އެންސީއައިޓީގެ ބަޖެޓު 122 އިންސައްތައިން ބޮޑުކުރެވިއްޖެ: ޝައުނާ
11 ޖުލައި 2023 | އަންގާރަ 02:45އެންސީއައިޓީގައި ތިބި ފަންނީ މުވައްޒަފުންގެ އަދަދު 38ށް ވަނީ އިތުރުކޮށްފައި
މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ
ފާއިތުވި ދެ އަހަރެއްހާ ދުވަހުގެ ތެރޭގައި އެންސީއައިޓީގެ ބަޖެޓު 122 އިންސައްތައިން ބޮޑުކުރެވިފައިވާކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
މިނިސްޓަރު ޝައުނާ މިފަދައިން ވިދާޅުވީ "ވަންގަވް" ލޯންޗުކުރުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
މިނިސްޓަރު ވިދާޅުވީ މި ސަރުކާރު އެންސީއައިޓީއާ ހަވާލުވީއިރު އެ އިދާރާގައި ތިބީ އަތުން ގުނާލެވޭހާ މުވައްޒަފުން ކަމަށެވެ. އެހެންނަމަވެސް މިއަދު އެ މުވައްޒަފުންގެ އަދަދު 38ށް އިތުރުކުރެވިފައިވާކަމަށެވެ. އަދި މާކެޓް ބޭސްޑް އުޖޫރައެއް ލިބޭނެ ގޮތަކަށް ނިޒާމުވެސް ބަދަލުކޮށްފައިވާކަމަށް މިނިސްޓަރު ޝައުނާ ވިދާޅުވިއެވެ.
މީގެ އެންމެ މުހިންމު ބޭނުމަކީ ފަންނީ މުވައްޒަފުން ސަރުކާރުގެ އިދާރާތަކުގައި ރިޓެއިން ކުރެވޭނެ ގޮތެއް ހަމަޖެއްސުން ކަން ފާހަގަކުރައްވައި މިނިސްޓަރު ވިދާޅުވީ އަދިވެސް ކުރަން ބައިވަރު މަސައްކަތްތައް އެބަ ހުރިކަމަށެވެ.
މިނިސްޓަރު އިތުރަށް ވިދާޅުވީ މިވީ ކުރު މުއްދަތުގެ ތެރޭގައި ވަރަށް ގިނަ މަސައްކަތްތައް ކުރެވިފައިވާކަމަށެވެ. މިގޮތުން މިނިސްޓްރީގެ ދަށުން ހިންގާ އެކި އިދާރާތަކަށް މިހާތަނަށް ގެނެވިފައިވާ ބަދަލުތަކަށް މިނިސްޓަރުގެ ވާހަކަފުޅުގައި އަލިއަޅުވާލެއްވިއެވެ.
