އެއްބަސްވުން އުވާލުމަށްފަހު ބާސެލޯނާގެ ޑިފެންޑަރު އުމްޓީޓީ، ލީލްއަށް
22 ޖުލައި 2023 | ހޮނިހިރު 03:35ބާސެލޯނާއާއެކު އޭނާ ހަދާފައިވާ އެއްބަސްވުމުގައި ބާކީ ދެ އަހަރު އޮއްވައި، އެއްބަސްވުން އުވާލަން ނިންމީ ދެ ފަރާތް އެއްބަސްވާ ގޮތުގެ މަތިން
ބާސެލޯނާއަށް ކުޅުނު ފްރާންސްގެ ޑިފެންޑަރު، އުމްޓީޓީ
ބާސެލޯނާއާއެކު ހަދާފައިވާ އެއްބަސްވުން އުވާލުމަށްފަހު ފްރާންސް ލީގުގެ ލީލްއަށް ބަދަލުވާން، ޑިފެންޑަރު ސަމުއެލް އުމްޓީޓީ ނިންމައިފިއެވެ.
ލިއޯން ދޫކޮށް އޭނާ ބާސެލޯނާއަށް ބަދަލުވީ 2016 ވަނަ އަހަރުއެވެ. ބާސެލޯނާއާއެކު އޭނާ ހަދާފައިވާ އެއްބަސްވުމުގައި ބާކީ ދެ އަހަރު އޮއްވައި، އެއްބަސްވުން އުވާލަން ނިންމީ ދެ ފަރާތް އެއްބަސްވާ ގޮތުގެ މަތިންނެވެ. އެއީ ބާސެލޯނާގައި އޭނާއަށް އެންމެ އެކަށީގެންވާ ކުޅުމެއް ނުދެއްކި، ކޯޗު ޒަވީ ހެނާންޑޭޒްގެ ޕްލޭންގައި އޭނާ ނުހިމެނޭތީއެވެ. ބާސެލޯނާ އައު ސީޒަނަށް ތައްޔާރުވުމުގެ ގޮތުން ބައެއް ކުޅުންތެރިން ދޫކޮށްލުމުގެ މަސައްކަތް އަންނަނީ ކުރަމުންނެވެ. ބާސެލޯނާ ދޫކޮށް އުމްޓީޓީ ލީލްއަށް ބަދަލުވަނީ، ދެ އަހަރު ދުވަހުގެ އެއްބަސްވުމެއްގެ ދަށުން ކަމަށް މީޑިއާތަކުގައި ވަނީ ބުނެފައެވެ. އެ ކުލަބަށް ބަދަލުވުމުގެ ގޮތުން ފުރިހަމަކުރަން ޖެހޭ މެޑިކަލްގެ ކަންކަން މިހާރު އުމްޓީޓީ ފުރިހަމަކޮށްފައި ވާކަމަށް ވެސް ވަނީ ބުނެފައެވެ.
އުމުރުން 29 އަހަރުގެ ކުޅުންތެރިޔާ ވަނީ ބާސެލޯނާއަށް ޖުމުލަ 133 މެޗުގައި ދެ ލަނޑު ޖަހައިދީފައެވެ. ބާާސެލޯނާގައި ހުރުމަށްފަހު އޭނާ ވަނީ ލޯނު އެއްބަސްވުމެއްގެ ދަށުން ލީސްއަށް ވެސް ކުޅެފައެވެ. ބާސެލޯނާއާއެކު އުމްޓީޓީ ވަނީ ދެ ސްޕެނިޝް ލީގު، ތިން ކޮޕަ ޑެލް ރޭ އަދި ދެ ސްޕެނިޝް ސުޕަ ކަޕް ކާމިޔާބުކޮށްފައެވެ.
