ރައީސް ވިދާޅުވީ ރަނިންގ މޭޓެއް ކަނޑައެޅުމަކީ އުނދަގޫ ނިންމުމަކަށް ވެފައިވާކަމަށް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަދި ނައިބު ރައީސް ފައިސަލް ނަސީމް
ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރަނިންގ މޭޓެއް ކަނޑައެޅުމުގެ މަޝްވަރާތައް ޕާޓީގެ އިސްފަރާތްތަކާއެކު ކުރެވެމުންދާކަމަށާއި އެކި ނަންތައް ލިބެމުންދާކަމަށް ރައީސުލްޖުމްހޫރިއްޔާ ވިދާޅުވެއްޖެއެވެ.
ކެމްޕެއިނަށް މ އަދި ވ އަތޮޅަށް ކުރެއްވި ދަތުރުފުޅު ނިންމަވާލައްވަމުން ނޫސްވެރިންނާ ބައްދަލުކުރައްވާ ވާހަކަދައްކަވަމުން ރައީސް ވިދާޅުވީ ރަނިންގ މޭޓެއް ކަނޑައެޅުމަކީ އުނދަގޫ ނިންމުމަކަށް ވެފައިވާކަމަށެވެ.
ކުރިޔަށް އޮތް ރިޔާސީ އިންތިޚާބަށް އެމްޑީޕީ އާއެކު މިހާރުވެސް ސަރުކާރުގައި އޮތް އަދާލަތު ޕާޓީ ކޯލިޝަން ހަދާފައިވާއިރު އެމްޑީއޭވެސް ވަނީ އެމްޑީޕީއާއެކު ކޯލިޝަން ހަދާފައެވެ.
ރައީސް ވިދާޅުވީ އެ ކޯލިޝަނުގެ ތެރެއިން ރަނިން މޭޓެއް ކަނޑައެޅުއްވުމުގެ ފުރުސަތު ވެސް އެބައޮތް ކަމަށެވެ.
2018 ވަނަ އަހަރު އޮތް ރިޔާސީ އިންތިޚާބު އެމަނިކުފާނު ކާމިޔާބު ކުރެއްވީ ޖުމްހޫރީ ޕާޓީގެ ފައިސަލް ނަސީމް އާއެކު ނުކުންނަވައިގެންނެވެ. އެކަމަކު މި އިންތިޚާބުގައި ރައީސާއެކު ކޯލިޝަން ނުހަދައި، ޖޭޕީން ނިންމާފައިވަނީ ވަކިން ވާދަކުރުމަށެވެ. މިގޮތުން، ޖޭޕީގެ ރިޔާސީ ޓިކެޓު ވަނީ އެ ޕާޓީގެ ލީޑަރު ގާސިމް އިބްރާހިމަށް އަރުވާފައެވެ.
