ޕެރިސް ސެއިންޓް ޖާމަން (ޕީއެސްޖީ)ގެ ގޯލްކީޕަރު ޖިއަންލުއިޖީ ޑޮނަރޫމާ އާއި އޭނާގެ ބައިވެރިޔާ އެލެސިއާ އެލިފެންޓޭ އަށް ޕެރިހުގައި ހުންނަ އެ މީހުންގެ ގޭގައި ހުކުރު ދުވަހުގެ ފަތިހު ބަޔަކު ހަމަލާދީ އެމީހުންގެ ބައެއް އަގުބޮޑު ތަކެތި ފޭރި ފައިވާ ކަމަށް ރިޕޯޓްކޮށްފިއެވެ.

ފަރަންސޭސި ވިލާތުގެ ވެރިރަށުގައި އެދެމަފިރިން ގޭގައި ބަނދެފައި ތިބި ނަމަވެސް، އެ ދެމަފިރިން ވަނީ ފިލައިގެން ކައިރީގައި ހުރި ލަގްޒަރީ ހޮޓަލަކަށް ގޮސްފައެވެ. އެއަށްފަހު އެ ދެމީހުން ވަނީ ހޮސްޕިޓަލަށް ގެންގޮސްފައެވެ. ޑޮނަރޫމާއަށް ކުދި ޒަހަމްތަކެއް ލިބިފައިވާއިރު އެލިފެންޓޭއަށް އެއްވެސް ގެއްލުމެއް ލިބިފައެއް ނުވެއެވެ.

ޑޮންނަރޫމާގެ ފްލެޓުގައި އޯގަނައިޒްޑް ގޭންގަކުން ހަތިޔާރާއެކު ފޭރުމާއި މާރާމާރީތައް ހިންގި ކަމުގެ ތުހުމަތުގައި ފުލުހުންގެ ތަހުގީގެއް ފަށާފައިވާ ކަމަށް ޕެރިސް ޕްރޮސެކިއުޓާ އޮފީހުގެ ބަޔާނުގައިވެއެވެ. އެމީހުން ވަނީ ފަސް ލައްކަ ޔޫރޯގެ އަގުހުރި ގަހަނާއާއި ލަގްޒަރީ ކޮތަޅާއި ގަޑި ނަގާފައި ކަމަށް މައުލޫމާތު ލިބެއެވެ.

އުމުރުން 24 އަހަރުގެ ޑޮނަރޫމާ ޕީއެސްޖީއާ ގުޅުނީ 2021 ވަނަ އަހަރު އެވެ. އޭނާ ވަނީ އެ ކުލަބުގައި ހޭދަކުރި ދެ ސީޒަނުގައި ވެސް ޕީއެސްޖީ އާއެކު ލީގު ޗެމްޕިއަންކަން ހޯދައިފައެވެ. އުމުރުން އެންމެ 16 އަހަރުގައި އޭސީ މިލާނާއެކު ސީނިއާ ކެރިއަރު ފަށާފައިވާއިރު، އޭނާ ވަނީ 251 މެޗު ކުޅެފަ އެވެ. އިޓަލީއަށް ވެސް އޭނާ ވަނީ 54 މެޗު ކުޅެދީފައެވެ.

މިއީ ޕީއެސްޖީގެ ކުޅުންތެރިއަކަށް އަމާޒުވި ފުރަތަމަ ފަހަރެއް ނޫނެވެ. 2021 ވަނަ އަހަރުގެ މާޗް މަހު ޑިފެންޑަރު މާކުއީނޯސްގެ ގެއިންވެސް ވަނީ ވައްކަން ކޮށްފައެވެ. މީގެއިތުރުން، ތިއާގޯ ސިލްވާ، ޑި މާރިއާ، ކިމްޕެމްބޭ އަދި އިކާޑީގެ ގެއިންވެސް ވަނީ މީގެކުރިން ވައްކަން ކޮށްފައެެވެ.