ރައީސް ވިދާޅުވީ އަބަދުވެސް އެމްޑީޕީއާ ބައެއް ބޭފުޅުން ވަކިވެވަޑައިގެންފައި ވާކަމަށް
ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު
އެމްޑީޕީ ރޫޅައެއް ނުލެވޭނެކަމަށާއި އެމްޑީޕީ ދާނީ ކުރިޔަށްކަމަށް އެޕާޓީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
މ އަދި ވ އަތޮޅަށް ކުރެއްވި ކެމްޕެއިން ދަތުރުފުޅު ނިންމަވާލައްވައި ނޫސްވެރިންނާ ވާހަކަފުޅުދައްކަވަމުން، އެމްޑީޕީ ބައިބައިވެދާނެތޯ ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން ރައީސް ވިދާޅުވީ، އެމްޑީޕީ ބައިބައި ނުވާނެކަމަށެވެ. އަބަދުވެސް އެމްޑީޕީއާ ބައެއް ބޭފުޅުން ވަކިވެވަޑައިގެންފައި އެބަހުރިކަމަށެވެ. ލީޑަރޝިޕުންވެސް ބައެއް ފަރާތްތައް އަބަދުވެސް ދާކަމަށް ރައީސް ވިދާޅުވިއެވެ.
ނަމަވެސް އަބަދުވެސް އެމްޑީޕީ އެސިޔާސަތުގެ ދަށުން ކުރިޔަށްދާކަމަށް ރައީސް ވިދާޅުވިއެވެ.
އެމްޑީޕީގެ ކުރީގެ ރައީސް މުހައްމަދު ނަޝީދު އުފެއްދެވި ޑިމޮކްރަޓްސްއަށް ސޮއިކުރެއްވުމަށް ބޭއްވި ޖަލްސާގައި ވާހަކަފުޅުދައްކަވަމުން ނަޝީދު ވިދާޅުވީ އެމްޑީޕީ ރޫޅާލާނެކަމަށެވެ. ނަޝީދުގެ އެވާހަކައަށް ރައީސް މިމޭރުމުން ރައްދު ދެއްވިއިރު އެ ޕާޓީގެ ޗެއަރޕާސަން ފައްޔާޒު އިސްމާއީލް ވަނީ އެއީ ޒާތީ ކަމެއްގެ ގޮތުގައި ސިފަކުރައްވާފައެވެ.
