ފްރެންޗް ލީގުގައި މޮނާކޯއާއި ދެކޮޅަށް ކުޅުނު މެޗު ކާމިޔާބުކޮށް ޕީއެސްޖީއިން ތާވާލުގެ ކުރީގައި ނުވަ ޕޮއިންޓްގެ ލީޑެއް ނަގައިފިއެވެ.

މިދިޔަ ސީޒަނުގެ ފްރެންޗް ލީގުގެ ޗެމްޕިއަންކަން މޮނާކޯއިން ހޯދީ ޕީއެސްޖީ ފަހަތަށް ޖައްސާލުމަށް ފަހު ކަމަށްވާއިރު މި މެޗަށް ޕީއެސްޖީއިން ނުކުމެފައިވަނީ ބަދަލުހިފުމުގެ ރޫހެއްގައެވެ. މޮނާކޯގެ ދަނޑުގައި ކުޅުނު މި މެޗުން ޕީއެސްޖީ މޮޅުވެފައި ވަނީ 2-1 ގެ ނަތީޖާއަކުންނެވެ. މި މެޗުގައި ޕީއެސްޖީއިން ވަނީ ގިނަ ވަގުތު ބޯޅަ ހިފަހައްޓައި ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ.

ޕީއެސްޖީއިން ތަކުރާރުކޮށް އުފައްދަމުން ދިޔަ ހަމަލާތަކުގެ ނަތީޖާއަކަށް ވެގެންދިޔައީ ފުރަތަމަ ހާފުގެ 19 ވަނަ މިނެޓުގައި އެޑިންސަން ކަވާނީ ލަނޑެއް ޖަހައިދީ އެ ޓީމަށް ލީޑު ނަގައިދިނުމެވެ. މި ލަނޑަށްފަހު ވެސް އެ ޓީމުން ހަމަލާތައް އިތުރުކުރި ނަމަވެސް މޮނާކޯގެ ކީޕަރުވަނީ ލަނޑު ޖެހުމަށް ޕީއެސްޖީއިން ތަނަވަސް ކުރަމުން ދިޔަ ފުރުސަތުތަކަށް ހުރަސް އަޅާފައެވެ.

އެއް ލަނޑުގެ ލީޑެއްގައި އޮވެ ޕީއެސްޖީއިން ފުރަތަމަ ހާފު ނިންމާލިއިރު އެ ޓީމުން ވަނީ ދެވަނަ ހާފުގައި ވެސް މޮނާކޯގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެގޮތުން މޮނާކޯގެ އޭރިއާ ތެރެއިން ނޭމާއަށް ފައުލްކޮށް ވައްޓާލުމާއި ވިދިގެން ރެފްރީ ދިން ޕެނަލްޓީ އޭނާ ވަނީ އެ ޓީމަށް ކާމިޔާބުކޮށްދީ މެޗުގެ ލީޑު ޕީއެސްޖީއަށް ފުޅާ ކޮށްދީފައެވެ.

މޮނާކޯއަށް ނަތީޖާގެ ފަރަގު ކުޑަވެގެންދިޔައީ މެޗުގެ 81 ވަނަ މިނެޓުގައި ޕޯޗުގަލްގެ މިޑްފީލްޑަރު ޖޯ މޮޓީނިއޯ ހިލޭ ޖެހުމަކުން ޖަހައިދިން ލަނޑުންނެވެ. މި ލަނޑަށް ފަހު ވެސް ދެ ޓީމުގެ ފަރާތުން ވާދަވެރި ކުޅުމެއް ފެނިގެން ގޮސްފައިވާއިރު އެއްވެސް ޓީމަކަށް ނަތީޖާ އަނބުރާލެވިފައެއް ނުވެއެވެ.

ފްރެންޗް ލީގުގައި ކުޅުނު އިތުރު މެޗުތަކުގެ ނަތީޖާއަށް ބަލާލާއިރު ލިޔޯން ވަނީ ރަށުން ބޭރުގައި 5-0 ގެ ތަފާތު ބޮޑު ނަތީޖާއަކުން ނީސް ބަލިކޮށްފައެވެ. ހަމައެހެންމެ މާސޭ ވަނީ އަމިއްލަ ދަނޑުގައި 1-0ގެ ނަތީޖާއަކުން ގެއިންގެމްޕް ބަލިކޮށްފައެވެ.

މި ސީޒަނުގެ ފްރެންޗް ލީގުގައި ޕީއެސްޖީ ކުޅުނު އެއްވެސް މެޗަކުން އެ ޓީމު ބަލިވެފައިނުވާއިރު އެ ޓީމުން ވަނީ ލީގުގެ މިހާތަނަށް 45 ލަނޑު ޖަހާފައެވެ. މިއީ ލީގުގައި ވާދަކުރާ 11 ޓީމަކަށް ވުރެ އިތުރު އަދަދެކެވެ.

ފްރެންޗް ލީގުގެ އެއްވަނައިގައި ކުޅުނު 14 މެޗުން ލިބުނު 38 ޕޮއިންޓާއެކު ޕީއެސްޖީ އޮތްއިރު ދެވަނައިގައި 29 ޕޮއިންޓާއެކު އޮތީ ލިޔޯންއެވެ. ހަމައެހެންމެ ތިންވަނައިގައި 29 ޕޮއިންޓާއެކު އެހެނަސް ލަނޑުގެ ތަފާތުން އޮތީ މޮނާކޯއެވެ. އަދި މާސޭއަށް ހަތަރު ވަނަ ލިބެނީ 28 ޕޮއިންޓާއެކުއެވެ.