އަމާޒަކީ މަތީ ތައުލީމުގެ ފެންވަރު ބެލުމާ ގުޅޭ ކަންކަމުގައި ހުރި ބާގަނޑުތައް ބެއްދުން: އެމްކިއުއޭ
15 ޑިސެމްބަރު 2022 | ބުރާސްފަތި 07:02ޤަވާއިދުތަކާއި އުސޫލުތައް ފާއިތުވި ދުވަސްތަކުގައި ހެދިފައިވޭ
އެމްކިއުއޭގެ ސީއީއޯ ޑރ އަބްދުލް ހަންނާން
އަމާޒަކީ މަތީ ތައުލީމުގެ ފެންވަރު ބެލުމާ ގުޅޭ ކަންކަމުގައި ހުރި ބާގަނޑުތައް ބެއްދުންކަމަށް މޯލްޑިވްސް ކޮލިފިކޭޝަން އޮތީރިޓީ (އެމްކިއުއޭ) އިން ބުނެފިއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން އެމްކިއުއޭގެ މިހާރުގެ ސީއީއޯ ޑރ އަބްދުލް ހަންނާން ވަހީދު ވިދާޅުވީ، މަތީ ތައުލީމުގެ ފެންވަރު ބެލުމާ ގުޅޭ ކަންކަމުގައި ހުރި ބާގަނޑުތައް ބައްދައި، އެކަންކަން ޙައްލު ކުރުމުގެ މަސައްކަތް އެމްކިއުއޭއިން ކުރަމުންދާ ކަމަށެވެ.
ހަންނާން ވިދާޅުވީ، ދިވެހިރާއްޖޭގެ މަތީ ތައުލީމާއި ތަމްރީނު ދިނުމުގެ ޤާނޫނުގެ ދަށުން އެމްކިއުއޭގެ އެކި މަސައްކަތްތަކާއި ގުޅޭ ޤަވާއިދުތަކާއި އުސޫލުތައް ފާއިތުވި ދުވަސްތަކުގައި ހެދިފައިވާ ކަމަށެވެ. އެގޮތުން ޕްރޮގްރާމް އެކްރެޑިޓޭޝަން ޤަވާއިދާއި ގައިޑްލައިންގެ އިތުރުން، އިސްޓިޓިއުޝަނަލް އޮޑިޓުގެ ޤަވާއިދާއި ގައިޑްލައިން ހެދުމުގެ މަސައްކަތް ކުރިއަށް ގެންދެވިފައިވެއެވެ.
އޭގެ ތެރެއިން ޕްރޮގްރާމް އެކްރެޑިޓޭޝަން ގައިޑްލައިން މިހާރު ހެދުމުގެ މަގުމަތީގައިވާކަން ހަންނާން ފާހަގަ ކުރެއްވިއެވެ. އެގޮތުން މިހާރު އެ ގައިޑްލައިން ރައީސް އޮފީހަށް ފޮނުވާފައިވާކަމަށް އޭނާ ވިދާޅުވިއެވެ.
އޭގެ އިތުރުން، އެމްއެންކިއުއެފްގެ އަމަލު ކުރުމާ ގުޅޭ ޤަވާއިދާއި، ސަނަދުގެ ފެންވަރު ބެލުމާ ގުޅޭ ޤަވާއިދުގެ އިތުރުން، ރާއްޖެއިން ބޭރުގެ ޑޮކްޓަރަލް ޑިގްރީ ޤަބޫލު ކުރުމުގެ އުސޫލުވެސް މިހާރު ވަނީ ނިންމައި ދިވެހި ސަރުކާރުގެ ގެޒެޓުގައި ޝާއިއު ކޮށްފައެވެ.
ހަންނާން ވިދާޅުވީ، އީ-ލަރނިން ނުވަތަ ޑިސްޓެންސް އެޑިއުކޭޝަން މެދުވެރިކޮށް ތައުލީމު ޙާސިލުކޮށްގެން ހޯދާ ޕީއެޗްޑީ ޤަބޫލު ކުރުމުގައިވެސް ވަކި އުސޫލުތަކެއް ހުންނަ ކަމަށެވެ. އެކަމާ ގުޅޭ ކަންކަން ރާއްޖެއިން ބޭރުގެ ޑޮކްޓަރަލް ޑިގްރީ ޤަބޫލު ކުރުމުގެ އުސޫލުގައި ބަޔާންކޮށްފައިވާނެކަމަށް ހަންނާން ވިދާޅުވިއެވެ.
އެެހެންނަމަވެސް، އީ-ލަރނިންގ މެދުވެރިކޮށް ޕީއެޗްޑީ ހަދާނަމަ، އެ ޕްރޮގްރާމަކީ މަދުވެގެން 5 އަހަރުގެ ޕްރޮގްރާމަކަށް ވާން ޖެހޭނެކަމަށްވެސް އޭނާ ވިދާޅުވިއެވެ.
އެހެންނަމަވެސް، ޔުނިވަރސިޓީއަށް ފުރިހަމައަށް ހާޒިރުވެގެން ތައުލީމު ޙާސިލުކުރާނަމަ، ޕީއެޗްޑީގެ 3 އަހަރުގެ ޕްެރޮގްރާމް އެމްކިއުއޭއިން ޤަބޫލު ކުރާނެކަމަށް ހަންނާން ވިދާޅުވިއެވެ.
ހަންނާން ވިދާޅުވީ، ބައެއް ފަރާތްތަކުން އޮޅުވާލައިގެން އެ ތަފްސީލުތައް އެމްކިއުއޭއާ ހިއްސާކުރާ ކަމަށެވެ. ވުމާއެކު، އެމްކިއުއޭއިން އިތުރަށް ކަންކަން ބަލައި ކަށަވަރު ކުރާކަމަށް އޭނާ ވިދާޅުވިއެވެ.
އޭގެ އިތުރުން، ކީރިތި ޤުރުއާނާ ބެހޭ ތައުލީމީ ޕްރޮގްރާމްތަކުގައި ހުންނަންޖެހޭ މިނިމަމް ސްޓޭންޑަރޑްއާ ގުޅޭ އުސޫލަށް އިސްލާހުތަކެއް ގެނައުމުގެ މަސައްކަތް ކުރަމުންދާކަންވެސް އޭނާ ފާހަގަ ކުރެއްވިއެވެ.
މަތީ ތައުލީމުގެ ފެންވަރާއި ގުޅޭ ގިނަ އުސޫލުތަކާއި، ޤަވާއިދުތަކާއި ގައިޑްލައިންތައް މިހާރު ގެޒެޓުކޮށް އަމަލުކުރަން ފެށިފައިވާކަން ފާހަގަ ކުރައްވައި ހަންނާން އިތުރަށް ވިދާޅުވީ، އެކަންކަން ތަންފީޒު ކުރަން ފެށުމުން ދިވެހިރާއްޖޭގެ މަތީ ތައުލީމުގެ ފެންވަރު ބެލުމުގެ ޤާނޫނުގެ ރޫހުގައި، މަތީ ތައުލީމުގެ ފެންވަރު ކަށަވަރު ކުރުމުގެ މަސައްކަތް ކުރިއަށްވުރެ ހަރުދަނާ ގޮތެއްގައި ކުރެވޭނެ ކަމަށެވެ.
