އާސެނަލް އިން ޑިފެންޑަރު ވިލިއަމް ސަލީބާ އާއި ކުރިޔަށް ކުޅޭ ރީސް ނެލްސަންގެ އެއްބަސްވުން އައުކޮށްފިއެވެ.

އެ ޓީމުން ސަލީބާގެ އެއްބަސްވުން އައުކުރީ އިތުރު ހަތަރު އަހަރު ދުވަހަށެވެ. މިއާއެކު އޭނާގެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުއެވެ. އާސެނަލްގެ ފުރަތަމަ 11 އަށް އޮގަސްޓު މަހު ކުޅެން ފެށިފަހުން، ސަލީބާ ވެގެންދިޔައީ ޓީމުގެ ޑިފެންސް ލައިނުގެ އެންމެ މުހިންމު އެއް ކުޅުންތެރިޔާ އަށެވެ.

ސަލީބާ ވަނީ މި ސީޒަނުގައި ޕްރިމިއާ ލީގުގެ 27 މެޗު ހިމެނޭހެން ޖުމްލަ 33 މެޗު ކުޅެ، ތިން ލަނޑު ޖަހާފައެވެ. ރިޕޯޓުތައް ބުނާގޮތުން، ރެއާލް މެޑްރިޑާއި ޕީއެސްޖީން އޭނާ ގެންދިޔުމަށް ޝައުގުވެރިކަން ފާޅުކުރިއެވެ.

2019 ވަނަ އަހަރު 27 މިލިއަން ޕައުންޑަށް ސެއިންޓް އެޓިއެން އިން އާސެނަލްއަށް ބަދަލުވުމަށްފަހު ސަލީބާ ވަނީ ފްރާންސްގެ ފުޓްބޯޅައިގައި ތިން ލޯން ސްޕެލް ފުރިހަމަކޮށްފައެވެ.

އާސެނަލް އިން ނެލްސަންގެ އެއްބަސްވުންވެސް އައުކުރީ އިތުރު ހަތަރު އަހަރު ދުވަހަށެވެ.

އުމުރުން އަށް އަހަރުގައި އެކަޑެމީއާ ގުޅުނު ނެލްސަން އެއްބަސްވުން އައުކުރީ، ކުރީގެ އެއްބަސްވުން ހަމަވުމުގެ ފަހުންނެވެ. މިދިޔަ ސީޒަނުގައި އިނގިރޭސި ޕްރިމިއާ ލީގުގައި ނެލްސަން ވަނީ ބަދަލު ކުޅުންތެރިއެއްގެ ގޮތުގައި 11 މެޗު ކުޅެ، މާޗް މަހުގެ ހަތަރު ވަނަ ދުވަހު ފަހަތުން އަރާ ބޯންމައުތު އަތުން 3-2 އިން މޮޅުވި މެޗުގައި މުހިންމު ލަނޑެއް ޖަހާފައެވެ.

އާސެނަލް މި ސީޒަނުގެ ބޮޑުބައި ލީގު ތާވަލުގެ އެއްވަނައިގައި ހޭދަކުރިނަމަވެސް، ފަހުވަގުތު ޗެމްޕިއަންކަން ހޯދީ މެންޗެސްޓަރ ސިޓީއިންނެވެ.

މި ހޫނުމުސުމުގައި ކައި ހަވާޓްޒް ސޮއިކުރުމަށްފަހު އާސެނަލްއިން ވަނީ ޑެކްލަން ރައިސްއާ ޓިމްބާގެ ސޮއި ހޯދުމާވެސް ގާތަށް ޖެހިލާފައެވެ. ހަމައެއާއެކު، އެ ޓީމުގެ ޒަކާ ވަނީ ޖަރުމަނުގެ ލެވަކޫސަންއަށް ބަދަލުވެފައެވެ.