ޖަރުމަނު ލީގުގެ އާރްބީ ލައިޕްޒިގަށް ކުޅެމުން އަންނަ ޕޯޗުގަލްގެ ފޯވާޑް އަންދްރޭ ސިލްވާ ހޯދުމަށް ރެއާލް ސޮސިއެޑާޑުން ކުރަމުން އަންނަ މަސައްކަތުގައި ކުރިއެރުންތަކެއް ހޯދައިފި އެވެ.

ފްރޭންކްފާޓް ދޫކޮށް ސިލްވާ ލައިޕްޒިގަށް ބަދަލުވީ 2021 ވަނަ އަހަރު އެވެ. ޖުމުލަ 23 މިލިއަން ޔޫރޯ ޚަރަދުކޮށްގެން ލައިޕްޒިގުން އޭނާ ހޯދީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން ލައިޕްޒިގާއެކު އޭނާ ސޮއި ކުރި އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ސޮސިއެޑާޑުގެ ޝައުޤުވެރިކަން ސިލްވާ އަށް ފާޅުކޮށް އެ ކުލަބުން އަންނަނީ ލައިޕްޒިގާއެކު މަޝްވަރާތައް ކުރަމުންނެވެ. އެ މަޝްވަރާތަކުން މިހާތަނަށް ސޮސިއެޑާޑަށް ބޮޑު ކުރިއެރުންތަކެއް ލިބިފައިވާ ކަމަށް ވެސް ރިޕޯޓުތައް ބުނެ އެވެ. އެގޮތުން ސިލްވާގެ ސޮއި ހޯދޭނެ ކަމުގެ ވަރަށް ބޮޑު ޔަގީންކަމެއް ސޮސިއެޑާޑަށް އޮތް ކަމަށް ރިޕޯޓުތައް ބުނެ އެވެ. ކުރިއަށް އޮތް ދުވަސްތަކުގެ ތެރޭގައި ދެ ކުލަބުގެ ދެމެދުގައި އިތުރު މަޝްވަރާތައް ކުރިއަށްގެންދާނެ އެވެ.

ލައިޕްޒިގަށް ބަދަލުވެ އޭނާ ވަނީ މިހާތަނަށް އެ ކުލަބަށް 95 މެޗު ކުޅެދީ 26 ލަނޑު ޖަހައިފަ އެވެ. ލައިޕްޒިގާ އެކު އޭނާ ވަނީ ދެ ފަހަރެއްގެ މަތިން ޖަރުމަނު ކަޕް ކާމިޔާބުކޮށްފަ އެވެ. އުމުރުން 27 އަހަރުގެ ސިލްވާ އަންނަނީ 2016 ވަނަ އަހަރުން ފެށިގެން ޕޯޗުގަލް ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ ޤައުމީ ޓީމަށް 53 މެޗު ކުޅެދީ 19 ލަނޑު ޖަހައިދީފަ އެވެ. ޕޯޗުގަލް އިން ޔުއެފާ ނޭޝަންސް ލީގު ކާމިޔާބު ކުރިއިރު ސިލްވާ ޓީމުގައި ހިމެނެ އެވެ. އެންމެ ފަހުން މިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕަށް ޕޯޗުގަލް އިން އެކުލަވާލި ސްކޮޑުގައި ހިމެނެ، ސިލްވާ ވަނީ މުބާރާތުގައި ކުޅެފަ އެވެ.