ފިރުމީނިއޯ ބޭނުންކުރި 9 ނަމްބަރު ޖަރޒީ، ޑާވިން ނޫނޭޒްއަށް!

ލިވަޕޫލް ދޫކޮށް, ސައޫދީ އަރަބިއްޔާ ލީގަށް ބަދަލުވި ބްރެޒިލްގެ ފޯވާޑް، ރޮބާޓޯ ފިރުމީނިއޯ ބޭނުންކުރި "އައިކޮނިކް" ނުވަ ނަމްބަރު ޖަރޒީ، އުރުގުއޭގެ ފޯވާޑް ޑާވިން ނޫނޭޒްއަށް ދީފިއެވެ.

މިދިޔަ އަހަރު ޖޫން މަހު ލިވަޕޫލާ ގުޅުނު ފޯވާޑް ބޭނުންކުރަމުން އައީ 27 ނަމްބަރު ޖަރޒީއެވެ. އެކަމަކު ފިރްމީނިއޯގެ ކުރިން ޓޮރޭޒްއާއި, ރޮބީ ފޯވްލާވެސް ބޭނުންކުރި މަޝްހޫރު 9 ނަމްބަރު ޖަރޒީ ހުސްވުމުން, ކުރިއަށް އޮތް ސީޒަނުގައި ޑާވިން ނޫނޭޒް ބޭނުންކުރާނީ އެ ޖަރޒީއެވެ. އެއާއެކު އޭނާ ނިންމާފައިވަނީ އޭނާގެ 27 ނަމްބަރު ޖަހާފައިވާ ލިވަޕޫލްގެ އާ ޖަރޒީ ގަނެފައިވާ ސަޕޯޓަރުންނަށް, އެފައިސާ އަމިއްލައަށް އަނބުރާ ދިނުމަށެވެ. ލިވަޕޫލުން ޑާވިން ނޫނޭޒްގެ ސޮއި ހޯދީ 85 މިލިއަން ޕައުންޑަށެވެ. 24 އަހަރުގެ ފޯވާޑް ވަނީ ފުރަތަމަ ސީޒަންގައި ކޯޗު ކްލޮޕްގެ އިތުބާރު ހޯދާފައެވެ.

ފިރްމީނިއޯ ލިވަޕޫލާއެކު އޮތް އެއްބަސްވުން ހަމަވުމުން ބަދަލުވީ ސައޫދީ އަރަބިއްޔާގެ އަލްއަހުލީއަށެވެ.