އެސްޓަން ވިލާއިން ވިޔަރެއާލަށް ކުޅެމުން އަންނަ ސްޕެއިންގެ ޑިފެންޑަރު، ޕައު ޓޮރެސް އާއެކު އެއްބަސްވުމުގައި ސޮއިކޮށްފިއެވެ.

އޭނާގެ ރިލީޒް ކްލޯޒަކީ 70 މިލިއަން ޔޫރޯ ނަމަވެސް ވިޔަރެއާލްއާ އެކު ހަދާފައިވާ އެއްބަސްވުމުގައި ބާކީ އޮތީ އެންމެ އަހަރެއް ކަމުން، އިނގިރޭސި ޓީމުން އެއްބަސްވީ 36.7 މިލިއަން ޔޫރޯގެ ފީއަކަށެވެ.

އެސްޓަން ވިލާއިން ނެރުނު ބަޔާނެއްގައި ބުނީ ސްޕެއިނަށް 23 މެޗު ކުޅެފައިވާ އުމުރުން 26 އަހަރުގެ ޑިފެންޑަރު ވިލާއާ ގުޅެން ނިންމާފައިވާ ކަމަށެވެ. ޓޮރެސް އަކީ 2021 ވަނަ އަހަރު މެންޗެސްޓަރ ޔުނައިޓެޑު ބަލިކޮށް ޔުރޮޕާ ލީގު ތަށި އުފުލާލި ވިޔަރެއާލް ޓީމުގެ މުހިންމު ކުޅުންތެރިއެކެވެ.

އަންނަ ސީޒަނުގެ ޔުރޮޕާ ކޮންފަރެންސް ލީގަށް ކޮލިފައިވެފައިވާ އެސްޓަން ވިލާ އިން ވަނީ ޓީމު ވަރުގަދަކުރުމަށް މަސައްކަތް ފަށާފައެވެ. އެގޮތުން ލެސްޓާގެ ޓިލެމަންސް ސޮއިކުރުމަށްފަހު، ޓޮރެސް އަކީ މި ހޫނުމޫސުމުގައި އެސްޓަން ވިލާއިން ސޮއިކުރި ދެވަނަ ކުޅުންތެރިޔާއެވެ.