އިންތިޚާބުގެ ފޯރިއެއް ނެތް، އޮތީ އެތެރޭގެ ކޯޅުންތައް!

ރާއްޖޭގައި ކޮންމެ ފަސް އަހަރަކުން އެއް އަހަރު ބާއްވާ އެންމެ ބޮޑު އިންތިޚާބަށް ބާކީ މިއޮތީ މަހެއްހާ ދުވަހެވެ. މި އިންތިޚާބަކީ ކުރިއަށް އޮތް ފަސް އަހަރަށް މި ޤައުމު ހިންގާނެ ވެރިއަކު ހޮވުމަށް ބާއްވާ އިންތިޚާބަށްވާއިރު މިއީ ކޮންމެ ރައްޔިތަކަށް ވެސް މުހިންމު އިންތިޚާބެކެވެ. ނަމަވެސް ފެންނަނީ އެ މަންޒަރެއް ނޫނެވެ. އިންތިޚާބަށް ކުޑަ ދުވަސްކޮޅަކަށްވެފައިވާއިރު އޭގެ އަސަރެއްވެސް ފެންނަން ނެތޭ ބުނުން ދޮގަކަށް ނުވާނެއެވެ.

މީގެ ކުރިން ރިޔާސީ އިންތިޚާބުގެ އަހަރު އެއްކޮށްހެން މުޅި ރާއްޖޭގައި ފެންނަނީ ވާދަވެރިކަމެވެ. ކުރިމަތިލާން ބޭނުންވާ ކެންޑިޑޭޓުން އެކަން އިއުލާންކުރުމާއެކު އެ ބޭފުޅަކަށް ތާއީދު ކުރާ ބަޔަކު އެ ބޭފުޅެއްގެ ޖަގަހަތައް ނަލަކޮށް، ރަށުތެރޭގައި ފޯރިއާއެކު ކެމްޕޭނު ފަށައިގަނެއެވެ. 2008، 2013 އަދި 2018 ގައި ވެސް މި މަންޒަރު ފެނުނެވެ. މާލޭގައި ވެސް ޕޯސްޓަރު ހަރުކުރުމާއި ކެންޑިޑޭޓުންގެ ކުލައިގެ ފޮތިތަކުން މަގުތައް ޖަރީކުރުމަކީ އިންތިޚާބެއް ކުރިއަށް އޮތްކަން އަންގައިދިން ކަންކަމެވެ. އިންތިޚާބުގެ ފޯރި އޮތްކަން އަންގައިދިން ކަންކަމެވެ.

މިފަހަރުގެ މަންޒަރު ތަފާތެވެ. އިންތިޚާބަށް މަހަކަށްވެފައިވާއިރު ބައެއް ޕާޓީތަކުގައި ވާދަކުރުމާމެދު އޮތީ ސުވާލު އުފެދިފައެވެ. ބައެއް ޕާޓީތަކަށް އަދިވެސް ކެންޑިޑޭޓުން ނުދެއްކެއެވެ. ބައެއް ޕާޓީތަކުން ދައްކަނީ އިތުރު ގޮތެއް ނެތިގެން ނެރޭ ކެންޑިޑޭޓުންނެވެ. މިކަންކަމާހެދި ރައްޔިތުން ވެސް ތިބީ ވާނުވާއެއްގެ ތެރޭގައެވެ. ވާދަ ކުރާ ބަޔަކާ ނުކުރާ ބަޔަކު އެނގޭނީ ވޯޓު ކަރުދާސް އަތަށް އެރުމުން ކަމަށް ބައެއް ފަރާތްތަކުން މަޖާޒީ ގޮތަކަށް ބުނަމުންދެއެވެ.

