ކޭން ހޯދުމަށް ބަޔާނުން ޓޮޓެންހަމާ މަޝްވަރާކުރަނީ، އަގަކީ 80 މިލިއަން ޔޫރޯ

ޓޮޓެންހަމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ހޯދުމުގެ މަޝްވަރާތައް އެ ކުލަބާއެކު ފަށަން، ޖަރުމަނުގެ ބަޔާން މިއުނިކުން ނިންމައިފި އެވެ.

އިނގިރޭސި މީޑިއާ ތަކުގައި ބުނެފައިވާ ގޮތުން ބަޔާންގެ އިސް އޮފިޝަލުން ވަނީ ޓޮޓެންހަމްގެ ޑެނިއަލް ލެވީއާ ބައްދަލުކުރެއްވުމަށް ލަންޑަނަށް ގޮސްފަ އެވެ. އެހެންކަމުން މިއީ ކޭން ހޯދުމުގެ ޝައުޤުވެރިކަން ފާޅުކޮށްފައިވާ ބަޔާނަށް ވަރަށް މުހިންމު ވަގުތުކޮޅަކަށް ވާނެ އެވެ. ޓޮޓެންހަމްގެ ރައީސާއެކު މަޝްވަރާ ކުރުމަށް ބަޔާންގެ އޮފިޝަލުން ދިޔައީ ކޭން ހޯދުމަށް ހުށަހަޅާނެ ޕެކޭޖެއް ވެސް ނިންމައިގެންނެވެ. އެގޮތުން އޭނާ ހޯދުމަށް އެކުލަބުން 80 މިލިއަން ޔޫރޯގެ ޕެކޭޖެއް ހުށަހަޅަން ނިންމާފައިވާ ކަމަށް މީޑިއާ ތަކުން ބުނެ އެވެ. އެކަމާ ގުޅިގެން ބަޔާންގެ ރައީސް ހަބާޓް ހައިނާ ވިދާޅުވީ، ޓޮޓެންހަމްގެ ރައީސް ކޮންމެ ގޮތެއް ނިންމި ނަމަވެސް އެކަމަށް ފުރިހަމަ އަށް އިހުތިރާމް ކުރައްވާނެ ކަމަށެވެ. ނަމަވެސް ބަޔާންގެ އުންމީދަކީ އެ ޑީލް ކާމިޔާބުވުން ކަމަށް ވެސް އޭނާ ވިދާޅުވި އެވެ.

ބަޔާނުން ކޭން ހޯދުމަށް މަސައްކަތް ކުރަނީ މިދިޔަ ސީޒަނުގަައި އެ ޓީމުގެ އެންމެ މުހިންމު އެއް ކުޅުންތެރިޔާ، ރޮބާޓް ލެވަންޑޯސްކީ އެ ކުލަބު ދޫކޮށް ސްޕެއިންގެ ބާސެލޯނާ އަށް ބަދަލުވުމާ ގުޅިގެންނެވެ. 2009 ވަނަ އަހަރު ޓޮޓެންހަމުން ސީނިއާ ކެރިއަރު ފެށި ކޭން އެކުލަބާއެކު ހަދާފައިވާ އެއްބަސްވުމުގެ މުއްދަތު ހަމަވާން އޮތީ އަންނަ 2024 ވަނަ އަހަރުގެ ޖޫން މަހުގެ ނިޔަލަށެވެ. ކޭން އަކީ މިވަގުތު ޓޮޓެންހަމްގައި ވެސް ހުރި އެންމެ މުހިންމު އެއް ކުޅުންތެރިޔާ އެވެ. އެހެންކަމުން އެ ކުލަބުން އޭނާ ދޫކޮށްލަން ބޭނުންނުވާ ކަމަށް މީޑިއާތަކުން ބުނެ އެވެ. ކޭން ވަނީ މިހާތަނަށް ޓޮޓެންހަމަށް ކުޅެދިން 435 މެޗުގައި 280 ލަނޑު ޖަހައިފަ އެވެ.

ކޭން އަކީ އިނގިރޭސި ޕްރިމިއާ ލީގުގައި މިހާތަނަށް ދެ ވަނަ އަށް އެންމެ ގިނަ ލަނޑު ޖެހި ކުޅުންތެރިޔާ އެވެ. އޭނާ ވަނީ މިހާތަނަށް ޕްރިމިއާ ލީގުގައި 213 ލަނޑު ޖަހައިފަ އެވެ. މި ލިސްޓުގެ އެއް ވަނައިގައި އޮތީ 260 ލަނޑާއެކު އެލަން ޝިއަރާ އެވެ. އެހެންކަމުން ކޭން އަކީ މިވަގުތު ޕްރިމިއާ ލީގުގައި ކުޅެމުން އަންނަ ކުޅުންތެރިންގެ ތެރެއިން އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ.