ހުވަދޫ އަތޮޅުގައި އާރްޓީއެލް ފެރީގެ ޓެސްޓް ދަތުރުތައް މި މަހުގެ 13ގައި ފަށަނީ

ހުވަދޫ އަތޮޅުގައި އާރްޓީއެލް ފެރީގެ ޓެސްޓް ދަތުރުތައް ފަށާނީ މި މަހުގެ 13ގައި ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

މި ހިދުމަތް ހުވަދޫ އަތޮޅުގައި ފަށާނީ ގދ. އަދި ގއ. އަތޮޅުގެ ހުރިހާ ރަށެއްގައެވެ. ރައްޔިތުން އަހުލުވެރިކުރުވުމުގެ މި ދަތުރުތައް އެއް ހަފްތާއަށް ކުރިއަށްދާއިރު ދަތުރުތައް ހިލޭ ކުރެވޭނެއެވެ.

Advertisement

ހުވަދޫ އަތޮޅުގައި އާރްޓީއެލް ފެރީގެ ހިދުމަތް ފެށުމަށް ފެރީތައް ފުރުމަށް އޮތް ހަރަކާތުގައި ވާހަކަ ދައްކަވަމުން އާޒިމް ވިދާޅުވީ އެ އަތޮޅުގައި 80 މުވައްޒަފުން ލޯންޗު އޮޕަރޭޓް ކުރުމަށް ނަގާ ކަމަށެވެ. އަދި އެ މުވައްޒަފުންނަށް ބޭނުންވާ ޓްރެއިނިންގ ދިނުމުގެ މަސައްކަތް ގދ. ތިނަދޫގައި މިހާރު ކުރިއަށްދާ ކަމަށެވެ. މި ސަރުކާރުގެ އަމާޒަކީ ރައްޔިތުންނަށް ދަތުރުފަތުރުގެ ލުއިފަސޭހަ ނިޒާމެއް ޤާއިމުކޮށްދިނުމަށް ކަމަށް ވެސް ވިދާޅުވިއެވެ.

މި މަހުގެ 20 ވަނަ ދުވަހުން ފެށިގެން ރަސްމީކޮށް ހިދުމަތް ފެށިގެންދާނެ ކަމަށް ވެސް ވިދާޅުވިއެވެ. އެއްވެސް އުނދަގުލެއް އޮތްނަމަ އެމްޓީސީސީއާ އެ މައުލޫމާތު ހިއްސާކުރުމަށް އާޒިމް ވަނީ އެދިވަޑައިގެންފައެވެ.

ރާއްޖެއެމްވީއާ ވާހަކަ ދައްކަމުން ހުވަދޫ އަތޮޅަށް ދަތުރުކުރި އާރްޓީއެލް ފެރީގައި ހުރި ކައްޕިއެއް ބުނީ ކުރިން ހއ. ގައި ދަތުރުގައި ފެށިއިރު ވެސް ލުއިފަސޭހަ ދަތުރުފަތުރުގެ ނިޒާމްގެ ހިދުމަތް ރައްޔިތުން ފާހަގަކުރި ކަމަށާއި ރައްޔިތުން ވަރަށް އުފާވާކަމަށެވެ.

އެމްޓީސީސީން މިހާތަނަށް ހއ. ހދ. ށ އަދި ޅ އަތޮޅުގައި އާރްޓީއެލް ފެރީގެ ހިދުމަތް ފަށާފައިވެއެވެ.

މަޝްރޫއުގެ ފުރަތަމަ ފިޔަވަހީގެ ދަށުން ހއ، ހދ، އަދި ށ އަތޮޅު ހިދުމަތް ފަށާފައިވާއިރު ދެވަނަ ފިޔަވަހީގެ މަސައްކަތް މިހާރު ދަނީ ކުރިއަށެވެ. އެގޮތުން ދެވަނަ ފިޔަވަހީގެ ދަށުން ނ، ރ، ބ، ޅ، ގއ، ގދ، ޏ އަދި ސ އަތޮޅު ހިދުމަތް ފެށިގެންދާނެއެވެ. ތިންވަނަ ފިޔަވަހީގެ ދަށުން ކ، އއ، އދ، ވ، މ، ފ، ދ، ތ އަދި ލ ގުޅާލުމަށް ވަނީ ނިންމާފައެވެ.

މި މަޝްރޫއުގެ ދަށުން ޖުމްލަ 188 ރަށް ގުޅާލުމަށް ވަނީ ހަމަޖެހިފައެވެ. މުޅި ރާއްޖޭގައި ފެރީގެ ނިޒާމް 2023ގެ ނިޔަލަށް ޤާއިމްކުރުމަށް ވަނީ ޕްލޭންކޮށްފައެވެ.

އާރްޓީއެލްގެ ޚިދުމަތަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ޚާއްސަ އިސްނެންގެވުމެއްގެ ދަށުން ރާއްޖޭގައި ހިންގަމުންދާ ވަރަށް މުހިންމު މަޝްރޫއެކެވެ.