ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭއާ ޖެހިފައިވާ މައްސަލައިގައި މިހާތަނަށް އެއްވެސް ހައްލެއް ހޯދިފައި ނުވާ ކަމަށް މީޑިއާތަކުން ބުނެފި އެވެ.
ފްރާންސްގެ މީޑިއާތަކުގައި ބުނެފައިވާ ގޮތުން އެމްބާޕޭ ޖެހިފައިވާ މައްސަލަ ހައްލު ކުރުމަށް ޕީއެސްޖީން ވަނީ "ހުރިހާ މަގަކުން" ހިނގައިފަ އެވެ. ނަމަވެސް އެކަމުގައި މިއަދާ ހަމައަށް އެއްވެސް ހައްލެއް ލިބިފައި ނުވެ އެވެ. ޕީއެސްޖީ އާއެކު އެމްބާޕޭ އެންމެ ފަހުން ސޮއި ކުރި ދެ އަހަރު ދުވަހުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. އެހެންކަމުން އެމްބާޕޭ ބޭނުންވަނީ ކުރިއަށް އޮތް ސީޒަނުގައި ޕީއެސްޖީ އަށް ކުޅުމަށްފަހު، އެއްބަސްވުމުގެ މުއްދަތު ހަަމަވުމުން ސްޕެއިންގެ ރެއާލް މެޑްރިޑަށް ބަދަލުވާށެވެ. އެކަމަށްޓަކައި އެމްބާޕޭ ވަނީ ރެއާލާއެކު މަޝްވަރާކޮށްފައި ކަމަށް ވެސް މީޑިއާތަކުން ބުނެ އެވެ. ނަމަވެސް މޮޅު ކުޅުންތެރިޔަކު ހިލޭ ޓްރާންސްފާއެއްގައި ދޫކޮށްލުމަކީ ޕީއެސްޖީން ބޭނުންވާ ގޮތެއް ނޫނެވެ. އެހެންވެ ޕީއެސްޖީ އާއި އެމްބާޕޭއާ ދެމެދު ވަނީ މައްސަލަ ޖެހިފަ އެވެ.
ޕީއެސްޖީން އެމްބާޕޭ އަށް ދިނީ ދެ ފުރުސަތެކެވެ. އެއް ފުރުސަތަކީ ކުލަބުގެ އެއްބަސްވުން އައު ކުރުމެވެ. ނޫން ނަމަ، އެއްބަސްވުމުގެ މުއްދަތު ހަމަވުމުގެ ކުރިން އެހެން ކުލަބަކަށް ބަދަލުވުމެވެ. އެ މައްސަލައިގަައި ޕީއެސްޖީން ޖަޕާނަށް ކުރި ދަތުރުން ވެސް އެމްބާޕޭ ވަނީ ބާކީކޮށްފަ އެވެ. މީގެ އިތުރުން އެއްބަސްވުން އައުނުކުރާ ނަމަ، ކުރިއަށް އޮތް ސީޒަނުގައި އެމްބާޕޭ އަށް ކުޅުމުގެ ފުރުސަތު ނުދިނުމަށް ވެސް ޕީއެސްޖީ އޮތީ ތައްޔާރަށް ކަމަށް މީޑިއާތަކުން ބުނެ އެވެ.
މައްސަލަ ބޮޑުވެފައި ވަނިކޮށް ދާދި ފަހުން ވެސް ޕީއެސްޖީން ވަނީ އެކަން ހައްލު ކުރުމަށް މަސައްކަތް ކޮށްފަ އެވެ. އެގޮތުން 2024 ވަނަ އަހަރުގެ ހޫނު މޫސުމުގެ ގެރެންޓީޑް ސޭލް ކްލޯޒާއެކު، އައު އެއްބަސްވުމެއް ވަނީ އޭނާ އަށް ހުށަހަޅައިފަ އެވެ. ނަމަވެސް އެމްބާޕޭ ވަނީ އެ ހުށަހެޅުން ވެސް ބަލައި ނުގަންނަން ނިންމާފައި ކަމަށް މީޑިއާތަކުން ބުނެ އެވެ. އެހެންކަމުން އެމްބާޕޭ ހަމައެކަަނި ބޭނުންވަނީ ރެއާލަށް ބަދަލުވާން ކަމަށް ޕީއެސްޖީން ވެސް ޤަބޫލު ކުރެ އެވެ. ފްރާންސްގެ މީޑިއާތަކުގައި ބުނެފައިވާ ގޮތުން ޕީއެސްޖީން، އެ ހުށަހެޅުން ހުށަހެޅުމުގެ ކުރިން އެ ކުލަބުގެ ރައީސް ނާސިރު އެލް ޚެއްލާފީ ވަނީ ވަކިން އެމްބާޕޭއާ ބައްދަލު ވެސް ކޮށްފަ އެވެ.
އެމްބާޕޭ ހޯދުމުގެ މަސައްކަތް މީގެ ކުރިން ވެސް ރެއާލުން ކުރި އެވެ. ގާތް ގަނޑަކަށް އެ ކުލަބަށް ބަދަލުވާން އޭނާ ނިންމި ކަމަށް ވެސް މީޑިއާތަކުން ބުނެ އެވެ. ނަމަވެސް ފަހު ވަގުތު އޭނާ ވަނީ ޕީއެސްޖީގެ އެއްބަސްވުން އައުކޮށްފަ އެވެ. މިހާރު އަނެއްކާ އެމްބާޕޭ ރެއާލަށް ބަދަލުވާން އުޅޭ އިރު، ދާދި ފަހުން ރެއާލްގެ ރައީސް ވިދާޅުވީ އެ ކުލަބުން އެމްބާޕޭ ގެންނާނެ ކަމަށެވެ. ނަމަވެސް އެއީ މިއަހަރު ނޫން ކަމަށް ވެސް އޭނާ ވަނީ ވިދާޅުވެފަ އެވެ.
