ބާސެލޯނާ އިން އޭނާ ބޭރު ކުރުމަށް ވަރަށް ވާހަކަ ފަތުރާނެ ކަމަށް އެ ޓީމަށް ކުޅެމުން އަންނަ ސްޕެއިންގެ ޕެޑްރީ ބުނެފި އެވެ.

ޕެޑްރީ މިހެން ބުނީ އޭނާ ހޯދުމުގެ ޝައުޤުވެރިކަން ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އިން ގެންގުޅޭ ކަމަށް މީޑިއާތަކުގައި ބުނެފައި ވަނިކޮށެވެ. އެކަމަށް ރައްދު ދެމުން ޕެޑްރީ ބުނީ، އޭނާ ބާސެލޯނާ އިން ބޭރު ކުރުމަށް، ދޮގު ވާހަކަތައް ފަތުރާނެ ކަމަށެވެ. ނަމަވެސް އެއްވެސް ވަރަކަށް ދޮގު ވާހަކަތަކަށް ސަމާލުކަން ދޭން ބޭނުން ނުވާ ކަމަށާއި، އޭނާ ބޭނުންވަނީ ބާސެލޯނާގައި ހުންނަން ކަމަށް ޕެޑްރީ ވަނީ ބުނެފަ އެވެ. މީގެ އިތުރުން ޕެޑްރީ ބުނީ، ބާސެލޯނާ އަކީ އޭނާގެ ހުވަފެނީ ކުލަބު ކަމަށާއި، އެ ކުލަބުގައި ވީހާ ވެސް ގިނަ އަހަރުތަކެއް ވަންދެން ހުންނަން ބޭނުންވާ ކަމަށެވެ. ބާސެލޯނާގައި މިހާރު އޭނާގެ އެންމެ ބޮޑު އަމާޒަކީ ކުލަބުގެ ކެޕްޓަނަށްވެ، އައު ދަނޑުގައި ކުޅުން ކަމަށް ވެސް ޕެޑްރީ ވަނީ ބުނެފަ އެވެ.

އުމުރުން 20 އަހަރުގެ ޕެޑްރީ ބާސެލޯނާ އަށް ގުޅުނީ 2019 ވަނަ އަހަރު އެވެ. އެންމެ ފުރަތަމަ އޭނާ އެ ކުލަބަށް ސޮއި ކުރީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އޭގެ ފަހުން 2021 ވަނަ އަހަރުގެ އޮކްޓޫބަރު މަހު އޭނާ ވަނީ ބާސެލޯނާގެ އެއްބަސްވުން އައު ކޮށްފަ އެވެ. އައު އެއްބަސްވުމުގެ މުއްދަތު ހަމަވާނީ 26-2025 ވަނަ ސީޒަނުގެ ނިޔަލަށެވެ. ބާސެލޯނާގެ މެދު ތެރޭގައި ޕެޑްރީ އަކީ މިހާރު އެންމެ މުހިންމު އެއް ކުޅުންތެރިޔާ އެވެ. އަނެއްކޮޅުން ބާސެލޯނާ އިން ބައެއް ކުޅުންތެރިން ދޫކޮށްލަން ނިންމާފައިވާއިރު، ޕެޑްރީ އަކީ "އަތްނުލެވޭނެ" ކުޅުންތެރިޔެއްގެ ގޮތުގައި ކޯޗު ޒަވީ ހެނާންޑޭޒް ވަނީ ނިންމައިފަ އެވެ.

ޕެޑްރީ ވަނީ މިހާތަނަށް ބާސެލޯނާ އަށް ކުޅެދިން 109 މެޗުގައި 16 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ސްޕެނިޝް ލީގު، ކޮޕަ ޑެލް ރޭ އަދި ސްޕެނިޝް ސުޕަ ކަޕް ކާމިޔާބުކޮށްފަ އެވެ. ބާސެލޯނާ އަށް ބަދަލުވި ފަހުން ޕެޑްރީ ވަނީ ގޯލްޑަން ބޯއީ އެވޯޑާއި، ކެޕާ އެވޯޑު ހާސިލްކޮށްފަ އެވެ. ޕެޑްރީ އަންނަނީ 2021 ވަނަ އަހަރުން ފެށިގެން ސްޕެއިން ޤައުމީ ޓީމުގައި ވެސް ހިމެނިގެން ކުޅެމުންނެވެ.