އީއައިއޭ ނުހަދާ މަސައްކަތް ފެށުމާ ގުޅިގެން ފެނަކަ ހަ ލައްކަ ރުފިޔާއިން ޖޫރިމަނާކޮށްފި

ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމަކާ ނުލައި 05 ރަށެއްގެ އިންޖީނުގެ އެޅުމުގެ މަސައްކަތް ފެށުމާ ގުޅިގެން ފެނަކަ ކޯޕަރޭޝަން ލިމިޓެޑް ހަ ލައްކަ ރުފިޔާއިން ޖޫރިމަނާކޮށްފި އެވެ.

އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިން ނެރުނު ބަޔާނެއްގައި ބުނީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން އެކުލަވާލައި އާންމުކޮށްފައިވާ ގަވާއިދު ''ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމާއި ބެހޭ ގަވާއިދު 2012ގެ ދަށުން ހުއްދަ ހޯދުމަކައިނުލައި ހއ.ތަކަންދޫ، ހދ ފިނޭ، ނ.ހެނބަދޫ، ނ.މާޅެންދޫ، އަދި ބ.ކެންދޫ އިންޖީނުގެ އެޅުމުގެ މަސައްކަތް 2017 އަދި 2018 ވަނަ އަހަރުގެ ތެރޭގައި ކުރިއަށް ގެންގޮސްފައިވާ ކަމަށެވެ.

އެހެންކަމުން ގަވާއިދުގެ 20 ވަނަ މާއްދާގެ (ހ)ގެ ދަށުން 600،000 (ހަލައްކަ) ދިވެހި ރުފިޔާއިން ޖުރިމަނާކޮށްފައިވާ ކަމަށް އީޕީއޭއިން ބުންޏެވެ. އަދި މިޖޫރިމަނާއަށްވާ ފައިސާ 30 ދުވަހުގެ ތެރޭގައި މިއެޖެންސީއަށް ދެއްކުމަށް ވަނީ އަންގާފައެވެ.

މީގެ އިތުރުން އީޕީއޭއިން ބުނީ މިޖޫރިމަނާ ކަނޑައެޅުމުގައި ފެނަކަ ކޯޕަރޭޝަން ލިމިޓެޑުން 2019 ވަނަ އަހަރުގެ ޖަނަވަރީ އަދި އޭޕްރީލް މަހުގައި މިއެޖެންސީއަށް ލިބުނު މައުލޫމާތަށް ބަލާފައިވާ ކަމަށެވެ.

އެގޮތުން 30 ޖަނަވަރީ 2019 ގައި ފެނަކައިން ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމަކާނުލާ 05 ރަށުގެ އިންޖީނު އެޅުމުގެ މަސައްކަތްކުރިއަށް ގެންގޮސްފައިވާ ކަމަށް އެއްބަސްވެ އެކަމުގެ ފުރިހަމަ މައުލޫމާތު ލިޔުމުން ހިއްސާކޮށްފައިވާ ކަމަށެވެ.

އީޕީއޭއިން ބުނީ މަސައްކަތް ހިންގާފައިވާ ފަރާތުގެ ހައިސިއްޔަތުން ފެނަކަ ކޯޕްރޭޝަނުން ޒިންމާވާންޖެހޭ ކަމަށެވެ.