މާޔާ: އަހަށް ޖެހުނު ލޯތްބަކުން އެ މިސްރާބަށް އެތައް ހިތެއް ލަންބުވާލި އުޚްތާ!

ފެންނަމުން އެ ދަނީ މެދުއިރުމަތީގެ އަރަބި، އިސްލާމީ ގައުމެއްގެ އަދުގެ ވެށިން ފެނުން މާ އާންމު މަންޒަރެކޭ ނުދެންނެވޭނެއެވެ. ކޮންމެ ސަބަބަކާ ހެދި ކަމުގައި ވީނަމަވެސް، އެ ގައުމުތަކުގައި ދެ ޖިންސުގެ ހަމަހަމަކަން، އޭގެ އެންމެ އިންތިހާއަށް ގެއްލި ދިޔަ ދުވަސްތަކެއްވެސް ތަޖުރިބާކުރިކަމީ ގަބޫލުކުރަން ޖެހޭ ހަގީގަތެކެވެ. ނަމަވެސް، ދީނުގެ ކަންކަމަށް މީހުންގެ މެދުގައި އޮންނަ ހޭލުންތެރިކަން އިތުރުވަމުން ދާވަރަކަށް، ދީނުގެ ނަމުގައި އޮތް ބިދުއަތައް ދޫކޮށް، އާންމު ދިރިއުޅުމައިގެން ކުރިއަށް ދިއުމުގެ އާދަތައް މިހާރު ވަނީ މަޑުމަޑުން ފެންނަން ފަށާފައެވެ.

ފަލަސްތީނުގެ ހުޅަނގު އައްސޭރީގެ އަވަށަކުންވެސް ފެނިގެން އެ ދަނީ ހަމަ އެ ފަދަ މަންޒަރެކެވެ. މާޔާ އަޔާދީއަކީ އަސްދުއްވުމުގެ ހުނަރު ދަސްކޮށްދިނުމުގެ ރޮނގުން އަރާ ހުރި އިންސްޓްރަކްޓަރެކެވެ. ދުރު ރާސްތާތަކަށް، ސާބިތުކަމާއެކު އަހުގައި ދުއްވާ، ކުޅަދާނަ ޒުވާނެކެވެ. މިއީ މިފަދަ އަވަށަކުން ފެނުން ނާދިރު މަންޒަރެއް ކަމުން، ކެމެރާގެ ލެންސު މާޔާއަށް އަމާޒުވިއެވެ.

މާޔާގެ ހިތުގައި، އަސް ދުއްވުމުގެ ޝައުގުވެރިކަން އުފެދެން ފެށީ އޭނާގެ އުމުރުން ވަރަށް ޅައިރުއެވެ. އަސްތަކެއް ފެނި އެންމެ ފުރަތަމަ އެ އަސްތައް ދެކެ ބިރުގަތް މާޔާގެ ފޮނި ހުވަފެންތަކަކަށް އެ އަސްތައް ބަދަލުވިއެވެ. އޭނާގެ ގަދަ ހިތްވަރާއި ސާބިތުކަމުގެ ސަބަބުން، އެ ހުވަފެންތަކުގައި ހަގީގީ ކުލަވެސް ޖެއްސީއެވެ.

އަސް ދުއްވުމުގެ މައިދާނުގައި މާޔާއަށް ލިބޭ އެންމެ ބޮޑު ހިތްވަރަކަށް ވަނީ އޭނާގެ ބޭބެ، މުންތަސިރު އަޔާދީއެވެ. މުންތަސިރަކީ، އަސް ދުއްވުމާއި އަސް ރޭސް ޖެހުމަށް ޚާއްސަ ކުލަބެއްގެ ވެރިއެކެވެ. އަސް ދުއްވަން ބޭނުންވާނެ ހުރިހާ ހުނަރެއް މާޔާ ދަސްކުރީ އޭނާގެ ބޭބެ ގާތުންނެވެ. އެވަރުން ފުއްދާލީއެއް ނޫނެވެ. އަސް ދުއްވަން ދަސްކޮށްދޭ އިންސްޓްރަކްޓަރަކަށް ވެސް ވީއެވެ. ބޭބެގެ ކުލަބަށް އަންނަ އަންހެނުންނާއި، ދެޖިންސުގެ ކުޑަކުދިންނަށް އަސް ދުއްވަން ދަސްކޮށްދެނީ މާޔާއެވެ.

މެދުއިރުމަތީގެ ބައެއް ގައުމުތަކުގެ ގަބޫލުކުރުންތަކާއި ސަގާފަތް އޮންނަގޮތުން، އަސް ދުއްވުމާއި އަސް ރޭސް ޖެހުމަކީ ފިރިހެނުންނަށް ޚާއްސަ ކަމެކެވެ. ނަމަވެސް އެއީ އިސްލާމީ ތާރީޚާ ގުޅިފައި އޮތް ކަމެއް ނޫނެވެ. އިސްލާމީ ތާރީޚުގައި އަސް ދުއްވަން ކުޅަދާނަ، އަދި އަސް ރޭސް ޖައްސަވާ އެތައް ކަނބަލުންނެއްގެ ނަންފުޅުތައް ފާހަގަކުރެވެއެވެ.

މާޔާގެ ހިތްވަރާއި މަސައްކަތް ފެނި، ހުޅަނގު އައްސޭރީގެ އަންހެނުންގެ މެދުގައިވެސް އަސް ދުއްވުމުގެ ޝައުގުވެރިކަން ދަނީ އިތުރުވަމުންނެވެ. ދަރިންނަށް އަސް ދުއްވަން ދަސްކޮށްދޭން ބޭނުންވާ މީހުންގެ އަދަދު ދަނީ އިތުރުވަމުންނެވެ. ވަކިން ޚާއްސަކޮށް، ކުޅިވަރެއްގެ ގޮތުގައި އަންހެން ދަރިންނަށް އަސް ދުއްވަން ދަސްކޮށްދޭން ބޭނުންވާ މީހުންގެ އަދަދު ދަނީ އިތުރުވަމުންނެވެ.