އެއިޑްސް ނައްތާލުމަށް ގައުމުތަކުން ރަނގަޅު ނިޔަތެއް އޮވެ ބަލިން ދިފާއުވުމަށާއި ފަރުވާއަށް އިންވެސްޓްކޮށް، ތަފާތުކުރުންތައް ނައްތާލުމުގެ ގާނޫނަށް އަމަލުކުރާނަމަ 2030 ވަނަ އަހަރު އަންނަންވާއިރަށް އެކަން ވާނެކަމަށް އދ ން ބުނެފިއެވެ.

ޔުނައިޓެޑް ނޭޝަންސް އެއިޑްސް ޕްރޮގްރާމުން އަންދާޒާކުރާ ގޮތުގައި 2022 ވަނަ އަހަރު ދުނިޔޭގައި 39 މިލިއަން މީހުން ދިރިއުޅެމުން ގޮސްފައިވަނީ އެޗްއައިވީ އާއެކުއެވެ. އެޗްއައިވީ އަށް ރަނގަޅަށް ފަރުވާ ނުކުރެވިއްޖެނަމަ ދެން ބަދަލުވެގެންދާނީ އެއިޑްސް ބައްޔަށެވެ.

ޔުނައިޓެޑް ނޭޝަންސް އެއިޑްސް ޕްރޮގްރާމުން ބުރާސްފަތި ދުވަހު ޕަބްލިޝް ކުރި ރިޕޯޓްގައި ބުނެފައިވަނީ އެޗްއައިވީން ސަލާމަތްވުމަށް ރައްކާތެރިކަމުގެ ވަރުގަދަ ފިޔަވަޅުތައް އަޅައި، ބައްޔަށް ފަރުވާކުރުމުގެ ޕްރޮގްރާމްތައް ހިންގާ ގައުމުތަކުގެ ލީޑަރޝިޕުތަކުން އަމަލުކުރާ ގޮތް ބަލައިގެން އެގޮތަށް ކަންކުރާނަމަ މިބައްޔަށް ހައްލު އެބައޮތްކަމަށެވެ.

ރިޕޯޓްގައި ބުނެފައިވަނީ އެޗްއައިވީން ސަލާމަތްވުމަށް ތަފާތުކުރުން ނައްތާލުމުގެ ގާނޫނުތައް ތަންފީޒުކޮށް، މުޖުތަމައުތައް ބާރުވެރިކުރުވަން ޖެހޭކަމަށެވެ. އެޗްއައިވީ އާއި އެއިޑްސް ޖެހިފައިވާ މީހުންނަށް ގިނަ ގައުމުތަކުގައި ތަފާތު ކުރުންތަކާއި ހަމަނުޖެހުންތަކާއި ކުރިމަތިލާންޖެހޭކަމަށް ރިޕޯޓްގައި ބުނެފައިވެއެވެ.

ބަލިން ސަލާމަތްވެ ރައްކާތެރިވުމުގައި އެންމެ ބޮޑެތި ކުރިއެރުންތަކެއް ހޯދާފައިވަނީ އެންމެ ބޮޑަށް ފައިސާ އިންވެސްޓްކޮށްފައިވާ ސަރަހައްދުތަކުގައި ކަމަށް ރިޕޯޓްގައި ބުނެފައިވެއެވެ. އެގޮތުން އިރުމަތީ އަދި ދެކުނު އެފްރިކާގެ ގައުމުތަކުގައި އަލަށް އެޗްއައިވީ ޖެހޭ މީހުންގެ އަދަދު 2010 ވަނަ އަހަރުން ފެށިގެން 57 އިންސައްތަ ދަށްކުރެވިފައިވާކަމަށް ރިޕޯޓްގައި ބުނެފައިވެއެވެ.

ނަމަވެސް އިރުމަތީ އޭޝިޔާ އާއި އޭޝިޔާގެ މެދުތެރެއާއި މެދުއިރުމައްޗާއި އުތުރު އެފްރިކާގައި މިބަލި ވަނީ އިތުރުވެފައެވެ.

ޔުނައިޓެޑް ނޭޝަންސް އެއިޑްސް ޕްރޮގްރާމުން ހާމަކޮށްފައިވާ ގޮތުގައި މިދިޔަ އަހަރު އަލަށް 1.3 މިލިއަން މީހުންނަށް އެޗްއައިވީ ޖެހިފައިވެއެވެ. އަދި 630،000 މީހުން ވަނީ އެއިޑްސްއާ ގުޅުންހުރި ބަލިތަކިގައި މަރުވެފައެވެ.