ސިންގަޕޫރުގައެއް ނުހިފަހައްޓާ، ނުފުރޭ ގޮތެއްވެސް ނުހަދާ، އެޚަބަރު ފެތުރީ ޑިމޮކްރަޓްސްއިން: ސިޔާމް

ސިންގަޕޫރުގެ ހައިކޯޓުގައި ސަން ޓްރެވަލްސްއާ ދެކޮޅަށް ހިލްޓަން އިންޓަރނޭޝަނަލްއިން އުފުލާފައިވާ ދައުވާގެ އަޑުއެހުންތަކަށް ހާޒިރުވެވަޑައިގަތުމަށް ސަން ކުންފުނީގެ ވެރިޔާ އަދި އެމްޑީއޭގެ ލީޑަރު އަހްމަދު ސިޔާމް މުހައްމަދު އެ ގައުމަށް ވަޑައިގަތުމުން ހިފަހައްޓާފައިވާކަމަށް ބުނެ، ފަތުރާފައިވަނީ ދޮގު ޚަބަރެއްކަމަށް ސިޔާމް ވިދާޅުވެއްޖެއެވެ.

ރާއްޖޭގެ ބައެއް މީޑިޔާތަކުން ވަނީ، ސިޔާމްގެ ޕާސްޕޯޓު ހިފަހައްޓައި ސިންގަޕޫރުން ފުރާވަޑައިގަތުން މަނާކޮށްފައިވާކަމަށް ރިޕޯޓްކޮށްފައެވެ. ސިންގަޕޫރުން ރާއްޖެވަޑައިގެން ވެލާނާ އިންޓަރނޭޝަނަލް އެއަރޕޯޓުގައި ނޫސްވެރިންނާ ބައްދަލުކުރައްވައި ސިޔާމް ވިދާޅުވީ، އެއީ ދޮގުވާހަކަތަކެއް ކަމަށެވެ. ސިޔާމް ވިދާޅުވީ ސިންގަޕޫރުން އެމަނިކުފާނުގެ ޕާސްޕޯޓް ހިފަހައްޓައި، ނޫނީ ސިންގަޕޫރުގައި ބަންދުކޮށް، ނޫނީ ނުފުރޭ ގޮތް ހަދާފައި ނުވާކަމަށެވެ. އެ ޚަބަރު ފެނިވަޑައިގަތީ މީޑިޔާއިން ކަމަށް ސިޔާމް ވިދާޅުވިއެވެ.

ސިޔާމް ވަނީ މި ޚަބަރު ގެނައުމުން އެކަމާ ގުޅިގެން ނޫސްވެރިންނަށް ވަރަށް ބޮޑަށް ފާޑުވިދާޅުވެފައެވެ. ސިޔާމް ވިދާޅުވީ އެވާހަކަތައް ފެތުރީ ރައްޔިތުންގެ މަޖިލީހުގެ ރައީސް ރައީސް މުހައްމަދު ނަޝީދު އުފައްދަވާފައިވާ ދަ ޑިމޮކްރަޓްސްއިން ކަމަށެވެ.

ސިންގަޕޫރުގައި ހުންނެވިއިރު، ހިލްޓަން މައްސަލާގައި ބޭއްވި ޝަރީއަތްތަކާ ގުޅޭގޮތުން ނޫސްވެރިން ސުވާލު ދެންނެވުމުން ސިޔާމް ވިދާޅުވީ އެއަށް ޖަވާބު ދެއްވާނީ އޭނާގެ ވަކީލުން ކަމަށެވެ.