ކެޕްޓަން މޮޅު، ތަށި ހޯދަން ބޭނުންވަނީ މޮޅު ޓީމެއް

އިންޑިޔާގެ މިހާރުގެ ކްރިކެޓް ކެޕްޓަން ރޯހިތް ޝަރުމާއަކީ މޮޅު ކެޕްޓަނެއް ކަމަށާއި ނަމަވެސް ވޯލްޑްކަޕް ކާމިޔާބުކުރުމަށް އޭނާ އަށް ރަނގަޅު ޓީމެއް ބޭނުންވާ ކަމަށް އިންޑިޔާގެ ކްރިކެޓް ލެގެންޓް ޔުވަރާޖް ސިންގް ބުނެފި އެވެ.

2011 ވަނަ އަހަރުގެ ވޯލްޑްކަޕް އިންޑިޔާ އަށް ހޯދައިދިން ޓީމުގެ މުހިންމު ދައުރެއް އަދާކުރި ޔުވަރާޖް ބުނީ އަމިއްލަ ގައުމުގައި އަންނަ އޮކްޓޫބަރު މަހު ވޯލްޑްކަޕް ބާއްވާއިރު ކެޕްޓަންގެ މޮޅުކަން ފެންނާނީ މޮޅު ޓީމެއް ވެސް އޮވެގެން ކަމަށެވެ. އަދި 2011 ވަނަ އަހަރު ކެޕްޓަން މަހެންދްރް ސިންގް ދޯނީއަށް ލިބުނީ މޮޅު ޓީމެއް ކަމަށެވެ.

އޭނާ ބުނީ މިހާރުގެ ކެޕްޓަން ރޯހިތް ޝަރުމާއަކީ ވެސް މޮޅު ކެޕްޓަނެއް ކަމަށާއި ނަމަވެސް ވޯލްޑްކަޕް ކާމިޔާބުކުރުމަށް ޓީމު ވަރުގަދަވާންޖެހޭ ކަމަށެވެ.

ނަމަވެސް މައްސަލައަކީ ގާތްގާތުގައި އަނިޔާގެ މައްސަލަދިމާވުން ކަމަށާއި މުޅި ޓީމު ފިޓްކޮށް އޮތުމުގެ މުހިންމުކަން އޭނާ ފާހަގަކުރި އެވެ. ޔުވަރާޖް ބުނީ 10 އަހަރު މުހިންމު މުބާރާތެއްގެ ތަށި ނުލިބި އިންޑިޔާ އޮތުމަކީ އޭނާ އަށް ގަބޫލުކުރަންދަތި ކަމެއް ކަމަށެވެ.