ކޮލެޖު، ޔުނިވާސިޓީތަކުން ހިންގާ ޕްރޮގްރާމުތައް ކޮންމެ 5 އަހަރަކުން އެކްރެޑިޓްކުރަންޖެހޭނެ: ހަންނާން
މިއީ ޕްރޮގްރާމުތަކުގެ ކޮލިޓީ ވަޒަންކުރުމަށް ފަށާފައިވާ މަސައްކަތެއް
ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީ ބައްދަލުވުން
މިހާރު ރާއްޖޭގައި މަތީ ތައުލީމާއި ތަމްރީނުދޭ މަރުކަޒުތަކުން ހިންގާ ޕްރޮގްރާމްތައް ކޮންމެ 5 އަހަރަކުން އެކްރެޑިޓްކުރަންޖެހޭނެ ކަމަށް މޯލްޑިވްސް ކޮލިފިކޭޝަން އޮތޯރިޓީގެ ސީއީއޯ ޑރ. އަބްދުލް ހަންނާން ވަހީދު ވިދާޅުވެއްޖެއެވެ.
ޑރ، އަބްދުލް ހަންނާން މިފަދައިން ވިދާޅުވީ އަންގާރަ ދުވަހު ގައުމީ ތަރައްގީއާއި ތަރިކައިގެ ކޮމިޓީ ބައްދަލުވުމަށް ހާޒިރުވެވަޑައިގެން މެމްބަރަކު ކުރެއްވި ސުވާލަކަށް ޖަވާބުދެއްވަމުންނެވެ. މި ކޮމިޓީ ބައްދަލުވުމުގައި ހަޔަރ އެޑިއުކޭޝަން މިނިސްޓަރާއި، ހަޔަރ އެޑިއުކޭޝަން މިނިސްޓްރީގެ އިސް ބޭބޭފުޅުން ބައިވެރިވެވަޑައިގެންނެވިއެވެ.
މަތީ ތައުލީމާއި ތަމްރީނުދޭ މަރުކަޒުތަކުން ހިންގާ ކޯސްތަކުގެ ފެންވަރު ވަޒަންކުރުމާއި ގުޅޭގޮތުން ކުރެވުނު ސުވާލަށް ޖަވާބުދެއްވަމުން ހަންނާން ވިދާޅުވީ ރާއްޖޭގައި ހިންގާ އެއްވެސް ޕްރޮގްރާމެއް އެމްކިއެއޭގެ އެކްރެޑިޓޭޝަން ނުލިބި ނުހިންގޭނެ ކަމަށެވެ. މީގެ ކުރިން މިކަން ކުރަމުންދިޔައީ ޕްރޮގްރާމުތައް އެޕްރޫވްކޮށްގެން ކަމަށާއި، އަދި އެއަށްފަހު އިތުރަށް އެ ޕްރޮގްރާމެއްގެ ފެންވަރެއް ނުބަލާނެ ކަމަށެވެ. މިހާރު ކޮންމެ 5 އަހަރަކުން އެ ޕްރޮގްރާމްތައް އެކްރެޑިޓް ކުރަންޖެހޭނެ ކަމަށާއި. 5 އަހަރުގެ މުއްދަތު ހަމަވާން 6 މަސް ދުވަހަށްވުމުން އެކްރެޑިޓޭޝަން އައުކުރަން ހުށަހަޅަންޖެހޭނެ ކަމަށް ހަންނާން ވިދާޅުވިއެވެ.
މިގޮތަށް ބަދަލު ގެނެސްފައިވަނީ ޕްރޮގްރާމުތަކުގެ ކޮލިޓީ ރަނގަޅުކުރުމަށް ކަމަށް ހަންނާން ވިދާޅުވިއެވެ. މި ބަދަލާއެކު ކޮންމެ 5 އަހަރަކުން ޕްރޮގްރާމުގެ ކޮލިޓީ ރަނގަޅުކުރަން މަޖުބޫރުވާނެ ކަމަށް އޭނާ ވިދާޅުވިއެވެ.
ހަންނާން ވިދާޅުވީ މި ޕްރޮގްރާމުތަކަކީ މޮނިޓަރކުރެވިގެން ހިންގޭ ޕްރޮގްރާމުތަކެއް ކަމަށެވެ. އަދި ކުރިއަށްއޮތްތަނުގައިވެސް މިކަން އިތުރަށް ރަނގަޅުކުރެވިގެންދާނެ ކަމަށް ހަންނާން ވިދާޅުވިއެވެ.
