ޑެންމާކްގެ ރަސްމުސް ހޮއިލުންޑް ޔުނައިޓެޑަށް ސޮއިކޮށްފި

އެޓަލާންޓާއަށް ކުޅެމުން އައި ޑެންމާކްގެ ޒުވާން ފޯވާޑް ރަސްމުސް ހޮއިލުންޑް، 72 މިލިއަން ޕައުންޑަށް މެންޗެސްޓަރ ޔުނައިޓެޑަށް ސޮއިކޮށްފިއެވެ.

އުމުރުން 20 އަހަރުގެ ފޯވާޑް އެޓަލަންޓާއާ ގުޅުނީ 2022 ވަނަ އަހަރުއެވެ. މި ނިމުނު ސީޒަނުގައި އެ ޓީމަށް ކުޅެދިން 34 މެޗުގައި އޭނާ ވަނީ 10 ލަނޑު ޖަހާފައެވެ. ޔުނައިޓެޑާ އޭނާ ގުޅުނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ.

ހޮއިލުންޑް ބުނީ އޭނާ އަކީ ކުޑައިރުންސުރެ ޔުނައިޓެޑުގެ ސަޕޯޓަރެއް ކަމަށާ، ޔުނައިޓެޑަށް ކުޅުމަކީ އޭނާގެ ހުވަފެނެއް ކަމަށެވެ. މީގެއިތުރުން އޭނާ ބުނީ، ޔުނައިޓެޑަށް ކުޅެން ތައްޔާރު ކަމަށާ، އޭނާގެ ކުރިއެރުމަށް އެންމެ ރަނގަޅު ޓީމަކީ ޔުނައިޓެޑު ކަމަށެވެ.

ޗެލްސީއަށް ކުޅުނު މޭސަން މައުންޓާއި އިންޓަ މިލާނަށް ކުޅުނު ކީޕަރު އަންޑްރޭ އޮނާނާ ގެނައުމަށްފަހު، ހޮއިލުންޑަކީ މި ހޫނުމޫސުމުގައި ޔުނައިޓެޑަށް ގެނައި ތިންވަނަ ކުޅުންތެރިޔާއެވެ. ރިޕޯޓުތައް ބުނާގޮތުން ފްރާންސް ލީގުގެ ޗެމްޕިއަން ޕީއެސްޖީ އިންވެސް ވަނީ ހޮއިލުންޑް ހޯދުމަށް މަސައްކަތް ކޮށްފައެވެ. ޑެންމާކްގެ ގައުމީ ޓީމުން ހޮއިލުންޑަށް ޖާގަ ލިބުނީ 2022 ވަނަ އަހަރުއެވެ. އޭނާ ވަނީ 2024 ވަނަ އަހަރުގެ ޔޫރޯ ކޮލިފިކޭޝަންގައި ކުޅުނު ހަ މެޗުން ހަ ލަނޑު ޖަހާފައެވެ.

އެޓަލާންޓާގެ ފަރިތަކުރުންތަކުގައި ލިބުނު އަނިޔާއެއްގެ ސަބަބުން، އައު ސީޒަނުގެ ފުރަތަމަ މެޗުގައި ހޮއިލުންޑަކަށް ނުކުޅެވޭނެއެވެ. ފުރަތަމަ މެޗުގައި ޔުނައިޓެޑް ނިކުންނާނީ ވުލްވްސް އާ ދެކޮޅަށެވެ.