ރަސްމުސް ހޮލުންޑު ހޯދުމަށް ޔުނައިޓެޑުން ބިޑު ކުރަނީ

އިޓަލީގެ އެޓަލަންޓާ އަށް ކުޅެމުން އަންނަ ޑެންމާކުގެ ޒުވާން ފޯވާޑް ރަސްމުސް ހޮލުންޑް ހޯދުމަށް މެންޗެސްޓަރ ޔުނައިޓެޑުން ބިޑު ކުރުމަށް ތައްޔާރުވެފައިވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 20 އަހަރުގެ ކުޅުންތެރިޔާ ހޯދުމުގެ މަޝްވަރާތަކުގެ ތެރެއިން ޔުނައިޓެޑަށް މިހާރު ވަނީ ކުޅުންތެރިޔާ އާއެކު އެއްބަސްވުމަކަށް އާދެވިފައި ކަމަށް މީޑިއާތަކުން ވަނީ ބުނެފަ އެވެ. އެހެންކަމުން ޔުނައިޓެޑުން މިހާރު ތައްޔާރުވަމުން އަންނަނީ އޭނާ ހޯދުމަށް ރަސްމީކޮށް ބިޑު ކުރުމަށެވެ. ހޮލުންޑަށް ޔުނައިޓެޑުން ކުރާ ބިޑު ކުރިއަށް އޮތް ދުވަސްތަކުގެ ތެރޭގައި ފޮނުވާނެ ކަމަށް މީޑިއާތަކުން ބުނެ އެވެ. މިއީ ކުރިއަށް އޮތް ސީޒަނަށް ޓީމުގެ ފޯވާޑް ލައިން ވަރުގަދަ ކުރުމަށް ކުރަމުން އަންނަ މަސައްކަތުގެ ތެރެއިން ހޯދަން މަސައްކަތް ކުރާ ކުޅުންތެރިޔެކެވެ. ޔުނައިޓެޑުން ޓޮޓެންހަމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ހޯދުމަށް ޝައުޤުވެރިކަން ގެންގުޅޭ ކަމަށް ވެސް ރިޕޯޓުތަކުގައިވެ އެވެ.

ހޮލުންޑް އެޓަލަންޓާ އަށް ބަދަލުވީ މިދިޔަ އަހަރުގެ އޯގަސްޓު މަހުގެ ތެރޭގަ އެވެ. އޭނާ އެކުލަބަށް ބަދަލުވީ 17 މިލިއަން ޔޫރޯގެ އަގަކަށެވެ. އޭނާ ވަނީ މިހާތަނަށް އެ ޓީމަށް ކުޅެދިން 34 މެޗުގައި 10 ލަނޑު ޖަހައިފަ އެވެ. ޑެންމާކުގެ ޤައުމީ ޓީމުން ވެސް އޭނާ އަށް ފުރުސަތު ލިބުނީ މިދިޔަ އަހަރު އެވެ. މިހާތަނަށް ޤައުމީ ޓީމަށް ކުޅެދިން ހަ މެޗުގައި އޭނާ ވަނީ ހަ ލަނޑު ޖަހައިފަ އެވެ.