މެންޗެސްޓަރ ޔުނައިޓެޑުން އެޑިޑާސްއާ އެކު 900 މިލިއަން ޕައުންޑްގެ އެއްބަސްވުމެއްގައި ސޮއިކޮށްފި އެވެ.

ހޯމަ ދުވަހު ޔުނައިޓެޑުގެ ކިޓް ސަޕްލައި ކުރާ ފަރާތް ކަމަށްވާ އެޑިޑާސް އާއެކު ސޮއިކުރީ އިތުރު 10 އަހަރު ދުވަހުގެ އެއްބަސްވުމެއްގައެވެ. ޔުނައިޓެޑުގެ ކިޓް ސްޕޮންސަރަކަށް އެންމެ ފުރަތަމަ އެޑިޑާސް ހަމަޖެއްސީ 2015-2016 ވަނަ ސީޒަނުގައެވެ. އެއީ 23 އަހަރަށްފަހު އެޑިޑާސްއިން ޔުނައިޓެޑުގެ ޖާޒީ ސްޕޮންސަރ ކުރި ފުރަތަމަ ފަހަރެވެ. އެފަހަރުގެ އަގަކީ އެއިރުގެ ރެކޯޑް އަދަދެއް ކަމަށްވާ 750 މިލިއަން ޕައުންޑެވެ. އެޑިޑާސް އާ ހަވާލުކުރުމުގެ ކުރިން ޔުނައިޓެޑުގެ ކިޓް ސްޕޯންސަރަކީ ނައިކީ އެވެ.

ޔުނައިޓެޑާއި އެޑިޑާސް އިން ސޮއިކުރި އައު އެއްބަސްވުމުގެ މުއްދަތު ހަމަވާނީ 2035 ވަނަ އަހަރުގެ ޖޫން މަހުއެވެ. އަހަރެއްގެ މައްޗަށް ލިބޭ އާމްދަނީއަށް ބަލާއިރު، މިއީ ޕްރިމިއަރ ލީގުގެ ތާރީހުގައިވެސް އެންމެ އަގުބޮޑު ޑީލްއެވެ.

އެއްބަސްވުމުގައިވާގޮތުން ވިދިވިދިގެން ދެ ސީޒަން ނުވަތަ އެޔަށްވުރެ ގިނަ ސީޒަނުގެ ޗެމްޕިއަންސް ލީގަށް ކޮލިފައި ނުވެއްޖެނަމަ، އަހަރު ނިމުމުން ދައްކާ ފީ ގެ 30 އިންސައްތަ ގެއްލޭނެއެވެ.

ތިން ފަހަރު ޗެމްޕިއަންސް ލީގު ކާމިޔާބުކޮށްފައިވާ މެންޗެސްޓަރ ޔުނައިޓެޑް، އަންނަ ސީޒަނުގައި އަނެއްކާވެސް ޗެމްޕިއަންސް ލީގު ކުޅޭނެއެވެ.