އެމަނިކުފާނު ވެރިކަމަށް ވަޑައިގެންނެވީ ގިނަ ބައެއްގެ އެހީތެރިކަމާއެކު ކަމަށާއި، އެއްވެސް ބަޔަކަށް ދެރަ ގޮތެއް ނުހައްދަވާނެ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.

ބުރާސްފަތި ދުވަހުގެރޭ ހުޅުމާލޭގައި ބޭއްވި އެމްޑީޕީގެ ކެންޕެއިން ހަރަކާތުގައި ބައިވެރިވެވަޑައިގެން ރައީސް ސޯލިހު ވިދާޅުވީ އެމަނިކުފާނު ވެރިކަމަށް ވަޑައިގަތީ ވަރަށް ގިނަ ބައެއްގެ އެހީތެރިކަމާއެކު ކަމަށެވެ. މި ވެރިކަން ގެނައުމަށް އެމްޑީޕީގެ އިތުރުން ޖުމްހޫރީ ޕާޓީއާ އަދާލަތު ޕާޓީއާ ރައީސް މައުމޫނުގެ އިތުރުންވެސް އެތައް ބަޔަކު ވަރަށް ބޮޑު ގުރުބާނީތަކެއް ވިކަން އެމަނިކުފާނު ފާހަގަކުރެއްވިއެވެ.

ރައީސް ސޯލިހު ވިދާޅުވީ ރައްޔިތުން ވީ ގުރުބާނީ ދުވަހަކުވެސް ހަނދުމަފުޅު ނައްތަވާ ނުލައްވަވާނެ ކަމަށާއި، އަދި ގުޅިގެން މަސައްކަތް ކުރި ބަޔަކު ބާކީކޮށް ދެރަގޮތެއް ވެސް ނުހައްދަވާނެ ކަމަށެވެ.

''އަޅުގަނޑު މިމަގާމުގައި ހުރި ހުރިހާ ހިނދަކު އެއިން އެއްވެސް ބޭފުޅަކަށް އެއިން އެއްވެސް ޕާޓީއަކަށް ދެރަ ގޮތެއް ވިޔަ ނުދޭނަން. އަދި އަޅުގަނޑު ކުރާ މަސައްކަތުގައި އެއިން އެއްވެސް ބޭފުޅަކު ބާކީ ވެގެން ވެސް ނުދާނެ. އަޅުގަނޑު ވެރިކަމަށް އައީ އެހުރިހާ ބޭފުޅުންނާއެކު އަޅުގަނޑުމެން ވީ ވައުދުތަކާއެކު'' ރައީސް ސޯލިހު ވިދާޅުވިއެވެ.

ރައީސް ސޯލިހު ވިދާޅުވީ ވެރިކަމަށް ވަޑައިގެންނެވީ ރައްޔިތުންނަށްޓަކައި ގައުމު ކުރިއަރަވަން ކަމަށާއި، މިމަސައްކަތުގައި ދެމިހުންނަވާނެ ކަމަށެވެ.