ށ. ނޫމަރާ ބަނދަރު ތަރައްޤީ ކުރުމުގެ އަމަލީ މަސައްކަތް ސެޕްޓެމްބަރު މަހު ފަށާނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާޒިމް ވިދާޅުވީ ނޫމަރާގައި މިހާރު އޮތް ބަނދަރު ބޭނުންކުރުމުގައި ރަށުގެ ރައްޔިތުންނަށް ދަތިތަކާއި ކުރިމަތިވާ ކަމަށެވެ. ކޮންމެ މަސައްކަތަކީ ވެސް އީއައިއޭ ހަދައިގެން ކުރެވޭ މަސައްކަތަކަށްވާއިރު މި މަޝްރޫއުގެ މަސައްކަތް އެމްޓީސީސީއާ ހަވާލުކޮށްފައިވަނީ އީއައިއޭ ހަދައިގެން ކުރިއަށް ގެންދާ ގޮތަށް ކަމަށެވެ.

އާޒިމް ވިދާޅުވީ އެންމެ މަދުވެގެން ދެ މަސް ނޫނީ ތިން މަސް އީއައިއޭ ހެދުމަށް ހޭދަވާ ކަމަށެވެ. ށ. ނޫމަރާ ބަނދަރު ތަރައްޤީކުރުމަށް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ ތެރޭގައެވެ.

މި މަޝްރޫޢުގެ ދަށުން 5076 ކިއުބިކް މީޓަރުގެ ސަރަޙައްދެއްގެ ކުރިން ފުންކޮށްފައިވާ ފަޅު އަލުން ފުންކުރުމާއި، 34,386 ކިއުބިކް މީޓަރުގެ ސަރަޙައްދެއްގެ އައު ހާބަރ ބޭސިން ފުންކުރުމާއި، 2920 ކިއުބިކް މީޓަރުގެ ސަރަޙައްދެއްގެ ނެރު ފުންކުރުމާއި، 302.60 މީޓަރުގެ ސަރަޙައްދެއްގައި ބޭރުތޮށި ލުމާއި، 64 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 177 މީޓަރުގެ ސަރަޙައްދެއްގައި އެއްގަމުތޮށި ލުމާއި، 32 މީޓަރުގެ މިހާރު ހުރި އެއްގަމުތޮށި މަރާމާތު ކުރުމާއި، މޫރިންގ ބޯއީސް ހަރުކުރުމާއި، 11 މީޓަރު ދިގު 11 މީޓަރު ފުޅާ ރޭމްޕެއް ހެދުމާއި، ދެ ޖެޓީއެއް ހެދުމާއި، ބަނދަރު ބައްތި ހަރުކުރުމާއި، 1652 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމާއި، 311 މީޓަރުގެ ސަރަޙައްދެއްގައި ކާރބްސް ހަރުކުރުމުގެ މަސައްކަތް ހިމެނޭ ކަމަށް އެމްޓީސީސިން ބުނެއެވެ.

މި މަޝްރޫއު އެމްޓީސީސީއާ ހަވާލުކޮށްފައި ވަނީ 53.33 މިލިއަން ރުފިޔާއަށް 455 ދުވަހުން ނިންމުމަށެވެ. މި މަސައްކަތް އެމްޓީސީސީއާ ސަރުކާރުން ހަވާލުކޮށްފައިވާއިރު ނޫމަރާގެ ބަނދަރު ބޭނުންކުރުމުގައި ދިމާވާ ދަތިތަކަށް ހައްލު ހޯދައިދިނުމަށް އިސްކަމެއް ދެއްވާނެ ކަމަށް ރައީސް ވަނީ ނޫމަރާ ކައުންސިލާ ބައްދަލުކުރައްވައި ޖޫން މަހު ވިދާޅުވެފައެވެ. ހަމަ އެމަހު އެމްޓީސީސީއާ މި މަޝްރޫއު ހަވާލުކުރެވިގެންދިޔައެވެ.

ބައްދަލުކުރެއްވުމުގައި ނޫމަރާ ކައުންސިލާއި ރައްޔިތުންނަށް އެންމެ ދަތިވާ މައްސަލައެއްގެ ގޮތުގައި ކައުންސިލަރުން ފާހަގަކުރައްވާފައިވަނީ، އެރަށުގެ ބަނދަރުގެ ޖާގައިގެ ދަތިކަމާއި ބަނދަރު ބޭނުންކުރުމުގައި ހުރި ދަތިތަކެވެ.