ޤައުމީ ކޯޗު މޮރިއޭރޯގެ އެއްބަސްވުން އައުނުކުރުމަށް އެފްއޭއެމް އިން ނިންމައިފި

ޤައުމީ ފުޓުބޯޅަ ޓީމުގެ ކޯޗު އިޓަލީގެ ފްރެންޗެސްކޯ މޮރިއޭރޯގެ އެއްބަސްވުން އައުނުކުރަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

މިކަން ހާމަކުރެއްވީ އެފްއޭއެމްގެ ރައީސް ބައްސާމް އަދީލް ޖަލީލް އެވެ. ބައްސާމް ވިދާޅުވީ މޮރިއޭރޯ އާއެކު އެފްއޭއެމުން ހަދާފައިވާ އެއްބަސްވުމުގެ މުއްދަތު އޯގަސްޓު މަހު ހަމަވާނެ ކަމަށެވެ. އެހެންކަމުން މިހާރު ނިންމާފައި ވަނީ އެއްބަސްވުން އައު ނުކުރަން ކަމަށް ވެސް ވިދާޅުވި އެވެ. މީގެ އިތުރުން ޤައުމީ ޓީމަށް ބިދޭސީ އެހެން ކޯޗެއް ހަމަޖެއްސުމުގެ މަސައްކަތް އަހަރުގެ ބާކީ އޮތް ދުވަސްތަކުގައި ނުކުރާނެ ކަމަށާއި، އެ މަސައްކަތް ދެން ކުރާނީ އަންނަ 2024 ވަނަ އަހަރުގެ ކުރީ ކޮޅު ކަމަށް ވިދާޅުވި އެވެ. އެ މުއްދަތުގައި ޤައުމީ ޓީމާ ވަގުތީ ގޮތުން ހަވާލުވާނީ އެސިސްޓެންޓް ކޯޗު އަލީ ސުޒެއިން އެވެ.

ޤައުމީ ޓީމުގެ ކޯޗަކަށް މޮރިއޭރޯ ހަމަޖެއްސީ 2021 ވަނަ އަހަރުގެ އޮކްޓޫބަރު މަހުގެ ތެރޭގަ އެވެ. އެއީ އެ އަހަރު ރާއްޖޭގައި އޮތް ސާފް ޗެމްޕިއަންޝިޕް ފުޓުބޯޅަ މުބާރާތުން ރާއްޖެ ކެޓުމާއެކު އެވެ. މޮރިއޭރޯ އާއެކު ޤައުމީ ޓީމުން އެންމެ ފުރަތަމަ ކުރިމަތިލީ އެ އަހަރު ސްރީ ލަންކާގައި އޮތް ފޯ ނޭޝަންސް ކަޕާ އެވެ. ނަމަވެސް އެ މުބާރާތުގައި ރާއްޖެ އަށް އެދެވޭ ނަތީޖާއެއް ނުނެރެވުނެވެ. އެފްއޭއެމާއެކު މޮރިއޭރޯ ހެދި އެއްބަސްވުމުގެ މުއްދަތު އެންމެ ފުރަތަމަ ހަމަވާން އޮތީ މިދިޔަ އަހަރުގެ އޮކްޓޫބަރު މަހު އެވެ. ނަމަވެސް އެފްއޭއެމުން ވަނީ އިތުރު އެއް އަހަރަށް އޭނާގެ އެއްބަސްވުން އައުކޮށްފަ އެވެ.

މޮރިއޭރޯގެ އެއްބަސްވުން އައު ނުކުރަން އެފްއޭއެމުން ނިންމީ، ދާދި ފަހުން އިންޑިއާގައި ނިމުނު ސާފް ޗެމްޕިއަންޝިޕް ފުޓުބޯޅަ މުބާރާތުގައި ރާއްޖެ އަށް އެކަށީގެންވާ ނަތީޖާއެއް ނުނެރެވި، ގިނަ ފާޑު ކިޔުންތަކެއް އަމާޒުވަމުން އައި ވަގުތެއްގަ އެވެ. އެ މުބާރާތުން ރާއްޖެ ކެޓީ ގްރޫޕް ސްޓޭޖުންނެވެ. މިއީ ސާފް ޗެމްޕިއަންޝިޕްގެ ގްރޫޕް ސްޓޭޖުން ރާއްޖެ ކެޓި ފުރަތަމަ ފަހަރެވެ. މިދިޔަ ހަފްތާގެ އަންގާރަ ދުވަހު އެފްއޭއެމްގެ ރައީސް ބައްސާމް ވިދާޅުވީ މޮރިއޭރޯ ދޭންވާ މުސާރަ ނުދެވި އޮތް ކަމަށެވެ. ނަމަވެސް ކުރިއަށް ދާނީ އެ މުސާރަތައް ދީ ނިންމާފައި ކަމަށް ވެސް އެ ދުވަހު ބައްސާމް ވިދާޅުވި އެވެ.