އަޅުގަނޑުގެ ދެވަނަ ދައުރު ނިމިގެންދާއިރު ލޯނުތައް ދެއްކުމުގެ ބުރަ ދެން އަންނަ ސަރުކާރަކަށް ނަގާކަށް ނުޖެހޭނެ: ރައީސް
މި ސަރުކާރުން މިހާރު ފަށާފައިވާ މަޝްރޫއުތައް ނިމުމުން، ރާއްޖެއަށް ބޮޑު ހެޔޮ ބަދަލެއް އަންނާނެކަމަށް ވިދާޅުވި
ރައީސް ށ. މިލަންދޫގައި ބޭއްވި ޖަލްސާގައި ވާހަކަފުޅުދައްކަވަނީ
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ދެވަނަ ދައުރެއް ނިމިގެންދާއިރު، ރާއްޖޭގައި ތަރައްގީގެ މަޝްރޫއުތައް ހިންގުމަށް ނަގާފައިވާ ލޯނުތައް ދެއްކުމުގެ ބުރަ ދެން އަންނަ ސަރުކާރަކުން ނަގަން ނުޖެހޭނެ ކަމަށް އެމަނިކުފާނު ވިދާޅުވެއްޖެއެވެ.
ށ. މިލަންދޫގައި ކުރިއަށްދިޔަ އުފާވެރި އަމާން ރާއްޖެ ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، އެމަނިކުފާނު ދެވަނަ ދައުރަކަށް ކުރިމަތިލެއްވީ ވަރަށް ބޮޑު އަމާޒަކާއެކުގައި ކަމަށެވެ. އެގޮތުން, މި ސަރުކާރުން މިހާރު ފަށާފައިވާ މަޝްރޫއުތައް ނިންމަން ބޭނުންފުޅުވާ ކަމަށާއި، އޭގެ ސަބަބުން ރާއްޖެއަށް ބޮޑު ހެޔޮ ބަދަލެއް އަންނާނެކަމަށް ރައީސް ވިދާޅުވިއެވެ. މި ބޮޑު ބަދަލަކީ ރާއްޖޭގެ އިގްތިސާދު ދެގުނަ ވުން ކަމަށް އެމަނިކުފާނު ވިދާޅުވިއެވެ.
ރައީސް ވިދާޅުވީ އިގްތިސާދު ދެގުނަ ވާނެއޭ ބުނުމުން ބައެއް ފަރާތްތަކުން ސުވާލު އުފައްދާ ކަމަށާއި، ނަމަވެސް އެއީ ލިޔެކިޔުމުން ފެންނަން އޮތް ހަގީގަތެއް ކަމަށެވެ. ކުރިއަށް އޮތް ފަސް އަހަރުގެ ތަސައްވުރަކީ މި އިގްތިސާދީ ބޮޑު ބަދަލު ރާއްޖެއަށް ގެނައުން ކަމަށާއި، އެގޮތުން, ބައިނަލްއަގުވާމީ އެއާޕޯޓުތައް ނިމި ފަތުރުވެރިން އިތުރުވެގެންދާނެ ކަމަށް ވިދާޅުވިއެވެ. މީގެ އިތުރުން ދަތުރުފަތުރުގެ ނިޒާމުން ރާއްޖެ ގުޅައިލެވި, ވަޒީފާތަކަށް މީހުން ފައްކާކޮށް, ތައުލީމީ އާޖީލެއް އުފެދިގެންދާނެ ކަމަށް ވިދާޅުވިއެވެ.
ގުޅިފައިވާ ސިޔާސީ ޕާޓީތަކުގެ ރިޔާސީ ކެނޑިޑޭޓް ވިދާޅުވިގޮތުގައި، 2018 ވަނަ އަހަރު އެމަނިކުފާނު ވެރިކަމާ ހަވާލުވެވަޑައިގަތްއިރު ރާއްޖޭގެ އިގްތިސާދު 81 ބިލިއަން ރުފިޔާގައި ހުރިއިރު، އާމްދަނީ ހުރީ 22 ބިލިއަން ރުފިޔާގައި ކަމަށެވެ. ނަމަވެސް މިއަހަރު ނިމޭއިރު އިގްތިސާދު 108 ބިލިއަނަށް އަރާނެކަމަށާއި މިއަހަރުގެ އާމްދަނީ 34 ބިލިއަނަށް އަރާނެކަން އެމަނިކުފާނު ފާހަގަކުރެއްވިއެވެ. އަދި 2025 ވަނަ އަހަރު 2.5 މިލިއަނެއްހާ ފަތުރުވެރިން އަންނާނެ ކަމަށް ލަފާކުރެވޭއިރު، އިގްތިސާދު 130 ބިލިއަނަށް އަރައި، އާމްދަނީ 44 ބިލިއަނަށް އަރާނެކަމަށް ވިދާޅުވިއެވެ.
މި ހިސާބުތަކަށް ބަލައި، 2028 ވަނަ އަހަރު ރާއްޖޭގެ އިގްތިސާދު 177 ބިލިއަން ރުފިޔާއަށް އަރާނެކަމަށް ލަފާކުރެވޭއިރު، އާމްދަނީ 45 މިލިއަން ކަޑައްތުކޮށް 50 މިލިއަން ރުފިޔާއަށް އަމާޒު ހިފާނެ ކަމަށްވެސް ރައީސް ވިދާޅުވިއެވެ.
ރާއްޖޭގެ އިގްތިސާދަށް އަންނަ މި ހެޔޮ ބަދަލާއެކު ރަށްރަށުގައި ހިންގާ މުހިންމު މަޝްރޫއުތަކަށް ނަގާފައިވާ ލޯނުތައް ދެއްކުމުގެ ގާބިލުކަން 2026ގެ ފަހުން ރާއްޖޭގެ އިގްތިސާދުގައި ހުންނާނެކަން ރައީސް ފާހަގަކުރެއްވިއެވެ. އެހެންކަމުން އެމަނިކުފާނު ދެވަނަ ދައުރެއް ނިންމަވާލެއްވުމަށްފަހު ވަޑައިގަންނަވާއިރު ލޯނުތައް ދެއްކުމުގެ ބުރަ ދެން އަންނަ ސަރުކާރަކުން އުފުލަން ނުޖެހޭނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މި ސަރުކާރުގެ އަމާޒަކީ ރައްޔިތުންނަށް އުފާވެރި, އަދި އަމާން ރާއްޖެއަކަށް ވާސިލް ކޮށްދިނުން ކަމަށެވެ. އެކަން ހާސިލްކުރުމަށް ރައްޔިތުން މިއަދު އެމަނިކުފާނާއެކު ތިބިކަން، ކުރައްވާ ދަތުރުފުޅުތަކުން ހާމަވެގެންދާކަމަށް އެމަނިކުފާނު ވިދާޅުވިއެވެ.
