ބައިނަލްއަޤުވާމީ ތަޖުރިބާ އާއެކު ފުޓުބޯޅައިގެ ބޮޑު ހަރަކާތެއް އަލީ ވަހީދުގެ އުފަން ދުވަހު!
11 ޖުލައި 2023 | އަންގާރަ 10:46އެނބުރި ރާއްޖެއަށް ވަޑައިގެންނެވީ ފުޓުބޯޅައިގެ މީހެއްގެ ގޮތުގައިކަން ފާހަގަކުރައްވައި އަލީ ވަޙީދު ވިދާޅުވީ، މިހާރު ބޭނުންވަނީ ދިވެހި ފުޓުބޯޅަ އަށް މަސައްކަތް ކޮށްދެއްވުމަށް ކަމަށް
ކުރީގެ ޓުއަރިޒަމް މިނިސްޓަރު އަދި ނިއު ރޭޑިއަންޓުގެ ކުރީގެ ޗެއާމަން އަލީ ވަޙީދު
ދެ އަހަރަށްވުރެ ގިނަ ދުވަހަށްފަހު އެނބުރި ރާއްޖެ ވަޑައިގެން، ބޮޑު ފޯކަސްއެއް އޮތީ ބައިނަލްއަޤުވާމީ ތަޖުރިބާ އާއެކު ދިވެހި ފުޓުބޯޅަ އަށް މަސައްކަތް ކުރެއްވުން ކަމަށް ކުރީގެ ޓުއަރިޒަމް މިނިސްޓަރު އަލީ ވަޙީދު (ބަލަކް) ވިދާޅުވެއްޖެ އެވެ.
އަލީ ވަޙީދު މިހެން ވިދާޅުވީ އަންގާރަ ދުވަހުގެ މެންދުރު ރާއްޖެ ވަޑައިގެން، ރަސްމީ ފާލަމުގައި ހުންނަވައި ނޫސްވެރިން ކުރެއްވި ސުވާލުތަކަށް ޖަވާބު ދެއްވަމުންނެވެ. އަލީ ވަޙީދު ވިދާޅުވީ އިނގިރޭސި ވިލާތުގައި ހުންނެވި ދުވަސްވަރު ފުޓުބޯޅައިގެ ގިނަ ކަންކަން ދަސްވެފައިވާ ކަމަށެވެ. އެނބުރި ރާއްޖެ ވަޑައިގެންނެވީ ފުޓުބޯޅައިގެ މީހެއްގެ ގޮތުގައިކަން ފާހަގަކުރައްވައި އަލީ ވަޙީދު ވިދާޅުވީ، މިހާރު ބޭނުންވަނީ ދިވެހި ފުޓުބޯޅަ އަށް މަސައްކަތް ކޮށްދެއްވުމަށް ކަމަށެވެ. ޚާއްސަކޮށް މިހާރު ދިވެހި ފުޓުބޯޅަ އަޑިއަޅާލައިފައިވާ މިންވަރު ވެސް އޭނާ ފާހަގަ ކުރެއްވި އެވެ. އެގޮތުން ބޫޓާން ކައިރިން ދިވެހިން މޮޅުވަން ޖެހެނީ އޭރިޔާ ތެރެއިން ކުރާ ފައުލަކަށް ލިބޭ ޕެނަލްޓީއަކުން ނޫން ކަމަށް އޭނާ ވިދާޅުވި އެވެ.
