މެންޗެސްޓަރ ޔުނައިޓެޑުގެ އައު ކެޕްޓަނަކަށް ބްރޫނޯ ފެނާންޑޭސް ހަމަޖައްސައިފިއެވެ.

މިދިޔަ ހަފްތާގައި ޔުނައިޓެޑުން ވަނީ ހެރީ މެގުއާ ކެޕްޓަން ކަމުން ވަކިކޮށްފައެވެ. ޓެން ހާގްގެ ފުރަތަމަ ސީޒަނުގައި މެގުއާ ވެގެންދިޔައީ ފަސް ވަނަ ޗޮއިސް ސެންޓަ ބެކަށެވެ. ލިސާންޑްރޯ މާޓިނޭޒް، ރަފައެލް ވަރާން، ވިކްޓަރ ލިންޑެލޯފް އަދި ލޫކް ޝޯ އަށް ވަނީ އެ މަގާމަށް މެގުއާ އަށްވުރެ އިސްކަން ދީފައެވެ.

ޕޯޗުގަލްގެ މިޑްފީލްޑަރު 2020 ވަނަ އަހަރުގެ ޖެނުއަރީ މަހު ސްޕޯޓިން ކްލަބުން ޔުނައިޓެޑާ ގުޅުނު އިރު، އޭނާ ވަނީ އޮލެ ގަނަ ސޯލްޝެއާގެ ޓީމުގައި މުހިންމު ކުޅުންތެރިއެއްގެ ގޮތުގައި ވަރަށް އަވަހަށް ފެނިގެން ގޮސްފައެވެ. 2019-20 ވަނަ އަހަރުގެ ސީޒަނުގައި ގަދަ ހަތަރަކުން ޖާގަ ހޯދާ، 2020-21 ވަނަ އަހަރުގެ ޕްރިމިއާ ލީގުގެ ދެވަނަ ހޯދި ޔުނައިޓެޑު ޓީމުގެ އެންމެ މުހިންމު އެއް ކުޅުންތެރިޔަކީ ބްރޫނޯ އެވެ.

ކުލަބުން ނެރުނު ބަޔާނެއްގައި ބުނެފައިވަނީ، ޕޯޗުގަލްގެ މިޑްފީލްޑަރު މީގެ ކުރިން ވެސް އެތައް ފަހަރެއްގެ މަތިން ޔުނައިޓެޑުގެ ކެޕްޓަން ބޭންޑް އަޅާފައިވާއިރު، މިހާރު ދާއިމީ ގޮތެއްގައި ކެޕްޓަންކަން ހަވާލުކޮށްފައިވާ ކަމަށެވެ. ޔުނައިޓެޑާ ގުޅުމަށްފަހު އޭނާ ވަނީ 185 މެޗު ކުޅެދީ، 64 ލަނޑު ޖަހާ، 54 ލަނޑު ޖެހުމަށް އެހީތެރިވެދީފައެވެ. މީގެއިތުރުން އޭނާ ވަނީ ޔުނައިޓެޑުގެ މޮޅު ކުޅުންތެރިޔާގެ އެވޯޑް ދެފަހަރު ހޯދާފައެވެ.

ޔުނައިޓެޑުގެ ކެޕްޓަންކަމާ ރަސްމީކޮށް ހަވާލުވުމަށްފަހު، ފުރަތަމަ މެޗުގައި ބްރޫނޯ އާއި ޔުނައިޓެޑު ނިކުންނާނީ އާސެނަލް އާ ދެކޮޅަށެވެ. ޕްރީ ސީޒަންގެ މި މެޗު ކުޅުމަށް ހަމަޖެހިފައިވަނީ ހޮނިހިރު ދުވަހުއެވެ.