ފުއްގިރި ހިޔާނާތް: އެމްއެމްޕީއާރްސީގައި އޮތް މީޓިންއަކާ ގުޅޭގޮތުން އަދީބުގެ ބޮޑީގާޑުގެ ހެކިބަސް ނަގައިފި

ރ ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް, ރިޝްވަތު ނެގި މައްސަލައިގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި އަޑުއެހުމުގައި އޮތީ ދައުލަތުގެ ހެކިންގެ ހެކިބަސް ނެގުމެވެ.

މެލޭޝިއާގައި ހުންނަ ހައިކޮމިޝަން މެދުވެރިކޮށް މި އަޑުއެހުމުގައި ހެކިވެރިއެއްގެ ގޮތުގައި ހާޒިރު ކޮށްފައިވަނީ އަހުމަދު އާމިރެވެ.

އޭނާއަކީ އެމްއެންޑީއެފްގައި އެސްޕީޖީގައި އޭރު ނައިބްރައީސް އަހުމަދު އަދީބުގެ ސެކިއުރިޓީ ބެލެހެއްޓުުމުގައި ޙަރަކާތްތެރިވި އޮފިސަރެވެ.

ހެކިބަސް ދެމުން އޭނާ ބުނީ، އަހުމަދު އަދީބާއެކު އެމްއެމްޕީއާރްސީ އޮފީހަށް އޭރު ގޮސް އުޅުނު ކަމަށެވެ.   

އޭނާ ވަނީ ކްރިކް ރިޒާއާއި، އަލީ މައުރޫފާއި އިތުރު ބޭފުޅުން އެމްއެމްޕީއާރްސީގައި އޮތް ބައްދަލުވުމެއްގައި ބައިވެރިވި މަންޒަރު ފެނިފައިވާކަމަށް ބުނެފައެވެ.

އެ ދުވަހު ލޮބީގައި މަޑުކޮށްގެން ހުއްޓައި އޭނާގެ ދަބަސް ގެނެސްދިނުމަށް އަދީބު އެދުނު ކަމަށާއި، މީޓިންގ ރޫމަށް ވަންއިރު ކްރިކް ރިޒާއާއި މައުރޫފުއާއި، ޝިފާއު ކިޔާ މީހަކާއި، ސާލިމް ކިޔާ މީހެއް (މީދޫ ދާއިރާގެ މެމްބަރު ސިޔާމްގެ ކޮއްކޮއެއް) އަދި އަބްދުﷲ ޒިޔަތު އެ ބައްދަލުވުމުގައި ތިބިކަމަށް އޭނާ ބުންޏެވެ.

މި މައްސަލައިގައި ކްރިކް ރިޒާގެ މައްޗަށް ކޮށްފައިވާ ދައުވާތައް ދައުލަތުން ވަނީމިވަގުތަށްއަނބުރާ ގެންގޮސްފައެވެ. އެއީ ކްރިކް ރިޒާ 31 ދުވަހުގެ މެޑިކަލްއެއް ހުށައަޅާފައި ވުމުގެ ސަބަބުން މި މައްސަލަ ލަސްވާތީއާއި، ކްރިކްގެ ފަރާތުން ހުށައަޅާފައިވާ ދިފާއީ ހެއްކާ ގުޅޭގޮތުން އިތުރަށް ބަލަންޖެހޭ ކަންތައްތަކެއް ހުރުމުގެ ސަބަބުންނެވެ.

ވުމާއެކު، މިހާރު ކުރިއަށްދަނީ ކުރީގެ ރައީސް އަބްދުﷲ ޔާމީނާއި، ސަން އިންވެސްޓްމަންޓް އަދި ސަން ކޮންސްޓްރަކްޝަންގެ މައްޗަށް ކޮށްފައިވާ ދައުވާތަކުގެ އަޑުއެހުންތަކެވެ.

މި މައްސަލައާ ގުޅިގެން އަހުމަދު ސިޔާމްއާއި އަލީ މައުރޫފުގެ ހެކިބަސް އިތުރަށް ނަގަން ބޭނުން ނުވާކަމަށް ދައުލަތުން ބުނެއެވެ.

ގާޒީ ވިދާޅުވީ، ދައުލަތުގެ ހެއްކެއްކަމަށްވާ މުޙައްމަދު ޝިފާއުއާ ޗިޓް ރައްދުކުރެވިފައި ނުވާ ކަމަށާއި، އޭނާ ދިރިއުޅެނީ ރާއްޖެއިން ބޭރުގައި ކަމަށެވެ. އެމްބަސީ މެދުވެރިކޮށް އޭނާގެ ހެކިބަސް ނެގުމަށް މަސައްކަތް ކުރާނެކަމަށް ދައުލަތުން ބުންޏެވެ.

ދައުލަތުގެ ހެއްކެއްކަމަށްވާ އަހުމަދު ޝާކިރުއާއި، މުހައްމަދު ހުސައިންފުޅު ވަނީ ހެކިބަސް ދޭން ބޭނުންނުވާކަމަށް ބުނެ ކޯޓަށް ސިޓީއެއް ފޮނުވާފައެވެ. ދައުލަތުންވެސް ވަނީ އެމީހުންގެ ހެކިބަސް ނަގަން އިތުރަށް ބޭނުން ނުވާކަމަށް ބުނެފައެވެ.

ވުމާއެކު، ދެން ތިބޭނީ ދައުލަތުގެ ދެ ހެއްކެކެވެ.