ވިސިޓް މޯލްޑިވްސް ޕްރޯ 2023: ދިފާއީ ޗެމްޕިއަން، ޑޭވް ހާބާޑް މިއަހަރުވެސް ވާދަކުރާނެ
11 ޖުލައި 2023 | އަންގާރަ 11:02އޭނާ އަކީ މިދިޔަ އަހަރުގެ މެންސް އޯޕަން އަދި ޑްރޮޕްނީގެ ޗެމްޕިއަން
ޑޭވް ހަބަރޑް
އޮގަސްޓު މަހު ފެށުމަށް ހަމަޖެހިފައިވާ ވިސިޓް މޯލްޑިވްސް ޕްރޯގައި، މެންސް އޯޕަން އަދި ޑްރޮޕްނީގެ ދިފާއީ ޗެމްޕިއަން ޑޭވް ހާބާޑް ވާދަކުރަން ނިންމައިފިއެވެ.
އެމެރިކާގެ މި އެތުލީޓު މިއަހަރުވެސް ވާދަކުރަން ނިންމާފައިވަނީ މެންސް އޯޕަން އާއި ޑްރޮޕްނީގެ ބައިގައެވެ. މިދިޔަ އަހަރުގެ މެންސް އޯޕަން އޭނާ ކާމިޔާބުކުރީ ފައިނަލުގައި 14.50 ހޯދައިގެނެވެ. އަދި ޑްރޮޕްނީގެ ފައިނަލުގައި އޭނާ ވަނީ 16 ޕޮއިންޓް ހޯދާފައެވެ. ދެ ފައިނަލުގައިވެސް އޭނާއާ ވާދަކުރީ ފްރާންސްގެ އަމައުރީ ލަވާންހޭއެވެ.
ނުވަ ފަހަރު ދުނިޔޭގެ ޑްރޮޕްނީ ޗެމްޕިއަންކަން ހޯދާފައިވާ ހާބާޑު މިވަގުތު ލިސްތްކުރެވިފައިވަނީ ދުނިޔޭގެ ޑްރޮޕްނީ ރޭންކިންގެ އެއްވަނައިގައެވެ. މީގެއިތުރުން، މެންސް އޯޕަން ދުނިޔޭގެ ގަދަ 10 ގައިވެސް އޭނާ ހިމެނެއެވެ.
ވިސިޓް މޯލްޑިވްސް ޕްރޯ 2023 އަކީ މިއަހަރުގެ ވޯލްޑް ޓުއާގައި ހިމެނޭ ފަސްވަނަ މުބާރާތެވެ. ދުނިޔޭގެ ޗެމްޕިއަނަކަށް ވުމަށްޓަކައި ރާއްޖޭގެ މުބާރާތުގައި ވާދަކޮށް، ޕޮއިންޓު ހޯދުން މުހިންމު ވާނެއެވެ. މިއަހަރުގެ މުބާރާތުގައި ޖުމްލަ 20 ގައުމަކުން އެތުލީޓުން ވާދަކުރާނެއެވެ.
