ވެލެންސިއާ ބަލިކޮށް ޔޫވީއަށް ފުރަތަމަ މޮޅު
16 ޖުލައި 2023 | އާދީއްތަ 00:14މެޗުގެ ހަމައެކަނި ލަނޑު ކާމިޔާބުކޮށްދިނީ ޝަނާން ރަޝާދު
ވެލެންސިއާ އާއި ޔޫވީ ބައްދަލުކުރި މެޗުގެ ތެރެއިން
އެމްޑަބްލިއުއެސްސީ ދިވެހި ޕްރިމިއާ ލީގުގައި ކްލަބް ވެލެންސިއާ ބަލިކޮށް ޔުނައިޓެޑް ވިކްޓްރީ (ޔޫވީ) އިން ފުރަތަމަ މޮޅު ހޯދައިފިއެވެ.
ހޮނިހިރު ދުވަހުގެރޭ ގަލޮޅު ދަނޑުގައި ކުޅުނު މެޗު ޔޫވީ އިން ކާމިޔާބުކުރީ 1-0 ގެ ނަތީޖާއަކުންނެވެ. ދެ ޓީމުގެ ފަރާތުންވެސް ފެނިފައިވަނީ ދާދި ހަމަހަމަ ކުޅުމެކެވެ. މެޗުގެ ހަމައެކަނި ލަނޑު 33 ވަނަ މިނެޓުގައި ކާމިޔާބުކޮށްދިނީ ޝަނާން ރަޝާދެވެ.
ދެވަނަ ހާފު ފެށިގެން ޔޫވީ އިން ވަނީ ކުޅުން އިތުރަށް ރަނގަޅު ކޮށްފައެވެ. މެޗުގެ 49 ވަނަ މިނެޓުގައި ޔޫވީގެ ކުޅުންތެރިޔަކު އޭރިއާ ތެރެއިން ފޮނުވާލި ބޯޅަ ޖެހުނީ ދަނޑީގައެވެ. އެއީ ދެވަނަ ހާފުގައި ޔޫވީ އިން އެންމެ ފާހަގަކޮށްލެވޭ ހަމަލާއެވެ. ވެލެންސިއާ އިންވެސް ވަނީ ލަނޑު ޖަހާނެ ފުރުސަތު ތަނަވަސްކުރަން މަސައްކަތް ކޮށްފައެވެ. ނަމަވެސް، ޔޫވީ ގެ ޑިފެންސް ފޫއަޅުވާލެވޭގޮތެއް ނުވިއެވެ. މެޗުގެ 66 ވަނަ މިނެޓުގައި އޭރިއާ ރޮނގުކައިރިން ޔާމީން ފޮނުވާލި ހިލޭ ޖެހުމެއް ޔޫވީގެ ކީޕަރު ވަނީ މަތަކޮށްފައެވެ.
މެޗުގެ މޮޅު ކުޅުންތެރިޔަކަށް ހޮވިފައިވަނީ ޔޫވީއަށް ލަނޑު ޖަހައިދިން ޝަނާން ރަޝާދެވެ.
މި މޮޅާއެކު ޔޫވީ އިން ވަނީ މި ސީޒަނުގައި ތިން ޕޮއިންޓް ހޯދާފައެވެ. ހަތަރު މެޗު ކުޅެ، ވެލެންސިއާއަށް ޕޮއިންޓެއް ލިބިފައެއް ނުވެއެވެ. ވެލެންސިއާ އޮތީ ތާވަލުގެ ފުލުގައެވެ.
