ސްޕޯޓިންގ ލިސްބަންގެ އުގާޓޭ ޕީއެސްޖީއަށް

ޕީއެސްޖީއާއެކު 60 މިލިއަން ޔޫރޯއަށް ސްޕޯޓިންގ ލިޒްބަންގެ މިޑްފީލްޑަރު, މެނުއަލް އުގާޓޭ ސޮއިކޮށްފިއެވެ.

އުމުރުން 22 އަހަރުގެ އުރުގުއޭ އިންޓަރނޭޝަނަލް ކުޅުންތެރިޔާ ފަސް އަހަރުގެ އެއްބަސްވުމެއްގައި ސޮއިކޮށްފައިވާއިރު، އެ އެއްބަސްވުމުގެ މުއްދަތު ހަމަވާނީ 2028 ވަނަ އަހަރުގެ ޖޫން މަހުއެވެ.

ޗެލްސީއާއި ޓޮޓެންހަމް އަދި ލިވަޕޫލުންވެސް ވަނީ އެ ކުޅުންތެރިޔާ ގެނައުމަށް މަސައްކަތް ކޮށްފައެވެ. އުގާޓޭ ބުނީ ކެރިއަރުގައި، ޕީއެސްޖީހާ ބޮޑު ކުލަބަކަށް ބަދަލުވެވުމުން ވަރަށް އުފާވާކަމަށެވެ. އަދި ޕީއެސްޖީގައި އޭނާގެ އެންމެ މޮޅު ކުޅުން ދައްކާނެކަމަށެވެ.

އުރުގުއޭގެ ގައުމީ ޓީމަށް އަށް ފަހަރު ކުޅެފައިވާ އުގާޓޭ ވެފައިވަނީ، މި މަހުގެ ފަސް ވަނަ ދުވަހު ކްރިސްޓޮފް ގަލްޓިއާގެ ބަދަލުގައި ޕީއެސްޖީގެ ކޯޗުގެ މަގާމާ ހަވާލުވި ފަހުން ޕީއެސްޖީގެ އާ ކޯޗު ލުއިސް އެންރީކޭއާއެކު ސޮއިކުރި ތިންވަނަ ކުޅުންތެރިޔާއަށެވެ.

ފްރާންސް ލީގުގެ ޗެމްޕިއަނުން ވަނީ އެޓޭކިންގ މިޑްފީލްޑަރު މާކޯ އަސެންސިއޯއާއި ޑިފެންޑަރު މިލާން ސްކްރިނިއާ ހިލޭ ޓްރާންސްފަރގައި ސޮއިކޮށްފައެވެ.