ވައުދުވެވަޑައިގެންފައިވާ ގޮތަށް ށ. ކޮމަންޑޫ އާއި އެ ރަށާ ކައިރީ އޮންނަ މަތިކޮމަންޑޫ ގުޅާލުމަށް ބިން ހިއްކުމުގެ މަސައްކަތް މި މަހުގެ ތެރޭގައި ނިމޭނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ އާދީއްތަ ދުވަހު ކޮމަންޑޫއަށް ޒިޔާރަތް ކުރައްވައި ދެއްކެވި ވާހަކަފުޅުގައެވެ. އެގޮތުން ސަރުކާރުން ވެފައިވާ ވައުދުތައް ފުއްދައިދިނުމަށް ގިނަ މަސައްކަތްތަކެއް ކުރަމުން އަންނަ ކަން އެމަނިކުފާނު ފާހަގަކުރެއްވިއެވެ. އަދި މިހާތަނަށް މުޅި ރާއްޖެެއަށް ވެވަޑައިގެންނެވި ވައުދުތަކުގެ ތެރެއިން 90 އިންސައްތައެއްހާ ވައުދުތަކުގެ މަސައްކަތް ކުރިއަށްދާއިރު ބައެއް ވައުދުތައް ފުދިފައިވާ ކަމަށް ވެސް އެމަނިކުފާނު ވިދާޅުވިއެވެ.
ރައީސް ވިދާޅުވީ މި ސަރުކާރުން އަލަށް ގެންނަ ޑްރެޖަރު ހޯމަ ދުވަހު އިހަވަންދޫއަށް ދާނެ ކަމަށެވެ. އިހަވަންދޫގެ ބިން ހިއްކުމަށް 7-9 ދުވަސް ނަގާއިރު އެއަށްފަހު ޑްރެޖަރު ކޮމަންޑޫއަށް ދާނެކަމަށް ވިދާޅުވިއެވެ. އެގޮތުން، ޖުލައި މަހުގެ ފަހު ދިހައެއްގައި އެ ޑްރެޖަރު ކޮމަންޑޫގައި އޮންނާނެ ކަމުގެ ޔަގީންކަން ރައީސް ދެއްވިއެވެ.
މީގެ އިތުރުން ރައީސް ވިދާޅުވީ ދެ ކޮމަންޑޫ ގުޅާލާ އެއް ސަބަބަކީ ކޮމަންޑޫއަކީ ބިން ކުޑަ ރަށަކަށްވެފައި އެ ރަށުގައި ހައުސިންގ މަޝްރޫއުތައް ހިންގަން ބިން ބޭނުންވާތީ ކަމަށެވެ. އެގޮތުން، ދެ ރަށް ގުޅުވާލުމަށްފަހު މަތިކޮމަންޑޫގައި އަސާސީ ޚިދުމަތްތައް ގާއިމް ކުރާނެ ކަމަށާއި ކުރިއަށް އޮތް ފަސް އަހަރުގެ ތެރޭގައި އެ ރަށުގައި 300 ހައުސިންގ ޔުނިޓު އަޅުއްވާނެ ކަމަށް ރައީސް ވައުދުވެވަޑައިގެންނެވިއެވެ.
މަތިކޮމަންޑޫގައި އަސާސީ ޚިދުމަތްތައް ގާއިމް ކުރުމަށް އަޅުގަނޑުމެންގެ ޕްލޭނުގައި އެބައޮތް. އޭގެ ތެރޭގައި ރައްޔިތުންގެ ފަރާތުން ކައުންސިލްގެ ރައީސް ވިދާޅުވި ގޮތަށް މަތިކޮމަންޑޫގައި 300 ހައުސިންގ ޔުނިޓު އަޅުގަނޑުމެން ކުރިއަށް އޮތް ފަސް އަހަރު ތެރޭގައި އަޅާނަން،ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ކޮމަންޑޫގެ ރައްޔިތުންނާ ބައްދަލުކުރައްވައި ރައީސް ވަނީ އެ ރަށުގެ ރައްޔިތުން އެދޭ ގޮތަށް އެ އަތޮޅުގެ ކުޑަފަރުގައި އެއަރޕޯޓް އަޅުއްވައިދެއްވާނެކަމަށް ވެސް ވައުދުވެވަޑައިގެންފައެވެ.
ދެ ކޮމަންޑޫ ގުޅާލުމުގެ މަޝްރޫއުއަކީ މިދިޔަ އަހަރު ރައީސް ވެވަޑައިގެންނެވި ވައުދުފުޅެކެވެ. މި މަޝްރޫއަށް ގާތްގަނޑަކަށް 250 މިލިއަން ރުފިޔާ ހަރަދު ވާނެ ކަމަށް ލަފާކުރެއެވެ.
