ރާއްޖެއިން ބޭރުން ހާސިލު ކުރާ ސަނަދުތަކަކީ މޯލްޑިވްސް ކޮލިފިކޭޝަނސް އޮތޯރިޓީ (އެމްކިޔުއޭ) އިން ގަބޫލު ކުރާ ސަނަދުތަކެއްކަން ޔަގީންކުރަން މުއައްސަސާތަކަށާއި ސަނަދު ހާސިލުކުރާ ފަރާތްތަކަށް އިލްތިމާސްކޮށްފިއެވެ.
އެމްކިޔުއޭއިން މިގޮތަށް އިލްތިމާސްކޮށްފައިވަނީ ހޯމަ ދުވަހު އިސްލާހުކޮށް އާއްމު ކުރި މަތީ ތަޢުލީމާއި ތަމްރީނުގެ ސަނަދުތައް ޤަބޫލުކުރުމާ ގުޅޭ އުސޫލުގައެވެ. އެ އުސޫލުގައި އެ އޮތޯރިޓީން ބުނީ ދިވެހިރާއްޖޭގައި މަތީ ތަޢުލީމާއި ތަމްރީނުގެ ސަނަދުތައް ގަބޫލުކުރުމަކީ، "ދިވެހިރާއްޖޭގެ މަތީ ތަޢުލީމާއި ތަމްރީނުގެ ޤާނޫނު" ގެ ހަތް ވަނަ މާއްދާގެ (ބ) އާއި، އެ ޤާނޫނުގެ 19 ވަނަ މާއްދާގެ ދަށުން އެ އޮތޯރިޓީއާ ޙަވާލުކުރެވިފައިވާ ޤާނޫނީ ޒިންމާއެއް ކަމަށެވެ. އެހެންކަމުން އެކި ފަރާތްތަކުން ހާސިލުކުރާ ސަނަދުތަކަކީ، އެ އޮތޯރިޓީން ޤަބޫލުކުރާ ސަނަދުތަކަކަށް ވާންޖެހޭނެ ކަމަށް ވަނީ ބަޔާންކޮށްފައެވެ.
އެމްކިޔުއޭއިން ބުނީ ރާއްޖެއިން ބޭރުން ހާސިލުކުރާ މަތީ ތަޢުލީމުގެ ސަނަދުތަކަކީ، އެ އޮތޯރިޓީ އަށް ހުށަހަޅައިގެން އެ އޮތޯރިޓީން ޤަބޫލުކޮށް، އެކަމަށް ހާއްސަ އެ އޮތޯރިޓީގެ ތައްގަނޑު ޖަހައި، ވެލިޑޭޓްކޮށްފައިވާ ސަނަދުތަކަކަށް ވާންޖެހޭނެ ކަމަށެވެ. އަދި ސަރުކާރުގެ އެކި އިދާރާތަކުން ވަޒީފާ ދިނުމުގައި ބަލައިގަންނަނީ އެގޮތަށް އެ އޮތޯރިޓީން ޤަބޫލުކޮށްފައިވާ ސަނަދުތައް ކަން ވެސް ވަނީ ފާހަގަކޮށްފައެވެ.
އެމްކިޔުއޭއިން ޤަބޫލުކުރާ ސަނަދެއްކަން ކަށަވަރުނުކޮށް ބައެއް ސަނަދުތަކުގެ މަޢުލޫމާތު އެކި ގޮތްގޮތަށް ހާމަކުރަމުންދާކަން ފާހަގަކުރެވިފައިވާކަމަށާއި މިފަދަ ސަނަދުތަކުގެ ތެރޭގައި ގަބޫލު ނުކުރާ ކަމަށް އާއްމުކޮށް އިއުލާންކޮށްފައިވާ ސަނަދުތަކާއި، ސަނަދުތައް ގަބޫލުކުރުމުގެ އުސޫލުތަކުގެ ދަށުން އެކި ސަބަބުތަކާ ހެދި އެ އޮތޮރިޓީ އަށް ޤަބޫލުނުކުރެވޭ ފަދަ ސަނަދުތައް ވެސް ހިމެނޭ ކަމަށް އެ އޮތޯރިޓީން ބުނެއެވެ. އެހެންކަމުން މުއައްސަސާތަކުންނާއި، ސަނަދު ހާސިލުކުރާ ފަރާތްތަކުން އެ ކަންކަމަށް ހާއްސަ ސަމާލުކަމެއް ދިނުމަށް އެ އޮތޯރިޓީން ވަނީ އިލްތިމާސްކޮށްފައެވެ.
