ޔާމީނުގެ ކެނޑިޑެސީ ބަލައިގަތުމާމެދު މިއަދު އިރުއޮއްސި 18:00 ގެ ކުރިން އީސީން ގޮތެއް ނިންމަނީ
1 އޯގަސްޓު 2023 | އަންގާރަ 05:42ޕީއެމްއިން ވަނީ ޔާމީނުގެ ކެނޑިޑެސީ ފޯމު އިލެކްޝަންސް ކޮމިޝަނަށް ހުށައަޅާފައި
އިލެކްޝަންސް ކޮމިޝަން | ރާއްޖެއެމްވީ
ކުރީގެ ރައީސް އަބްދުﷲ ޔާމީނުގެ ކެނޑިޑެސީ ބަލައިގަތުމާމެދު އަންގާރަ ދުވަހުގެ އިރު އޮއްސި 18:00 ގެ ކުރިން ގޮތެއް ނިންމަވާނެކަމަށް އިލެކްޝަންސް ކޮމިޝަނުން ބުނެފިއެވެ.
އަންގާރަ ދުވަހު ޕީޕީއެމްއިން ވަނީ ޔާމީނުގެ ކެނޑިޑެސީ ފޯމު އިލެކްޝަންސް ކޮމިޝަނަށް ހުށައަޅާފައެވެ.
އެކަމާ ގުޅޭގޮތުން އިލެކްޝަންސް ކޮމިޝަނުގެ މެމްބަރު ޙަބީބް ވިދާޅުވީ، އީސީގެ ފަރާތުން މި ފޯމުގެ ސައްޙަކަން ކަށަވަރުކުރާއިރު، ލަސް ކުރުމުގެ އެއްވެސް ނިޔަތެއް ނެތް ކަމަށާއި، އަންގާރަ ދުވަހުގެ އިރު އޮއްސި 18:00 ގެ ކުރިން ގޮތެއް ނިންމަވައި، އީސީގެ ޖަވާބު އަރުވާނެ ކަމަށެވެ.
މިއީ އިންތިޚާބުގައި ވާދަ ކުރުމަށް މިހާތަނަށް ހުށައެޅިފައިވާ ފުރަތަމަ ފޯމުކަމަށްވެސް ޙަބީބު ވިދާޅުވިއެވެ.
ރައީސުލްޖުމްހޫރިއްޔާއަކަށް އިންތިޚާބުކުރާ މީހެއްގެ ކިބައިގައި ހުންނަންޖެހޭ ޝަރުތުތައް ޤާނޫނުއަސާސީގެ 109 ވަނަ މާއްދާގައި ސާފުކޮށް ބަޔާންކޮށްފައިވެއެވެ. ޤާނޫނު އަސާސީގެ 109 ވަނަ މާއްދާގައި ބުނެފައިވާ ގޮތުން ޖިނާޢީ ކުށެއް ކުރިކަން ސާބިތުވެ އެއްއަހަރަށް ވުރެ ދިގު ޙުކުމެއް އައިސްފައިވާ މީހަކުނަމަ އެމީހަކަށް ރިޔާސީ އިންތިޚާބުގައި ވާދަކުރެވޭނީ އަދަބު ތަންފީޒުކޮށް ނިމޭތާ 3 އަހަރު ފަހުންނެވެ.