ވާދަ ކުރާ ކެންޑިޑޭޓުން ނުދެއްކޭއިރު ބައެއް ޕާޓީތަކުގައި މިހާރު އޮތީ އެތެރޭގެ ކޯޅުންގަނޑެވެ. އިތުރު "ޗޮއިސް" އެއް ނެތިގެން ނެރޭ ކެންޑިޑޭޓުންނާ މެދު ޕާޓީތަކުގެ މެމްބަރުން ހިތްހަމަނުޖެހި ދަނީ އެ ނިންމުންތައް ބަދަލު ކުރުމަށް ގޮވާލަމުންނެވެ. އަނެއްބަޔަކު މަސައްކަތް ކުރަނީ ވަކި ބޭފުޅަކަށް އިންތިޚާބު ކާމިޔާބުވިޔަ ނުދިނަމަށެވެ. އެހެންވެ ކޮންމެ ގޮތެއް ހަދާފައިވެސް އެކަން ކުރުމަށް ޕްލޭން އޭއިން ފެށިގެން ޕްލޭން ޒެޑާ ހަމައަށް "ވަރކް" ކުރޭތޯ ބަލަނީއެވެ.

މިއަހަރުގެ ރިޔާސީ އިންތިޚާބުގައި ކެމްޕޭނުގެ ހަރަކާތްތައް ހިންގަނީ ވެރިކަން ކުރާ މައި ޕާޓީ، އެމްޑީޕީންނޭ ބުނުން ދޮގަކަށް ނުވާނެއެވެ. އެ ޕާޓީގެ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ގެންދަވަނީ ރާއްޖޭގެ ރަށްތަކަށް ވަޑައިގެން އަމިއްލަފުޅަށް ރައްޔިތުންނާ ބައްދަލު ކުރައްވައި ކެމްޕޭން ކުރައްވަމުންނެވެ. އެހެންމީހަކު ނުހޮވުމަށްވުރެ ބޮޑަށް އެމަނިކުފާނަށް ދެވަނަ ދައުރެއް ދޭން ޖެހޭ ސަބަބުތައް ރައްޔިތުންނަށް ގެންދަވަނީ ކިޔައިދެއްވަމުންނެވެ.

އިންތިޚާބެއްގެ ފޯރިއަކީ އެންމެ ކެންޑިޑޭޓެއް ކުރާ މަސައްކަތުން ފެންނާނެ އެއްޗެއް ނޫނެވެ. މިއަށްވުރެ ބޮޑަށް ވާދަވެރިކަން ފެންނަ ޖެހެއެވެ. ބައެއް ކެންޑިޑޭޓުންގެ ޕާޓީތަކުން ކެމްޕޭން ކުރުމަށް ރަށްތަކަށް ޒިޔާރަތް ކުރި ނަމަވެސް ކެންޑިޑޭޓު ފެންނާކަށް ނުހުރެއެވެ.

މި އިންތިޚާބުގައި ޕާޓީތަކުގެ ފޯރީގެ އިތުރުން އިތުރުން ރައްޔިތުންގެ ތަރުހީބުވެސް ކުޑައެވެ. އެކަން އެނގިގެންދިޔައީ ރަށްވެހިވެފައިވާ ރަށް ނޫން އެހެން ރަށްތަކުގައި ވޯޓުލާނަމަ ރީ ރަޖިސްޓްރީ ކުރަން ހުޅުވާލި ފުރުސަތުގައެވެ. މަދު ބަޔަކު ރީ ރަޖިސްޓްރީކޮށްފައިވާއިރު އެއްބަޔަކު ރަޖިސްޓްރީކުރަން ބޭނުން ނުވަނީއެވެ. ވޯޓުލާން ވެސް ބޭނުން ނުވަނީއެވެ. ނަމަވެސް މިއީ ތިމާ އާއި ތިމާގެ ދަރިން އަދި އާއިލާގެ ކުރިމަގަށް ވެސް މުހިންމު ނިންމުމެއްކަން ވިސްނަން އެބަޖެހެއެވެ. ވޯޓުލުމުގެ ޙައްގަކީ 18 އަހަރުން މަތީގެ ކޮންމެ ދިވެހި ރައްޔިތަކަށް ލިބިގެންވާ ޙައްގަކަށްވާއިރު އެ ޙައްގުގެ ބޭނުން ރަނގަޅަށް ކުރަން ޖެހެއެވެ.

މި އިންތިޚާބަށް ވުރެ އެންމެ ފަހުން ނިމުނު ލޯކަލް ކައުންސިލް އިންތީޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިޚާބު ވެސް މާ ފޯރިގަދަކަން ފާހަގަކޮށްލެވެއެވެ.