ކުލަބު ފުޓުބޯޅައިގައި މީގެ ކުރިން ވެސް އިސް މަސައްކަތްތަކެއް ކުރައްވާފައިވާ އަލީ ވަޙީދު އިތުރަށް ވިދާޅުވީ، ފުޓުބޯޅައިގައި އޭނާ ކުރައްވަން ބޭނުންވާ މަސައްކަތް އޭނާގެ އުފަން ދުވަހު (ޖުލައި 20)ގައި އިއުލާން ކުރައްވާނެ ކަމަށެވެ. އަލީ ވަޙީދު ވިދާޅުވި ގޮތުގައި އޭނާގެ އެންމެ ބޮޑު ބޭނުމަކީ ކުލަބު ފުޓުބޯޅައިގައި މަސައްކަތް ކުރެއްވުން ކަމަށެވެ. ދިވެހި ފުޓުބޯޅަ ކުރިއަށް ގެންދިޔުމަށް ގިނަ މަަސައްކަތްތަކެއް ކުރަން ޖެހޭ ކަން ފާހަގަކުރައްވާ އޭނާ ވިދާޅުވީ، އިންޑިއާގައި އޮތް ލީގަށް ވުރެ ވެސް ފެންވަރު ރަނގަޅު ލީގެއް ދިވެހި ރާއްޖޭގައި ކުރިއަށް ގެންދެވޭނެ ކަމަށެވެ.
ސަރުކާރުން ފުޓުބޯޅަ ކުރިއެރުވުމަށް ގިނަ މަސައްކަތްތަކެއް ކުރާ ކަމަށް ވެސް އޭނާ ވިދާޅުވި އެވެ. އެގޮތުން ރާއްޖޭގެ އެކި ކަންކޮޅު ތަކުގައި ގިނަ ފުޓުބޯޅަ ދަނޑުތަކެއް އެޅުމަކީ ރަނގަޅު މަސައްކަތެެއް ކަމަށް ވިދާޅުވި އެވެ. އެހެން ނަމަވެސް، ހޯމް އެންޑް އަވޭ އުސޫލުން ލީގު ކުރިއަށް ގެންދެވެން ނެތް ކަމަށް ވިދާޅުވުމަކީ ރަނގަޅު ވާހަކަައެއް ނޫން ކަމަށް ވެސް އަލީ ވަޙީދު ވަނީ ވިދާޅުވެފަ އެވެ.
އިނގިރޭސި ވިލާތުގައި ހުންނެވި ދުވަސް ވަރު އަލީ ވަޙީދު ވަނީ އެ ޤައުމުގެ ކުލަބަކަށް ކޯޗުކަން ކޮށްދެއްވާފަ އެވެ. އަދި އިނގިރޭސިވިލާތުގެ ލަންޑަނުގެ ޑިސްޓްރިކްޓް ލީގުގެ ސެންޗަނަރީ ކަޕްގެ ޗެމްޕިއަންކަން އަލީ ވަޙީދު ވަނީ ހޯއްދަވާފަ އެވެ. މީގެ އިތުރުން އިނގިރޭސި އެފްއޭ އިން ހޮވި ސައުތު ލަންޑަންގެ އެންމެ މޮޅު ކޯޗަަކަށް ހޮވުނީ ވެސް އޭނާ އެވެ.
އަލީ ވަޙީދު އަކީ މަދަރުސީ ދައުރުގައި ޑިފެންޑަރުގެ މަގާމަށް ކުޅުއްވި ކުޅުންތެރިޔެކެވެ. އެއަށްފަހު ޤައުމީ ފުޓުބޯޅަ ޓީމުގެ މެނޭޖަރުންކަން ވެސް އަލީ ވަޙީދު ވަނީ އަދާކުރައްވާފަ އެވެ. ޤައުމީ ޓީމުގެ މެނޭޖަރުކަން ކުރެއްވި ފަހުން، 2012 ވަނަ އަހަރު އޭނާ ވަނީ ނިއުރޭޑިއަންޓް ސްޕޯޓްސް ކުލަބްގެ ޗެެއާމަން ކަމާ ހަވާލުވެފަ އެވެ. ޖެހިގެން އައި ހަތަރު އަހަރު ނިއު އިން ހޯދި ކާމިޔާބީ ތަކުގައި އަލީ ވަޙީދުގެ ހިއްސާ ވަރަށް ބޮޑެވެ.
