގެ އެޑްވައިޒަރުކަމާއި ޔުނާން ހަޔަރ އެޑިޔުކޭޝަން އެސޯސިއޭޝަނުގެ ޖެނެރަލް ސެކްރެޓަރީކަމުގެ އިތުރުން، ޔުނާން ޔުނިވަރސިޓީގެ ރިސަރޗް ސެކްޓަރުގެ ޑިރެކްޓަރުކަން މިހާރު ކުރައްވަމުން އަންނަ ބޭފުޅެކެވެ.
ޕްރޮފެސަރ ޖިއަންޝިން ޖާން ނަންގަވައިދެއްވި ސެޝަންގައި އެމްކިއުއޭގެ އިންސްޓިޓިއުޝަނަލް އޮޑިޓުގެ ގައިޑްލައިނާއި މެނުއަލްއަކީ ބައިނަލްއަގުވާމީ މައިދާނަށް ބަލާއިރު ވަރަށް ފެންވަރު ރަނގަޅުކޮށް ހަދާފައިވާ ސްޓޭންޑަޑްތަކެއްކަން ފާހަގަކުރައްވައި، އެމްކިއުއޭގެ ނިޒާމުގެ ފުރިހަމަކަމަށް އިޝާރާތް ކުރެއްވިއެވެ. އަދި އިންސްޓިޓިއުޝަނަލް އޮޑިޓާ ބެހޭގޮތުން، މަތީ ތައުލީމު ދޭ މަރުކަޒުތަކުން ވިސްނައިގަތުން މުހިއްމު ވަރަށް ގިނަ ނުކުތާތަކެއް އޮޅުންފިލުއްވައިދެއްވިއެވެ.
މި ވޯރކްޝޮޕްގައި އެމްކިއުއޭގެ ސީއީއޯ، ޑރ. އަބްދުލް ހަންނާނު ވަހީދު ބައިވެރިވެވަޑައިގަތެވެ. ޑރ. އަބްދުލް ހަންނާނު ވަހީދުގެ ވާހަކަފުޅުގައި، މި ވޯރކްޝޮޕުގެ މުހިއްމުކަން ފާހަގަކުރައްވައި، މިފަދަ ވޯރކްޝޮޕެއް ނަންގަވައިދެއްވުމަށް ކަމާ ގުޅުންހުރި ގާބިލު މާހިރަކު ހުރުމަކީ މި ވޯރކްޝޮޕް އިތުރަށް ފުރިހަމަވެގެން ގޮސްފައިވާ ކަމެއް ކަން ފާހަގަކުރެއްވިއެވެ. އަދި މި ވޯރކްޝޮޕުގެ ސަބަބުން، ރާއްޖޭގައި މަތީ ތައުލީމުދޭ މަރުކަޒުތަކަށް އިންސްޓިޓިއުޝަނަލް އޮޑިޓާ ގުޅުންހުރި ގިނަ މައުލޫމާތުތަކެއް ލިބިގެން ގޮސްފައިވާކަން ފާހަގަކުރެއްވިއެވެ.
