ހެންޑަސަން މިސްވާނެ: ވެންޑައިކް

ލިވަޕޫލް ދޫކޮށް ސައޫދީ އަރަބިއްޔާގެ އަލް އިއްތިފާގަށް ބަދަލުވި ކެޕްޓަން ޖޯޑަން ހެންޑަސަން ވަކިވުމުން އެކަމާ ހިތާމަ ކުރާ ކަމަށާއި އޭނާ "މިސް" ވާނެ ކަމަށް ލިވަޕޫލްގެ ޑިފެންޑަރު ވާޖިލް ވެންޑައިކް ބުނެފި އެވެ.

ނެދަލޭންޑްސްގެ ކެޕްޓަންކަން ކުރަމުން އަންނަ ވެންޑައިކް އަކީ ހެންޑަސަން ނެތުމުން ލިވަޕޫލްގެ އައު ކެޕްޓަނަކަށްވުން އެންމެ ގާތް ކުޅުންތެރިޔާ އެވެ. ރަސްމީކޮށް އޭނާ ކެޕްޓަނަކަށް ހަމަނުޖެއްސި ނަމަވެސް މިހާރު ކުޅެމުންދާ ރަހުމަތްތެރިކަމުގެ މެޗުތަކުގައި ކެޕްޓަން ބޭންޑް އަޅަމުންދަނީ ވެންޑައިކެވެ.

ލިވަޕޫލްގައި ކެޕްޓަންކަން ކުރެވޭނެ ގިނަ ކުޅުންތެރިން ތިބިކަން ފާހަގަ ކުރަމުން ވެންޑައިކް ބުނީ އޭނާ އަށް ބޭންޑް އަޅަން ލިބިއްޖެނަމަ އެ މަގާމު ފުރިހަމަ އަދާކުރެވޭތޯ ވަރަށް މަސައްކަތް ކުރާނެ ކަމަށެވެ.

ލިވަޕޫލްގެ ކެޕްޓަންކަން ބޭނުންވާ ގިނަ ކުޅުންތެރިންތަކެއް ޓީމުގައި އެބަތިއްބެވެ. އޭގެ ތެރޭގައި މިސުރުގެ ފޯވަޑް މުހައްމަދު ސަލާހް އާއި އިނގިރޭސި ޑިފެންޑަރު ޓްރެންޓް އެލެގްޒެންޑާ އާނޯލްޑް ހިމެނެ އެވެ.

ކުރިއަށް އޮތް ސީޒަނަށް ލިވަޕޫލުން ވަނީ ގިނަ ކުޅުންތެރިންތަކެއް ދޫކޮށްލައިފަ އެވެ. އަދި ބްރެޒިލްޑްގެ މިޑްފީލްޑަރު ފަބީނިއޯ ވެސް ހުރީ ޓީމު ދޫކޮށްދިއުމުގެ މަގުމަތީގަ އެވެ. އަލަށް ޓީމަށް ގެނެސްފައިވަނީ ދެ މިޑްފީލްޑަރެކެވެ.