ޕީއެސްޖީއަށް ރެއާލް ބަލިކުރެވޭނެ: ނޭމާ

ފްރާންސްގެ ޕީއެސްޖީއަށް ސްޕެއިންގެ ރެއާލް މެޑްރިޑް ބަލިކުރެވޭނެ ކަމަށް އެ ޓީމަށް ކުޅެމުން އަންނަ ބްރެޒިލްގެ ފޯވާޑް ނޭމާ ބުނެފިއެވެ.

ނޭމާ މިހެން ބުނެފައިވާއިރު މި ދެ ޓީމުގެ ކުރިމަތިލުމެއް މި ސީޒަނުގެ ޔުއެފާ ޗެމްޕިއަންސް ލީގުގެ ދެވަނަ ބުރުގައި ފެނިގެންދާނެއެވެ. ޕީއެސްޖީ ކުޅުނު ގްރޫޕުގެ އެއްވަނަ ޓީމުގެ ގޮތުގައި އެ ޓީމު ދެވަނަ ބުރަށް ކޮލިފައިވިއިރު ރެއާލްއިން ދެވަނަ ބުރުގެ ޖާގައެއް ހޯދީ އެ ޓީމު ވާދަކުރި ގްރޫޕުގެ ދެވަނަ ޓީމުގެ ގޮތުގައެވެ.

ހޫނު މޫސުމުގެ ޓްރާންސްފާ މާކެޓުގައި 400 މިލިއަން ޔޫރޯ ހޭދަކުރުމަށްފަހު މި ސީޒަނުގެ ޗެމްޕިއަންސް ލީގު ހޯދުމަށް ޕީއެސްޖީއިން އަންނަނީ ގިނަ މަސައްކަތްތަކެއް ކުރަމުންނެވެ. އެހެން ނަމަވެސް ރެއާލްއާ ދެކޮޅަށް ކުޅޭ މެޗަކީ އެ ޓީމަށް އުނދަގޫވާނެ މެޗެއް ކަމަށް ގިނަ ބަޔަކު ގަބޫލުކުރެއެވެ. މި މެޗާއި ރެއާލްއިން ކުރިމަތިލާނީ ޔޫރަޕާއި ދުނިޔޭގެ ޗެމްޕިއަނުންގެ ގޮތުގައެވެ.

ނޫސްވެރިންގެ ބައްދަލުވުމެއްގައި ވާހަކަ ދައްކަމުން ނޭމާ ބުނީ ރެއާލްއާ ދެކޮޅަށް ކުޅޭ މެޗަކީ އުނދަގޫވާނެ މެޗެއް ކަމަށް ގަބޫލުކުރާ ކަމަށާއި އެ ޓީމުގެ ކުޅުންތެރިން އެކުގައި ކުޅެމުން އަންނަތާ ތިން އަހަރަށްވުރެ ގިނަ ދުވަސް ވެފައިވާ ކަމަށެވެ. މި މެޗު އިތުރަށް އުނދަގޫ ވެގެންދާނީ ރެއާލްއިން ޖެހިޖެހިގެން ތިންވަނަ ފަހަރަށް ޗެމްޕިއަންސް ލީގު ހޯދުމުގެ އުއްމީދު ކުރަމުންދާތީ ކަމަށް ނޭމާ ބުނެފައިވެއެވެ.

ނޭމާ ބުނީ ރެއާލް މި މެޗާއި ކުރިމަތިލާނީ ފެވަރިޓުންގެ ގޮތުގައި ކަމަށާއި އެހެން ނަމަވެސް ޕީއެސްޖީއަށް ރެއާލް ބަލިކުރެވޭނެ ކަމަށް ގަބޫލުކުރާ ކަމަށެވެ. ރެއާލް ބަލިކުރުމަށް ކުރެވެންހުރި ހުރިހާ ކަމެއް ކުރާނެ ކަމަށް ނޭމާ ބުނެފައިވެއެވެ.

ރެއާލް ބަލިކުރެވޭނެ ކަމަށް ނޭމާ ބުނެފައިވާއިރު އޭނާ ރެއާލްއަށް ބަދަލުވާން އުޅޭކަމުގެ އަޑުތައް ވަނީ ފެތުރިފައެވެ.

މިދިޔަ ސީޒަނުގެ ޗެމްޕިއަންސް ލީގުގެ ދެވަނަ ބުރުން ޕީއެސްޖީ ކެޓީ ރެއާލްގެ ވާދަވެރި ބާސާ އަތުން ބަލިވެގެންނެވެ. އެ މެޗުގައި ނޭމާ ބާސާގެ ޖާޒީގައި ކުޅެ ޕީއެސްޖީ ކޮޅަށް ދެ ލަނޑު ޖަހާފައިވެއެވެ. އެހެން ނަމަވެސް އޭނާވަނީ މިދިޔަ ހޫނު މޫސުމުގެ ޓްރާންސްފާ މާކެޓުގައި 222 މިލިއަން ޔޫރޯގެ އެއްބަސްވުމެއްގެ ދަށުން ބާސާ ދޫކޮށް ޕީއެސްޖީއަށް ބަދަލުވެފައެވެ. މިއީ ދުނިޔޭގެ ރެކޯޑު ފީއެކެވެ.

މި މެޗާއި ޕީއެސްޖީ ކުރިމަތިލާނީ 50 ޕޮއިންޓް ހަމަކޮށް ފްރެންޗް ލީގުގެ އެއްވަނަ މަގާމުގައި އޮވެގެންނެވެ. މި ސީޒަނުގައި އެ ޓީމު ކުޅުނު 16 މެޗުގެ ތެރެއިން އެ ޓީމު ބަލިވެފައިވަނީ އެންމެ މެޗަކުންނެވެ. ރެއާލް އޮތީ ކުޅުނު 15 މެޗުން ލިބުނު 31 ޕޮއިންޓާއެކު ސްޕެނިޝް ލަލީގާގެ ހަތަރު ވަނައިގައެވެ.

މި ދެ ޓީމު ބައްދަލުކުރާ ޗެމްޕިއަންސް ލީގުގެ ދެވަނަ ބުރުގެ ފުރަތަމަ ލެގު އަންނަ އަހަރުގެ ފެބްރުއަރީ މަހުގެ 15 ވަނަ ދުވަހު ކުޅުމަށް ހަމަޖެހިފައިވާއިރު އެ މެޗު ކުޅުމަށް ހަމަޖެހިފައިވަނީ ރެއާލްގެ ދަނޑުގައެވެ. އަދި ޕީއެސްޖީގެ ދަނޑުގައި ކުޅޭ ދެވަނަ ލެގު ކުޅުމަށް ހަމަޖހިފައިވަނީ މާޗް މަހުގެ ހަތްވަނަ ދުވަހުއެވެ.