ދީނާ ގުޅުންހުރި ކަންކަމުގައި މިސްރާ ގުޅިގެން ކުރެވޭނެ ކަންކަމާ ގުޅޭގޮތުން މަޝްވަރާކޮށްފި
ދެގައުމުގެ ދެމެދުގައި އޮތް ގާތް އެކުވެރި ގުޅުމާ ގުޅޭގޮތުން ދެބޭފުޅުން މަޝްވަރާކުރެއްވި
މިސްރުގެ އޭޝިއަން އެފެއަރޒްގެ އެސިސްޓެންޓް މިނިސްޓަރ އައިމަން ކާމިލް، މިނިސްޓަރ އޮފް އިސްލާމިކް އެފެއާޒް ޑރ. އަހުމަދު ޒާހިރު އަލީއާ ބައްދަލުކުރެއްވުން
އިސްލާމްދީނާ ގުޅޭ އެކިއެކި ކަންކަމުގައި މިސްރުގެ ސަރުކާރާއި ރާއްޖޭގެ އިސްލާމިކް މިނިސްޓްރީއާ ގުޅިގެން ކުރެވޭނެ ކަންކަމާ ގުޅޭގޮތުން މަޝްވަރާކޮށްފިއެވެ.
ރާއްޖެއާ މިސްރާ ދެމެދު ބާއްވާ، ސިޔާސީ ކަންކަމާބެހޭ މަޝްވަރާތަކުގެ ދެވަނަ ބައްދަލުވުމަށް، މިސްރުގެ އޭޝިއަން އެފެއަރޒްގެ އެސިސްޓެންޓް މިނިސްޓަރ އައިމަން ކާމިލް ވަނީ ރާއްޖެ ވަޑައިގެންފައެވެ.
އެމަނިކުފާނު ރާއްޖެއަށް ކުރައްވަމުންގެންދަވާ ދަތުރުފުޅުގައި ވަނީ މިނިސްޓަރ އޮފް އިސްލާމިކް އެފެއަރޒް ޑރ. އަހުމަދު ޒާހިރު އަލީއާ ބައްދަލުކުރައްވާފައެވެ.
މި ބައްދަލުވުމުގައި ދެ ގައުމުގެ ދެމެދުގައި އޮތް ގާތް އެކުވެރި ގުޅުމާއި، އެ ގުޅުން އިތުރަށް ބަދަހިކުރެވޭނެ ގޮތާ ގުޅޭގޮތުން މަޝްވަރާކުރެއްވިއެވެ. އަދި އިސްލާމްދީނާގުޅޭ އެކިއެކި ކަންކަމުގައި މިނިސްޓްރީއާ ގުޅިގެން ކުރެވިދާނެ ކަންކަމާ ގުޅޭގޮތުން ވަނީ މަޝްވަރާކުރައްވާފައެވެ.
މިސްރާ ރާއްޖެއާ ދެމެދު އޮތް ޒަމާންވީ ގުޅުން އިތުރަށް ބަދަހިކުރުމަށް މިހާތަނަށް ގިނަ މަސައްކަތްތަކެއް ކޮށްފައިވާއިރު، މިސްރުން ވަނީ އެގައުމަށް ދާ ދިވެހިންނަށް އޮން އެރައިވަލް ވިސާ ދިނުމަށް ނިންމާފައެވެ. މިއީ ދެގައުމުގެ ގާތް ގުޅުން ރަމްޒުކޮށްދޭ ކަމެއްގެ ގޮތުގައި ދިވެހި ސަރުކާރުން ދެކެއެވެ.
