އީސީގެ މެމްބަރު، ނަޝާތުގެ ދައުރު ހަމަވެއްޖެ
އިލެކްޝަންސް ކޮމިޝަންގެ މެމްބަރުންގެ ތެރެއިން މަގާމެއް ހުސްވެއްޖެނަމަ 60 ދުވަހުގެ ތެރޭގައި އެ މަގާމަށް އަލުން މީހަކު އައްޔަންކުރުމަށް ގާނޫނުން ލާޒިމްކުރޭ
އިލެކްޝަންސް ކޮމިޝަންގެ މެމްބަރުކަމުގެ ދައުރު ހަމަވެފައިވާ އަލީ ނަޝާތު
އިލެކްޝަންސް ކޮމިޝަންގެ މެމްބަރ އަލީ ނަޝާތުގެ ދައުރު ހަމަވެއްޖެއެވެ.
ނަޝާތުގެ ފަސް އަހަރުގެ ދައުރު އަންގާރަ ދުވަހު ހަމަވެފައިވާއިރު, އޭނާ އަލުން އީސީއަށް އައްޔަނުކުރުމަށް އެދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވަނީ އެ މައްސަލަ ރައްޔިތުންގެ މަޖިލީހަށް ފޮނުއްވާފައެވެ. ނަމަވެސް އެކަމާމެދު އަދި ވަކި ގޮތެއް މަޖިލީހުން ނިންމާފައެއްނުވެއެވެ.
ދެވަނަ ދައުރުގެ ތެރޭގައި އެކަން މަޖިލީހަށް ހުށަހެޅުނުނަމަވެސް މަޖިލިސް ޗުއްޓީއަށް ގޮސްފައިވަނީ އެކަމާމެދު ވަކި ގޮތެއް ނުނިންމައެވެ. އިލެކްޝަންސް ކޮމިޝަންގެ މެމްބަރުންގެ ތެރެއިން މަގާމެއް ހުސްވެއްޖެނަމަ 60 ދުވަހުގެ ތެރޭގައި އެ މަގާމަށް އަލުން މީހަކު އައްޔަންކުރުމަށް ގާނޫނުން ލާޒިމްކުރެއެވެ.
ނަޝާތުގެ ދައުރު ހަމަވުމާއެކު, މިހާރު އިލެކްޝަންސް ކޮމިޝަންގެ މެމްބަރުންގެ ގޮތުގައިި ތިއްބަވާނީ އެ ކޮމިޝަންގެ ރައީސް ފުއާދު ތައުފީގާއި، ކޮމިޝަންގެ ނައިބު ރައީސް އިސްމާއީލް ހަބީބާއި، މުހައްމަދު އާސިފާއި އަދި ޑރ. މުހައްމަދު ޒާހިރެވެ.
އަނެއްކޮޅުން އިލެކްޝަންސް ކޮމިޝަންގެ ރައީސް ފުއާދު ތައުފީގު ކަންތައްތައް ކުރައްވާގޮތުން، ރައީސާމެދު 3 މެންބަރެއްގެ އިތުބާރު ނެތްކަމަށް، ޖުލައި 18 ވަނަ ދުވަހު ބޭއްވި، ކޮމިޝަންގެ އާންމު ޖަލްސާގެ އަޣުލަބިއްޔަތުން ފާސްކޮށްފައިވެއެވެ. ކޮމިޝަނުން އެގޮތަށް ނިންމިނަމަވެސް، ގާނޫނު ބުނާގޮތުން ފުއާދު އެމަގާމުން ވަތްކެއް ނުވާނެއެވެ. އެއީ ރައީސާއި ނައިބު ރައީސް މަގާމުން ވަކިކުރުމުގެ ބާރު އިލެކްޝަންސް ކޮމިޝަންގެ ގާނޫނުގެ ދަށުން މެމްބަރުންނަށް ލިބިދީފައި ނުވާތީއެވެ.
ރިޔާސީ އިންތިޚާބު ބޯމަތިވެފައިވާއިރު، އީސީގެ ތެރޭގައި ވަނީ ޚިޔާލުތަފާތުވުންތައް އުފެދިފައެވެ. އަދި ފުއާދާމެދު އިތުބާރު ނެތްކަމަށް ކޮމިޝަންގެ މެމްބަރުން ގެންދަވަނީ ވިދާޅުވަމުންނެވެ. ފުއާދާ ދެކޮޅަށް ނަޝާތާއި ޑރ. ޒާހިރު އަދި އާސިފް ތެދުވެވަޑައިގަތީ، ޑިމޮކްރެޓްސް ޕާޓީ ރަޖިސްޓަރީކުރުމުގެ ހުއްދަ ދިނުމާ ގުޅޭ ކަންކަމުގައި އުފެދުނު ޚިޔާލުތަފާތުވުންތަކުގައި އެ ތިން ބޭފުޅުންގެ އަގު ވެއްޓޭ ގޮތަށް ފާޅުގައި ފުއާދު ވާހަކަދައްކަވާފައި ވާތީކަމަށް ވިދާޅުވެއެވެ. އޭގެ ފަހުން ފުއާދު ބައިވެރިވެވަޑައިގަންނަވާ އެއްވެސް ޖަލްސާއެއްގައި އެ ތިން މެންބަރުން ބައިވެރިވެވަޑައެއްނުގަންނަވައެވެ.
ފުއާދުގެ އިތުބާރު ނެތްކަމުގެ މައްސަލަ ފާސްކުރުމާއެކު، އޭނާ ވަނީ ކޮމިޝަންގެ ބައްދަލުވުންތައް ބޭއްވުން ނައިބު ރައީސް ހަބީބަށް ހަވާލު ކުރައްވާފައެވެ.
