ޔުނައިޓެޑުގެ ކުރީގެ ތަރި، އޭޝްލީ ޔަންގް އެވަޓަންއަށް

އެއް އަހަރު ދުވަހުގެ އެއްބަސްވުމެއްގެ ދަށުން އެވަޓަންއިން މެންޗެސްޓަރ ޔުނައިޓެޑް އަދި އެސްޓަން ވިލާގެ ކުރީގެ ކުޅުންތެރިޔާ، އޭޝްލީ ޔަންގް ސޮއިކޮށްފިއެވެ.

އުމުރުން 38 އަހަރުގެ ޔަންގް އަކީ އެވަޓަންގެ ކޯޗު ޝޯން ޑައިޗޭގެ އިރުޝާދުގެ ދަށުން އެވަޓަން އަށް ސޮއިކުރި ފުރަތަމަ ކުޅުންތެރިޔާއެވެ. ސްވިޒަލޭންޑްގައި ކުރިއަށްދާ ޕްރީ ސީޒަން ޓްރެއިނިންގ ކޭމްޕްގައި އެވަޓަން އާއެކު ޔަންގް ބައިވެރިވާނެއެވެ. އޭނާ ހޯދުމަށް ޕްރިމިއަރ ލީގަށް ކޮލިފައިވި ލޫޓަން ޓައުން އާއި ސައުދީ ލީގުގެ ބައެއް ކުލަބުތަކުންވެސް މަސައްކަތް ކުރިއެވެ.

މިދިޔަ ޖެނުއަރީ މަހު މަގާމުން ވަކިކުރި ފްރޭންކް ލަމްޕާޑްގެ ބަދަލުގައި ބާންލީގެ ކުރީގެ ކޯޗު ޑައިޗޭ ކޯޗުކަމާ ހަވާލުވެ، ސީޒަނުގެ ފަހު ދުވަހު ރެލިގޭޝަނުން އެ ޓީމު ސަލާމަތް ކޮށްދިނެވެ.

ޔަންގް ވަނީ މެންޗެސްޓަރ ޔުނައިޓެޑާއެކު ޔުރޮޕާ ލީގުގެ އިތުރުން ލީގު ކަޕު ކާމިޔާބުކޮށްފައެވެ. އަދި އިންގްލެންޑަށް 39 މެޗު ކުޅެދިންއިރު، 2018 ވަނަ އަހަރުގެ ވޯލްޑް ކަޕު ކުޅެފައިވެއެވެ. ސެމީ ފައިނަލުގައި އިންގްލެންޑު ބަލިވީ ކްރޮއޭޝިއާ އަތުންނެވެ. ޔަންގް ވަނީ ކުލަބާއި ގައުމަށް 700 އަށް ވުރެ ގިނަ މެޗު ކުޅެދީފައެވެ. އޭގެތެރެއިން 32 މެޗަކީ މިދިޔަ ސީޒަނުގައި އެސްޓަން ވިލާއަށް ކުޅެދިން މެޗުތަކެވެ.

ހޯމަ ދުވަހު އެވަޓަން ސްވިޒަލޭންޑަށް ދަތުރުކުރާނީ ފަސް ދުވަހުގެ ޓްރެއިނިންގ ކޭމްޕެއް ފުރިހަމަ ކުރުމަށެވެ.